تويت
حبيبتي ليش ما رديتي على رسايلي ؟
أقل شي ، قولي كلمة . يعني يا موافقة و يا أما لا .
كم مرة بدي قلك إني بحبك ،
صدقيني أنا شب بجنّن و بمتلك أحلى الصفات .
مو متلك؛ نص قرايبينك بالسجن .
اطّمني أمي ما بتعرف شي عن هالموضوع .
لأنو لو عرفت ، ما رح تسمحلي أبداً أني أطلب إيدك .
بدي قلك شغلة صارت معي ، رح تخليكي تتفاجأي ،
حتى أنا اتفاجأت من حالي .
من كم يوم أخدت بطولة الجري لمسافة 5 كم ،
مع أني ماني عداء و لا في بالعادة أني أركض ،
بس رفيقي ضحك عليّ ، وقلي أنو اللي بيربح بالسباق
رح يتزوجِك ، و مشان هيك ركضت متل المجنون ، و ربحت .
و بعدين لما عطوني الكأس و عرفت أنو رفيقي
كذّب علي ، كسرت الكأس على راسو .
لك أنا شو بدي بالكأس !
إنتي أهم كأس بحياتي .
المهم شو بدنا بالجري و بالبطولة . من كم يوم سمعت
خبرية مو منيحة ..
سمعت أنو في شخص جاي ليخطبك ،
على فكرة ، هاد الشب غبي و أنا بعرفو ،
كان رفيقي بالمدرسة ، و كان يقعد بآخر مقعد بالصف .
و أنا كمان كنت أقعد بآخر مقعد ، بس أنا كنت أشطر منو .
هوي كان يجيب 2 أو 3 من عشرة بالمذاكرة ، و أنا كنت جيب 4
من عشرة .
يعني كان ناقصني علامة ليصير ترتيبي وسط ،
و متل ما بتعرفي : خير الأمور أوسطها .
و أنا متأكد أنو الأستاذ كان يكرهني ، مشان هيك و لا مرة
حطلي 5 من عشرة بالامتحان ... مبينة ، زلمة حقود .
مشان هيك حبيبتي ، ديري بالك ، أوعا توافقي تتزوجي
رفيقي الغبي ، لأنو رح يجننك ، أنا عم أنصحك ..
بعدين هاد الشب حرامي كمان .. متل قرايبينك اللي بالسجن .
و فوق هيك اطّوع من جديد بالجيش ، يعني : راح البلد .
حبيبتي وافقي تتزوجيني ، هلا صحيح بيتنا انقصف ،
و انتقلنا ، بس استأجرت بيت بغرفتين ، و شغلي كتير منيح ،
عم بيع خضرة ، يعني إذا تزوجتيني ، ما رح تاكلي هم
السلَطة و لا المقالي أو أي طبخة بدك ياها . كل شي رح يجي
لعندك جاهز من دون ما تتعبي و تنزلي عالسوق .
حتى الحصان تبعي مروق ، عم جيبلو بقايا الخضرة
اللي ما بتنباع .
في شغلة مهمة قبل ما تاخدي قرارك و توافقي
عالزواج . لازم ما نخلي ولادنا يلعبوا برا ، بالطريق .
إذا بدك بنسمحلهم بس ربع ساعة باليوم .
تصوري هداك اليوم شفت ولد بالطريق ، فضيّفتو بسكوتة .
آم طالع باكيت دخان و ضيفني سيجارة !
مسكتو و أجيت لخوفو ، مشان ما يدخّن ، راح طلّع
سكّينة من جيبتو و هجم علي ، و أنا هربت ،
و لحسن حظي كان مارق حصاني بالصدفة ، فنطّيت عليه .
و نفدت من المجرم .
و أخيراًبتمنى ترفضي رفيقي الكسلان
اللي كان يقعد بآخر مقعد ، و تتزوجيني أنا .
عن جد ما رح تلاقي متلي ،
يمكن تلاقي متل جمالي أو طولي ، بس ما رح تلاقي
متل قلبي .. آه يا قلبي .. قلبي اللي تقطّع من الحب ،
و صار متل مثلثات الجبنة ، و على سيرة الجبنة ..
ما بعرف إذا لسا بتتذكريها ، بعد هالغلا .
أنا كانت أكلتي المفضلة ، و كنت آكل كل يوم جبنة
بكل أنواعها . بس و لا يهمك إذا تزوجتيني رح جبلك
جبنة و لو بالدين ، تكرم عينك .
و أخيراً ، أوعا ثم أوعا تتزوجي رفيقي الغبي ،
طبعاً ما في داعي قلّك بأي مقعد كان يقعد .
جومرد حاجي
تعليق