تويت
كلـــــــو فشـــــــار
بعد قانون التظاهر الجديد , أصبح الطلب شديد على المظاهرات و صار الشباب يقفون في طوابير ولا طوابير العيش و أنابيب البوتجاز لساعات طوال أمام مكتب تقديم الطلبات. بل قد يبيتون ليلهم في العراء انتظاراً لأن يأتي دورهم في اليوم التالي ليعبروا عن حقهم الدستوري , و ينفثون عن نفسهم بتظاهرة أو اثنتين يرجعون بعدها - إن عادوا طبعاً- إلى أهلهم قريري العين وينامون في هدوء تام في انتظار أن تتحقق مطالبهم وأمانيهم - بعد عمر طويل إن شاء الله - في الأحلام..!!
..وقف أحدهم بعد عناء طويل أمام الموظف المسؤول الذي رمقه بإشمئزاز من مفرق شعره حتى أخمص قدميه ,وسأله بامتعاض من تحت نظارته:
- أيوه يا سيد..خير عاوز إيه..؟!
تلعثم قائلاً:
- حضرتك أنا مقدم طلب عشان مظاهره..!!
تأفف الموظف وأخذ يمروح نفسه بالأوراق التي أمامه برغم برودة الطقس وسأله:
- وريني كده ياسيدي إنت كاتب إيه..؟
وأخذ يقرأه بصوت مرتفع:
- إنه بناء على ماورد في القانون رقم 107 لسنة 2013 الصادر في 24 نوفمبر 2013 الخاص بتنظيم المظاهرات والإعتصامات داخل جمهورية مصر العربية ..حلوه الديباجه دي تمام..
ثم توقف فجأة وجحظت عيناه قائلاً :
- إيه الهباب اللي إنت كاتبه ده..؟!
و أردف مستنكراً:
- و نحن مستعدون لدفع كافة المبالغ والدمغات الورادة في القانون والبالغ قدرها اثنان وثلاثون جنيهاً مصرياً لا غير..32 ملطوش إيه إللي بتقول عليهم ..؟!هما دول يجيبو فرخه في الزمن ده ..؟! أطلع فوق في الخزنه ورد تأمين 200 جنيه و50 جنيه طابع شرطه عن كل متظاهر ..!!
أسقط في يد الشاب وقال :
- إزاي أجيبلك المبلغ ده كله دلوقتي ..؟! وبعدين الفلوس دي كلها عشان إيه..؟! و هتروح فين..؟!
أجابه بابتسامة صفراء :
- الفلوس دي عشان تأمين المظاهرات ..ومهمات العساكر والظباط ..أمال هيطلعو مأموريات كده ..ويسيبو بيوتهم عشان يحموكو بلوشي..!! وبعدين عشان التعويضات ..لو فيه إي تلفيات ..أو بقى فيه إن شاء الله منكم شهدا أو مصابين ..ولا الدوله هيا إللي هتدفع من جيبها..!!
أجابه في فزع :
- بس المتظاهرين هيبقو بالملايين ..أجيب المبلغ ده كله منين....؟!
قاطعه الموظف في حده :
- ملايين إيه يا أبو ملايين ..؟! خلاص انتهى عصر المليونيات..آخركم 300 واحد وإن زاد واحد..هتدفع غرامه ميت ألف جنيه.. وهيتلغي التصريح ..ومعدتش تاخد تصاريح تاني نهائي..!!
ثم بدأ في قراءة الطلب مره ثانيه قائلاً باندهاش:
- يوه.. يوه.. يوه..أيه دا كله ..إنت عاوز المظاهره من الساعه 12 الظهر لحد 11بالليل ..ليه ماتنيه.. متخليها سواريه أحسن ..والمسيره منين..لفين ؟!
أجابه قائلاً:
- يادوب حضرتك لحد مالناس تتجمع ..!! والمسيره من دوران شبرا مروراً بنفق أحمد حلمي وشارع رمسيس لميدان التحرير..و من ميدان السيده زينب مروراً بميدان عابدين وشارع محمد محمود لميدان التحرير..و من ميدان مصطفى محمود مروراً بشارع التحرير وشارع جامعة الدول العربية ..و كوبري قصر النيل لميدان التحرير..
وضع الموظف يده على خده وهو يستمع له .ثم قال في حنق:
- الله يخرب بيت ميدان التحرير اللي خوتّونا بيه.. هوا مافيش في البلد إلا ميدان التحرير ..؟! طب إبسط يا سيدي ميدان التحرير مشغول لمده سنه قدام..حاجزينه المؤيدين بتوع السيسي ..و دافعين الرسوم كلها مقدماً..أمال إيه ناس إيدها فرطه و بتفهم..!!
أجابه الشاب في أسي:
- طب أمال هنعمل المظاهره فين..؟! شفلنا أي ميدان حضرتك وأنا هأراعيك..!!
ابتسم في سعاده لكنه عاود التجهم قائلا:
- خلاص الميادين كلها كومبليت ..يأما تحت الإصلاح والتجديد ..!! أنا هأديك شارع 50 أنا كنت شايله للحبايب إللي زيك..!!
