ما ينكسر شاعر اذا خافيه باح
هو ينكسر لو مات في البوح شعره

الشعر ثغر ٍ ممتلي كلّه اجراح
فيني و أنا خيط الثغر لو تطرّه

يا سائل ٍ عن مزمل ٍ حرّك ألواح
اليوم ما حرّك من الفكر شعره

يا ليل صمتي صارت أشعارك أشباح
كانت بشر تطفي من الحسّ جمرة

الصمت حقل الشعر و الفكر فلّاح
ما ذاق من غصن الكتابات ثمرة

أكتب سكوتك يا الشعر وانته افصاح
وأكتب فضيحة شاعر ٍ جفّ حبره

أوّل اذا دمعي على وجنتي ساح
يبحر شعر وايهيج للشعر بحره

والحين لو تمطر من اشجاني أتراح
ممحول شعري و غيمة الشعر قَشْرة

ياليت شعري يندفن يوم و ارتاح
من عيشته فيني وهو مات ذكره

بعض الشعر لو تشهقه عشرة أرواح
اتموت ما طلّت من البوح زفرة