تويت
ضحكت عليا
وقالت :
الحياة جنة
أُدامك ...
ضحكت عليا
وقالت:
دوسي بعافيتك
اكسري بعزمك
خوف غربتك
وحلي أيامك...
ضحكت عليا
وقالت :
أنتِ على حق
بكرا أحلى م النهاردة
بكرا تيجي شمس
وسط موجة برد شاردة
بكرا تكبري يا عروس
البحر وتبحري
بمراكب أحلامك
والله الدنيا ادامك
ضحكت عليا
وقالت :
الصدق نجاة
وانا شايفة الناس
بتكدب وتعيش الدور
لمنتهاه .....
ضحكت عليا
وقالت:
العلم نور
وانا شايفة مراكب العوالم
سايرة وقبطان العلم حيران
في دنيا ما تعرف غير
النفاق واللي يواجه
الشيطان يقولوا عليه
فلول ...
ضحكت عليا
وقالت :
ثوري
غيري الواقع
بصوت جهوري
صرخت وعاد الصوت يرتد
صرخت ما لقيت جنبي حد
وشيلت من الحمول هموم
لو شالها جبل ينهد.....
ضحكت عليا
وقالت :
كل شيء نصيب
طيب ياغالية ازاي
وسط الكوسة والتهليب
يكون للي ماشي على
الصراط نصيب !!!!
ضحكت عليا
وقالت:
المكتوب
طيب ياغالية ليه نصيبي
أحارب الظالم وأكون أنا
المغلوب
ضحكت عليا
وقالت :
قسمة مقسومة
قلت امتى هناخد حقنا
لما أشيل لقب مرحومة ؟؟؟
تعليق