قاطعه الشاب قائلا:
- فين شارع 50 ده..؟! أنا عمري ماسمعت عنه ..!! دا أكيد شارع صغير في حاره ضيقه ..!!
زجره الموظف قائلا:
- أهو دا اللي موجود.. إن كان عاجبك..على قد فلوسك ..وال300 نفر إللي معاك..!!وهيا كلها نص ساعه ..تقولو فيها الكلمتين بتوعكو ..وتاخدولكو صورتين للذكرى.. وتتوكلو على الله..!!
ثم عدل النظارة الطبية وسأله:
- قولي بقى ياعم قبلى.. إيه المطالب بتاعة المظاهره ..مش عارف أقرأ الكلام الكتير إللي انت كاتبه..!!
قال الشاب في استسلام:
- إلغاء قانون التظاهر 107 لسنة 2013..
قاطعه الموظف في عنف:
- يعني أول القصيده كفر..إنت أول ماتشطح تنطح ..ولما إنت عاوز تلغيه جاي تقرفنا ليه..؟! أدي جزاتنا أننا عملنالكو قانون ..شعب يخاف ميختشيش ..!! هيه.. وإيه كمان يا حبيبي..؟!
أردف بخوف:
- محاكمة وزير الداخليه بسبب اعتداء قوات الشرطة على المتظاهرين يوم 19 نوفمبر ليلاً..!!
قاطعه ثانية:
- لا دا إنت اتلطشت في مخك ..!!يعني إنت جاي في الداخليه عشان تقيل وزير الداخليه ..؟!إنت أهبل يا إبني..ولا بتستهبل..!!
عدل الشاب من قامته ,و أردف قائلاً:
- إقالة حكومة الببلاوي بما يشمل وزير الداخلية ..والدفاع ..ومديري المخابرات الحربية ..والعامة ..ومدير قطاع الأمن الوطني ..و رئيس جهاز الأمن القومي.. لعدم قدرتهم على حفظ الأمن في مناطق الجمهورية المختلفة.. والتسبب في مقتل جنود الجيش المصري في سيناء والاسماعيلية
وضع الرجل يده على فمه قائلاً:
- أسكت الله يخرب بيتك ..هتودينا كلنا في داهيه ..يا إبني أنا عندي عيال عاوز أربيهم ..أنت عايز تقيل وزير إيه..؟!
ثم تغيرت نبرة صوته فجأة وانتفض كمن لدغه عقرب ,ونظر له شذراً قائلا:
- وله إنت إخوان..؟! ولا تكفيري ..ولا إرهابي ..ولا جنس ملتك إيه..؟!
قاطعه الشاب قائلاً:
- لأ أنا ليبرالي..بدليل أني بطالب بوقف بث قناة سي بي سي بسبب ايقافها عرض برنامج البرنامج للإعلامي باسم يوسف..!!
قاطعه قائلاً:
- و كمان باسم يوسف ..!! إنت مش عارف إنه دلوقتي من المغضوب عليهم.. و هرب على أمريكا خلاص..أنت شكلك كده بردعاوي ..و خاين.. و عميل..!!
أخذ الشاب يحلف له بأغلظ الأيمان بأنه مصري ,و وطني أصيل وانه يحب مصر وجيش مصر . ثم توسل إليه حتى كاد يقبل يديه ,فجذبها في سرعه و قال:
- استغفر الله..والله إنت صعبت عليا يا ابني ..إنت تشطب كل الكلام الفارغ اللي إنت كاتبه ده ..وتهتفلك هتافين من سكات وتمشي..!!
ثم استدرك سائلاً:
- بس بالحق ..ياريت تعرفني إيه الشعارات اللي هتعلقوها ..والهتافات اللي هتقولوها.. لتكون من إياهم ..وهترفعلى أربع صوابع.. ولاتقولي يسقط.. يسقط حكم العسكر..!!
أجابه في لهفة :
- أبداً والله إحنا هنرفع شعار كلو فشار..وهنقول هتافات تيت تيت قربنا نبيض..يابتاع التفويض
فحك ذقنه وهرش رأسه قائلاً:
- أكل الفشار مافهوش حاجه خالص.. وياريت الشعب يبيض.. هوا حد لاقى البيض اليومين دول.؟!
ثم التفت إليه واستطرد سائلاً:
- هيه ..وإيه كمان..؟!
ابتسم الشاب قائلاً:
- جواز عتريس من فؤاده باطل ..باطل..وأبو عصفوره عينو بقت مكسوره..!!
شرد الرجل مفكراً بعمق:
- هوا أنا فاكر الفيلم كويس ..هيا موفقتش عليه ..والشهود والطرطور أبوها كذبو على المأذون..بس إيه موضوع أبو عصفوره ده بقه..؟!
تعجب الشاب من غباء الرجل ,وسذاجته فقال له :
- ماهو في نفس الفيلم ..أبوها كان راسم عصفوره على قورته ..وبعد لما جوز بنته في الحرام.. عينه بقت مكسوره..!!
هز رأسه علامة الفهم ,و وقع على الأوراق بعد التعديلات .ثم قال بارتياح تام :
- خلاص أطلع عند مدام تهاني.. إدفع الرسوم ..وحط الدمغات والذي منه ..ومتنسانيش في البقشيش..!!
تعليق