تويت
الصمت مقتول م الكلام
غرقان ف ليل دموع
والحلم مخنوق بالرجوع
لساه بيعافر مع اللِجَام
عَاوزيِنُه حلم ميت بالحيا
ف مركب شيطان
مش ف مركب أَوْلِيا
البحر موجه بينطق بالهروب
والغربه بتنادى القلوب
إلى حُضنها
والحُــرقــه جوانا فوق سِنها
بتِسحب من عِنينا
ضوء النهار
كَسَرِت فِينا لحظة إِنتصار
الحلم غرقان ف الدموع
بِيرْتِعش من الخوف
والخيبه فينا بكل الحروف
بتقول على الحلم الخطر
والقلب يابلادى عليه إنفطر
الدم سايل ف الطريق
وعدو اليوم كان زمان صديق
غَيروا من الثوره الوشوش
وطْلِعَنا منها على أكبر فاشوش
كُنا بننتظر لحظة ميلاد
لونها بَــريق البصر
والُلقْيا ف الميعاد
الضحكة نــاويا ع السفر
ذادها آهــات ودموع البشر
النظرة ف عيونا شارده
موبوءه بالعَما
والليل بينادى ف السما
يسرق فينا نبض القمر
والشمس بتلون ف الغروب
من دم بكره اللى إِنهمر
من جـــوه العِروق
ذنب مين؟
لما النهار بيعصى ع الشروق
ذنب مين؟
لما يقسمونا طوائف
وبإديهم بيوسعوا ف الفروق
الطريق مزروع بالحُــفَـَـرْ
والذنب رافض يُـغْتَــفَــرْ
ذنب مين؟
لما العيون ع الطريق
ماتْشُفشِىِ بَعضها
ومات الكلام
يامصر
اللى يصحى ف القلوب نبضها
ياريت تعيدوا الصمت
وبلاش كلام
ف ثوره مقتوله
ف قلبها
تعليق