تويت
مْعَ منْ احْنَا
مْعَ منْ احْنَا
************
كانت لبسمة تود
وكانت الجورة شهد
ايام كانت الصحبة جد
كانت لبسمة تخاوي
وكان الجار يتاوي
والصاحب يداوي
آح على ذاك الزمان
اللي كان قبل مايمضي
كان السر يتصان
وخا بيه تفضي
كان ل أمن ول أمان
وكانت لكلمة سلطان
على لعداوة تقضي
آح على ذاك الزمان
كانت الرفقة عناية
وكانت لخلطة رعاية
كانو الناس ملاح
مايْعگْروشْ لجراح
آخّْ على هاذ الزمان
لاحرمة لاتيقار
جارك يكويك ب النار
والصاحب طالع غدار
خشبتو معاك حاضرة
وعينو عليك ف الدار
يقلب ليك عَ لْعَثْرة
يحك ليك الضبرة
ويساومك جْهار
كي ادِّيرْ ماتَجْذَبْ
الناس تراوغ تكذب
شْكون يْقِيمْ لْحَدّْ ؟
وشْكون يْبرَّد الصَّهْد ؟
*************
المريني ادريس
القصر الكبير بتاريخ : 05 / 07 / 2014