تويت
بين الحرف ... والحلم
ظفرت حلمي بحروف الليل
كرينات فراس الفكرة
فكرة مزالة صغيرة
من عيونها ،طلت كلمة
تحاجي الحلم
والليل طويل
شفتو فعين النجمة دمعة
شفتو فضو الكمرة
يشكي للنور شقاه
والحلم كبير
رسمتو فكف الكلمة
من حروف الليل
وسقيت كل حرف بدمعة
حتى تبسمت النجوم فعيون الصباح
جا الحرف ضاوي
ينور لحكاية
بشروق شمس الحلم
تحلات الظفيرة
كبرات الفكرة
وباقي الحلم ما لق طريقو
وخا شمسو شرقات
طفات فالغروب
وخا دفاه سكون الليل
قْرَفْ من الوقت
كْرَمْ فالمحال
يبق الحرف ما يتلف
لق طريقو فالقصيدة
يدق بيبان الحق
ينبش ..
يهبش..
ما يهدالو خاطر
وخاطري فالحرف
دسيتو صرخة جمر
خطوة بالتمام
تعمر دروب القصيدة
بالحس ..
الساكن فداك الحلم
اللي جاني مع الحرف من هادي شحال
بين الحرف والحلم
كاين حرف..
كاين حلم..
بيهم كبرات الفكرة فقلب القصيدة
وكبر الحس
موس فصدر النحس
وكبر الحرف
دَكَّاكْ فراس الظلم
وكبر الحلم
شمس تطفي ظلام الليل
باقي الحلم
باقي الحرف
وباقي حتَّي أنا هنا ...
عبدالعالي الوالي
تعليق