تويت
لو بقيتْ أحسن مثالي : برضو عصفورتك و إن طارت : حرباية
و شخصيتك لو لونها واحد .. برضو حرباية
و أحْسِبها زى ما تحب
***
تصدق ؟ ما أعرفك و لا شفتك قبل كدة..
لكن أكرهك من زمان
كيف؟ ما بعرف
دي لا قضيتي لا قضيتك
وسيرتك الذاتية ما قدر المقام
و بين اسمك و صورتك .. بايْن الإنفصام
قاصدك ولو رسمتَ كل وجوه الإبتسام
قروبك إنت و قروبي ... زي خطين سكة قطر ...
و رغماً عن كدة ... كبير احتمال ... يحصل صِدام
أحياناً ما تجيش في مزاج يومي
أو ألقاك تعوم عكس عومي
( المهم ) ... جايز شخصنة
و ممكن شفْتنة
أنا واحد كَلَس ... وجهاً لوجه ما بْتقْدر عليه
( و أعلى مافي كيبوردك .. أضغطو )
أو سميها ثورة ضد الأنْسنة
لما لقيتك مليان أدب و كُلك مسْكنة
ناوي أجوطك و أبشْتِنك آخر بشتنة
سميها زي ما شئتَ
أو قول حِجْراً على أفكارك ...
ح انط فوق جدار نافوخك ..
و هات يا قرصنة
و لو لقيتك فايق و رايق ...
قول جاك شيطان العكننة
ما في أسف .. و لن أتراجع ..
لو صادق ... و حلفت مليون يمين
ما إنت إلا كاذْباً أشِر
يا مُضِر .. يا أكبر مُفِر ...
أنا فارس الغزوة المُكِر
قاصدك أنا ... مهما تتظارف
أو تجيب مليون وش بيضحك ..
برضك ثقيل
يا إرهابي
فاكر نفسك ما لك مثيل ..؟
مهما كنت
و مهما تكون
أنا قاصدك ...
يا مهمَّش .. يا مهشَّم ... يا مُفَرْمِل تروس التنمية
هات أجاويدك .. و رُش هنا كلام الترضية
برضو قاصدك أنا
رفيق حزبك مش مُؤدْلَج ؟
و الظُلُم عندو باين و أبْلَج ؟
أنا شايف إنو رايو أعوج
لو كلامو في استقامة السيف ..
ما بِسْوى عندي غير هرْجاً مُكعْوَج
يا هوا الزوابع المُهَدْرَج
يا عضو الدهماء ذو الرأي المُرَجْرَج
كلامك نُصُّو مُبْهم .. لأنك بالكامل مُبَنّج
قاصدك ... وتقصدني ..
( و هكذا .. تستمر شهرزاد الأسافير في نقل المعارك الاسفيرية رغم تعاقب الليل و النهار .. بينما شهريار السيرفر يئن تحت وطأة هذا السجال و لا يفقه منه غير : قاصدك )
تعليق