تويت
شاهًدْ عْلَى الزّْمَانْ
شاهًدْ عْلَى الزّْمَانْ
**************
ف ذاك الزمان اللي غبر وغاب
كانت لكلمة ذهب
ولبسمة خارجة م لقلب
والصاحب حبيب
ماينافق مايكذب
ف ذاك الزمان اللي غبر
غي شاير بلا ماتهضر
واللي نويتي تحضر
ف ذاك الزمان اللي غاب
كانت النعجة تقهر الذياب
ف ذاك الزمان
يا إنسان
كانت الجماعة ملمومة
وخا اللغا ب لغوص
ولحرف يزيد وينقص
لكلمة لمبهومة ، مفهومة
وفين حنا منو ليوما ؟
ف هاذ الزمان اللي حضر
زمان الشر و لمنكر
قوا لغدر
شوف وتْستَّر
ماتشهد ماتهضر
تفوز وتظفر
وْلَ التيقار تكسب
ويلا خالفتي راك تتَّعْطب
هذا زمان التشويكة
لبارصا ولمدريد والتحريكة
ولخذيعة مغلفاها ضحيكة
زمان معايا ولا ضدي
زمان وآش فهمتي آاولدي
زمان عْفا الله غي مْلص ودِّي
زمان لخوانجي كوامانجي
ولفقيه طعارجي
كُولْشي " مْبَارطَاجِي"
وْسير حْتَا تْجِي
أوْ تْجيك ف الرَّاس
يلا بقيتي حاضي عساس
عشنا وشفنا فطومة
عفات علْ الشفارة
بلا حيا بلا حشومة
شكونْ يْصدَّقْ أو يكذَّب ؟
شحال جذبت وقالت
نحاربو الريع ولفساد
منهوم انقيو لبلاد
طلعت كذبة فْ أبريل
وطلع قايلها هبيل
هذا زمان لحماق
زمان التنكاث والزواق
زوق لكلام وعرف تخطب
ترقا لفوق بلا ماتتعب
******************
المريني ادريس
القصر الكبير بتاريخ : 30 / 04 / 2014