تويت
سبتيلي ايه؟
سبتيلي ايه
بعد اللي كان
واللي جرى
غير بس بحر من الكلام
وحروف كتير متنتوره
فوق الورق
تبكي بدموع ع اللي اتكتب
واللي اتقرا
سبتيلي ايه
غير دم نازف م الوريد
غير حلم كنت باحس ببه
اصبح بعيد
غير بُعْد كنت بانكره
واصبح أكيد
سبتيلي ايه
يامو العيون متكحلين
ببحور ألم
مافيش معايا غير قلم
خايف يقول ع اللي باحسه
ليتحرق من حزن أشواك الندم
مابقاش معايا غير كلام
كام بيت باقوله والسلام
وشعور خانقني بالعَجَز
سبتيلي ايه انا
غير عَجَز
رغم اني في عز الشباب
سبتيلي ايه أنا غير عذاب
وسطور على جبين الزمان
بتنكتب
وشهقه جوا الصدر تصرخ
تنتحب
انا اللي طول عمري سعيد
اصبحت ليه كده وبسهوله
باكتئب
سبتيلي ايه غير لاكتئاب
وكتاب سطوره ماتتقريش
سبتيلي ايه علشان اعيش
وانا اللي كنت يابلدي حالف
اسعدك
وازرع بساتين الأغاني
والأماني
وارويها من نبع الحنان ..
من موردك
سبتيلي ايه
غير سطر في كتاب التاريخ
بيقول زمان كنا وطن
عمره ما عانى م العطن
اللي احنا فيه
سبتيلي ايه؟
تعليق