تويت
حبيبتي ما راح تلاقي فارس متلي
مع أنو حصاني مو أبيض ..
بحب خبرك إني مستعد عمّرلك غرفة
فوق سطحنا . إذا قبلتي تتزوجيني .
أنا لما شفتك أول مرة
حسيت أنو الدنيا صارت متل
الحديقة اللي على طريق بيتكن
عرفتيها ، هي اللي على إيدك اليمين .
وافقي إنك تتزوجيني
صدقيني ماراح تلاقي متلي رجال
لأني بحب هيك ، شلون بدي اشرحلك ياها
بحبك تكوني فرحانة معي وخاصةً لما بعمّرلك بيت .
و بعدين بيصير عنا ولاد ،
و بيصيروا يلعبوا و يجنوا .
و ينطوا من فوق الخزانة على التخت ،
و بينكسر التخت .
بس أمانة لا تزعلي المهم ينبسطوا
في شغلة مهمة قبل ما تاخدي قرارك ،
أنا ما بسمحلهن يلعبوا بالشارع
لأنو بيخطفهن الشحاد ، هههه ، عم امزح
هي أمي كانت تخوفني لما كنت صغير .
بتعرفي الأفضل ما تخليهن يلعبوا برا .
لأنوالوضع مأساوي .
****************
الرسالة الثانية
**************
حبيبتي ليش ما رديتي على رسالتي
قلتلك ما رح تلاقي متلي .
يعني على شو شايفة حالك ،
شايفة حالك بأمّك اللي كل يوم بتتخانق مع الجيران ،
و لا بأبوكي السمين ، اللي بالزور بيمرق من الحارة .
قلتلك رح عمّرلك غرفة فوق سطحنا ،
شو بدك أحسن من هيك ؟
أنا مسامحك لأنك طنشتيني ،
و مشان الحصان اللي حكيتلك عليه ، مبارح بعتو
و اشتريت بسكليتة ، لأني ما معي مصاري جيبلو أكل .
و يوم اللي بجي لعندك رح إجي عالبسكليتة ، بس اطمني
دهنتها بالأبيض .
حبيبتي وافقي تتجوزيني ، عن جد ما راح تلاقي متلي .
شلون بدي أشرحلك ، أنا كتير معجب بجمالك ، تخيلي
بكرا و أنتي عم تطبخي ، و أنا قلك شو صار بالعشا
عن جد أحلى شعور ،
أو لما يصير عنا ولاد ، و أنا آخدهن عالمدرسة بالبسكليتة
تبعي ، و هنّي يغنو " بابا بابا يومك طابا "
و تخيلي هالشعور ما أحلاه .
و بحب قلك قبل ما تاخدي قرارك ، إني بحب مرتي
لما تحكي معي ، توقف باستعداد ، و تحط راسها بالأرض
أنا هيك بحب ، لا تشوفيني عم اتراجكي هلا ، و متل ما قال الشاعر
إذا رأيت الليث يبتسم فلا تصدق .
بحب طمنك ، أنو في كتير بنات أمي حكتلي عليهن مشان أخطبهن
بس أنا رفضت ، لأني بحبك أنتي ، مع أنك تنحة و راسك يابس .
بس لا تخافي ، بكرا رح تتغيري كتير لما بتتجوزيني
و لما تشوفي قلبي الطيب ، و خاصةً لما باخدك سيران على البسكليتة .
و أخيراً بدي ياكي تفكري منيح ،
لأني فرصة ما بتتعوض ، و اسألي أمي .
تعليق