قطة وكلب
شرق وغرب!
حطَّة يا بطة
عض الكلب ف ديل القطة
صرخت نَـوْ
رد الكلب وقال هَـوْ هَـوْ
فلت الديل من بق الكلب
جرت القطة ونزلت سب
نط الكلب
مسك القطة. وأكلت ضرب!
مر يومين والقطة بتاكل
عدى الكلب
هَـوْ هَـوْ، هب
جرت القطة وبدون سب.
أصل لسانها لما اندب
أكلت ضرب.
أكل الكلب
شرب الكلب
نام الكلب
قام الكلب
وآدي القطة بتلحس ديله
بتقدم له ف يومه وليله
وجبة حَب!
لحمة ضب!
شوربة لب!
أصل مُناها
كل دعاها
ف يوم الطب
يعدل حاله،
ويبقى ما بينهم قصة حب!
نِسِت القطة
إن الكلب
يفضل كلب.
عمره ما ينفع
يوم
غير كلب.
تعليق