تويت
ظاهرة المنسف
ناسف الحقوق ...وسارق الاحلام وقاضي في حقوق الانام
لا كلام ياتي من بعده ولا فصال ...
خالتي راحت عينها بحادث سياره ...وانحلت قضيتها بمنسف ( يا حبيبتي يا خالتي )
لعيبه شباب بتموت وثمن اعمارها هو يافطه على واجهة شارع بعد قرار منسف
خلص يا عمي ابنك اسمه على عامود كهربا شو بدك احسن من هيك !!
لاعب مميز بضرب رفيقه او بتزاعل مع مدربه ولان النادي محتاجه
بطنشوا المدرب والمضروب بحضور خروف مشوي بحكي كلمة الختام على شرف منسف
براغي العداله احياناً بتفرط وبدال ما يشدوها بخلوها في مهب الريح ...
اذا شدوها في هالبلد قيمة السيد منسف بتنتهي وثرواتنا الوطنيه بتنقرض ...
مختار الحاره مقضيها طول الشهر رايح جاي على الجزار...بشتري خرفان بالجمله
وبطريقه بستدعي المنسف للبت في قراراته ...واموره الحياتيه
نادي بهبط باخطاء من الاتحاد ...وبستحي يخاطب الفيفا ..بلاش يطلع مش منتمي
وفي الاخر بعطوه خيارات :
* التشهير في الاتحاد الاردني وعدم الانتماء وهي سابقه لم تحدث
* غرامه عشرين الف دينار ...والاسباب كثيره بدون ابداء اسباب
* اللجوء لافضل الحلول وافضلها وبدون فتح ملفات ...استدعاء كبير القوم المنسف...
واحد طخ الثاني ...واحد دعس الثاني ...واحده اطلقت
من جوزها وهاي اكيد بروح عليها نص حقها وهي يمكن اللي بتحضر للطعام على شرف المنسف ....وابوها بكون مثل الذليل قاعد وشيوخ البلد بتكون حاضره بحضور المنسف
هذا عدا عن منسف الانتخابات ..ومنسف الوظائف ..ومنسف التزبيط والتغاظي
...
انا افكر اذاً انا اقدر قيمة المنسف ...وماذا يعنيه المنسف في حياتنا ....
تفضل على سدر منسف
المنسف معناه بالعربي الانفجار ...ولما نعزم اجانب عليه بنضطر نشرحلهم طبيعة الـ explosion....
وليش هو بهذا الاسم وطبيعة ضحاياه ...
الله واكبر عليك يا منسف يا ظالم ...الله يرحمك يا خالتي
( المنسف اكله اردنيه تتصدر الاعراس والنزاعات والجنائز )
تعليق