شحال كدك يا العمر

حشمت من شي كلام تردد
بين الحجر والشتا يجري
وسكت ياك بعد ما لقيت جواب
طليت على يومي من قطرات
وقبلت فكل طلة راس الحجرة
وحلفت مانعود لهاد النهار
وداك النهار كدامي يتسناني
غابت القطرة فيه
والحجر فسباتو يهجي الحلم
آه من داك الحلم الطافي عيني
آه من ديك النعسة فجراح الحلم
فطمت عيني على الفياق
ودسيت الحلم فضو النهار يرتاح
ارتاحي يا عيني من داك الهم
وعزي الرموش فَحْرَاكْها اللي مات
نكتب حرفي نطلق سراحو
يخربش لليل كلمات فكفوف النجوم
تَقْبَل بيَّ رفيق جنب الكمرة
وتشد بيدي نوصل للنهار سالم
آه من داك النهار شحال بعيد
وآه وآه وميات آه
طوال القرب فيه
ولقيتني مزال عاد بْدِيت
نعري الخطوة
تشوف العترة زاهية
ونمشيها بثقل الزمان
شحال ثقيلة هاد الخطوة على الروح
وشحال يكدني من حرف مع الحروف
والقلم فركاين القصيدة مكفوف
الكدرة عامرة بخوف حايل
من زهير الزمان فقلب الخلعة فجعة
وشحال يكدني سكات مع الكلام
ساكن الجوف قاجُّو من عينيه
وشحال وشحال يكدني نصبر مع الصبر
دفة.. دفة
وكل دفة ربات كبدة من الخوف
وشحال يا العمر فيك من عمر يعيش
باش توصل لداك النهار المكتوب فالزهر
دفة شوك ودفة وْعَرْ

2013/12/19 عبدالعالي الوالي