وقولت ارمى حبال الهمس جواكى
وانساكى
لقيتنى جوه سراديبك وفيكى بأكون
كيان مجنون
وملهم سرقت المسافات عناوينى
سعات اشعركأنك دنيتى الجايه
وغجريه بتلعن خيمة التجوال
اصلى جوه شرايينك صلاة العشق
ويصبح عشقى مرثيه من الترحال
بيحدفنى القدر وانزل
لقاع حلمك
واستشعر بتكوينى اللى متنطور
واوصالى اللى مشبوكه
كما الدقات على الاجراس
كما الدرك اللى ماتت فيه خطا الحراس
احسك سنبله طالعه على راسى
واحسك جرح من كاسى اللى متكسر
وانا وقلبى اللى متعصر
بنسأل فيكى عن عنوان
ورغم العشق والتغريب
بنادى ع المدى طيفك ف هذيانى
وبلسانى الحروف بتشيب
وقولت انساكى كام مره
لكنى ضعيف ف نسيانى
لانك صوره محفوره على جبينى
وقتلنى
اسافر فيكى واتعافر
احنن طوقك الكاتم على حلقى
واحرر نفسى من ضيقك وتطويقك
الاقى حبك السجان
والاقى عشقك القضبان
مايرحمونيش
ولا ترحمش كراسى
حروف اسمك من التدوين
واهرب منك القانى
حبيس تانى
ومغلول القدم وانتى اللى اسرانى
ومتعلق لاخر العمر فى توبك
مع انى حولت اكره
وعمرك مانتى كرهانى