تويت
كَشْ الولد
ابراهيم خالد احمد شوك
لو قايل كلامك
عن قضايا الشعب بيزحزحنا أو يصرفنا
يبقى أخطأت فى العنوان ومابتعرفنا
نحن من الكلام المابحسن عِيشه
عبّينا المخالى وحالنا أصبح خالى
من طعم الفرح السيرتو تشرح بالى
فى كرسى الحُكُم كتّرت فى الكنكيشه
لو هبّينا يوزن صولجانك ريشه
أصلو السارقين بتخوفم كشكيشه
نحنا من المهازل والخديعه قرفنا
أحسن لك قبل يوم الوثوب أنصفنا
أو أصرفنا
من كترالكلام
المابجيب تمن المداد
وحدنا ماتفرتقنا
عَمِّر وزيد كفانا سجون
مابنفعك ضِرى رماد
جُوَّه العيون
طول السنين
شفنا الولاد
تصاقرالقرايه
برغم العنا
البيطحن كبارن
يخلى نهارن
شقا وبهدله
بس فى النهايه
فجيعة الحكايه
وهدية النجاح
سواجه ولواجه
يحصدو القماح
يقعدو عطاله
وناس الحكومة
تورّد عماله
بأعلى الرواتب
يقولو لك ايه
"خبرا أجانب"
تقول البلد عدمت الخبير
من المدير للغفير
نكابد نعافر
نجابد المعايش
شبابنا غلابه
تعابا
تكابس تدفر
تحفّر
عشان بس توفر
تاكل وتشرب
وتحلم تسافر
تهاجر
وشباب التعمير
واقود للحرابه
وكم فينا صابر
يلوك العدم
تفكير وهم
فى لقمه وهدم
عفيف وشريف
يبيت القوا
لاقوت لادوا
لاقرش
لا عنقريب
لاغتا
لافرش
لابرش
وفوقنا عساكر
وسماسرة سياسه
تكوجن الخساسه
وتعوس المراير
تتجبّر تكاجر
تحلب وتعبى
تنهب وتخبى
من خير البلد
عدمنا السند
بس كل أول
بيظهر لو آخر
ويكون ليهو حد
متين يابلد
الأمل الشرد
والفجر الهمد
يعيش للابد
نضايرالزبد
وخيرنا اللبد
يكُشو الولد