غواك ازاي صديق السوء
قالك ايه لجل الدخان

قالك يللا تعالى يا صاحبي
جرب مش هتكون ندمان
نفس أو شمة وسط اللمة
كيفك أولى بالروقان
وبعد الشمة تبقى سيجارة
وانت في كيفك مش دريان
واهو غواك وبقيت من الشلة
من رواد بيت الدخان
والسفهة ليهم قوانينهم وأساليبهم في الدخان
أبو كحاية بعد الشمة
عيل سيس ومهوش خشنان
وفارد صدره بعد الشمة
وسط اللمة من الجدعان
طبعا لما المصروف يخلص
وقت الزنقة الصحبة تبان
هيقولك مبلاش مصروفك
تصرفه على كيفك هتمل
أبوك محفظته فلوسها كتير
وما رح يدرى لو بتقل
اسرق خمسة في عشرة في مية
لجل الشمة السرقة تحل
مرة اتنين واديها بتعدي
بس مصيرك يوم القفش
لما يقولك ليه بتسرقني
هيكون ردك زي الدبش
منتاش واعي اللي بتقوله
أصل الكيف مبيرحمش
وايدك اللي تسرق جوة
عن سرقة برة متخجلش
وهم دول أهل الدخان
آخرة سكتهم في كلبش