أنا كدبه كبيره بتتعلم في عنيك تتوب !
انا صبر العاجز عن رفضه .. فمنيش أيوب
ومنيش شفاف ... ولا جوا في قلبي نفوس طاهرين
دا انا عادى بخاف .. و بوزع جبني على العالمين
فبلاش تتغري في ضحكايه مسروقه في ليل
وتقولى الهم خلاص رايح و الصبر جميل
وتعبي امالي الحيرانه .. في كاسات مرمر
وتحلى الدنيا الصبارة بضحكة سكر
وتقولى دا بكرة هتتعدل .. والحزن يدوب
انا صبر العاجز عن رفضه .. فمنيش ايوب
ومنيش سفاح .. علشان الحلم اللى يخونى اقتله بشويش
انا كنت ارتاح .. لو يوم الضحكة الهربانه على وشي تعيش
وتبان في كلامى و ملامحى ..
وفي حتى ما اكون عايز احبي .. وانا فوق العشرين بسنين
راح احبي و اجيلك متبهدل من لعب الطين
واقولك يا حبيبتي اخيره .. وحياتى سماح
ما انا لسه الطفل اللى بيلعب علشان يرتاح
وانا لسه الولد اللى بيهرب .. متعبش هروب
انا صبر العاجز عن رفضه .. فمنيش ايوب !




لـ محمد ماهر مرعي