ثلاث سنين عدت على ثورتنا
و الشعب لسه ماخدش حقه
لا قلب أم برد على ولدها
ولا شهيد ارتاح فى قبره
ناس جوه السجون قاعده
و الشباب بره بيتحاكموا

فى النهاية قضاءنا شامخ
اوعاك تقول ولا نص كلمه
اياك تقول طمسوا الادله
ولا ممسوك علينا ذله

و الشرطه قايمة فى خدمة شعبها
شرطتنا دى اصلا ما شفتش زيها
احنا اللى شعب اهبل عبيط
عمال مع اى هيصه يظيييييييط
يقولك عيش و حريه
ما العيش كتير
و الحبل ملفوف على رقابتك و متسابلك
بس انت اللى مش عارف تطير
أما الكرامه ف بالذات دى عال العال
اسأل خالد سعيد ولا سيد بلال
******
يا مصر آه م الوجع داير على جبينك
و الجهل و يا الفقر حالفين ما سايبينك
ساعات نصبر نفسنا بحضاره من طينك
و ان اللى جاى احلى احنا اللى ظالمينك

اوعاك تقولى ضد الجيش ولا الاخوان
اياك تعدد و تصنف ما الكل فيها مهان
الدم كله حرام ان كان فى رابعه ولا ع القضبان
ياما نفسى بس يا بلدى يوم اعيش انسان

ساعات يقولوا مش شاعر وكلامى مش عاجب
انا لا انا جاى اترسم ولا اتعايق ولا اتعاجب
حقك على راسى ما تعلا العين على الحاجب
لكن قبل ما تلومنى شوف قبله مين اللى يتحاسب

==================

مودتى