فيلم روائى قصير..







إمرأة فى ثورة







تأليف..
فوزى يوسف اسماعيل
01009482481






- عناوين الفيلم..
موسيقى..

م/1 نهار/داخلى
(منزل هند)
- منزل هند فى احـــــد
الاحياء بالقاهره القريبه
من ميدان التحـــــرير.
- هند راقده على سريرها ..
- صوت اغنيه..ياصباح
الخير..ينبعث من راديو
من خارج الغرفــــــه..
- تدخل عليها امهـــــــا..
- ام هند تقترب من النتيجه
المعلقه على جارفى غرفة
هند..تزيل ورقة امس ليصبح
اليوم 25يناير2011
- تقترب امها منها لتستيقظها.. ام هند00 هند..يا هند..
- هند تتثأب.. هند00 نعم يا ما ما..
ام هند00 انتى مش رايحه الجرنان
ولا ايه..الساعه بقت 8
قومى بقى
هند00 لاء مش رايحه..
ام هند00 الله ليه يابنتى..
- تزيح الغطاء قليلا.. هند00 رئيس التحرير مش عاجبه
اللى باكتبه..كل مااديله
موضوع يقول لى مش
بيشد..
ام هند00 يعنى ايه؟
هند00 يعنى موضوعاتى مفهاش
اثارة تجذب القراء للجريده
يا ماما..
ام هند00 طيب قومى قومى..افطرى
الاول وروحى شغلك يمكن
ربنا يسهل وتلاقى موضوع
يعجبه..
- وهى متكاسله..
هند00 حاضر..
ام هند00 وانا هاحضرلك الفطار
على طول..
- تتركها وتخرج ..
- بينما هند تستعد للنزول
من على السرير..
- قطع -

م/2 نهار/داخلى
(المطبخ)
- ام هند تعد الطعام..
- تدخل هند عليها وهى تعدل
من ملابسها..
تاخذ لقيمات وتاكلها فى
عجاله.. ام هند00 انا بسمع علشان اى صحفى
ينجح فى الصحافه لا زم يشوف
مشاكل الناس..والدنيا مليانه
بالمآسى والمستشفيات ومشاكلها
تعملك اجدعها مواضيع..
هند00 تصدقى ياماما انا مافكرتش
اعمل كده ..انا كل اللى كان
هممنى اكتب عن رجال الاعمال
والشخصيات الهامه واخبارهم
وبس..
ام هند00 الناس مش عايزه كده..الناس
عايزه اللى يتكلم على مشاكلهم
وهمومهم وصوتهم يوصل
للمسئولين..
هند00 خلاص ياماما انا هاغير
مسارى380درجه..وهاعمل
اللى بتقولى عليه..يمكن يعحب
الاستاذ رئيس التحرير.
- قطع -

م/3 نهار/خارجى
(شارع )
- هند تقابل احمد زميلها
فى شارع جانبى من رمسيس
فى اتجاه الجريده.. هند00 ازيك يا احمد..
احمد00 الحمدلله..ازيك يا هند..رايحه
الجرنال..
هند00 ايوة..وبينى وبينك مش
عايزه اروح..
احمد00 ليه بقى؟
هند00 اتعقدت من الاستاذ خالد رئيس
التحرير.زى مايكون
مطهضنى على طول بيرفض
شغلى مش عارفه ليه..
احمد00 انا ملاحظ كده برضه..طيب
ماتحاولى تعرفى ايه اللى
هوعايزه..
هند00 مابيقولش الا عايزموضوعات
تشد..موضوعات تجذب القراء.
لحد مازهقت..
احمد00 خلاص انا هاقولك تعملى ايه.


- قطع-





م/4 نهار/داخلى
(مكتب رئيس التحرير)
- منظرعام لجريدة اليوم
الجديد من الخارج..
- رئيس التحرير يقف
ثائرا فى مكتبه امامه
محسن الصحفى.. رئيس التحرير00 انا عايزاللى اسمها هند
هنا حالاعلى مكتبى..
محسن00 حاضر يافندم..
- وهويجلس على
مكتبه.. رئيس التحرير00 اتصلوا بها تيجى فورا . محسن00 يا فندم يمكن بتغطى خبر
اوموضوع ولا حاجه..
رئيس التحرير00 موضوع ايه..كل
موضوعاتها لاتذكر بشئ..
حاول تشوفها فين وتسيب
اللى فى ايديها وتيجى..علشان
هاكلفها بموضوع تروح تعمله
وتيجى..
محسن00 حاضر .
رئيس التحرير00 يلا بسرعه..
- محسن يخرج مسرعا..
- بينما رئيس التحرير
يعبث فى اوراق على مكتبه
ووجه مكفر..


- قطع -




م/5 نهار/خارجى
(شار ع رمسيس)
-هند واحمد يسيران
فى شارع رمسيس.. هند00 بقى عايزنى انزل الارياف
واسيب مصر..
احمد00 وفيها ايه مانى مسافر طنطا
اهوه هاغطى مؤتمرهناك..
هند00 بس انا..
- مقاطعا.. احمد00 شوفى يا هند..علشان الصحفى
ينجح يبقى لازم يتحمل المتاعب
ويروح ورا الخبر اينما كان..
والريف فيه مشاكل ماتتعدش..
يعنى هتعملى لك موضوع
موضوعين تلاته وترجعى..
هند00 ماشى انا هافكرفى الموضوع
ده ..بس الاول اخد راى الاستاذ
خالدالاول واشوفه هيوافق
ولالاء.
- قطع -

م/6 نهار/داخلى
(الجريدة)
- رئيس التحريريقابل
محسن فى صالة التحرير..
- محسن لنفسه.. محسن00 ياترى انتى فين يا هند..
رئيس التحرير00 هه لقيتها يا محسن..
محسن00 لاء..اصل.. اصلها قافله
المحمول وليمكن تكون فى
مكان مفهوش شبكه..
رئيس التحرير00 انا عايزك توصل بيتها
وتجيبها لى حالا..هتلاقييها
لسه نايمه زى عادتها..
- ينظر له بنفور..
- على مضض..
محسن00 حاضر..
رئيس التحرير00 بسرعه..
- محسن يسرع من
امامه..
- قطع -
م/7 نهار/خارجى
(شارع التحرير)
- شارع التحريرممتلئ
بالناس.
- هند تفاجئ بهم فتتعجب.. هند00 الله ..ايه الناس دى كلها..
- تقترب من رجل وتسأله.. لوسمحت..
الرجل00 نعم..
هند00 هوميدان التحرير ماله مليان
بالناس كدا ليه النهارده..
الرجل 00اصل فيه مظاهره النهارده
بعد الظهر..
هند00 الله ليه؟
الرجل00 علمى علمك..انا لحد دلوقتى
معرفش اى حاجه..
هند00 طيب متشكره..
- تبتعد عنه..
- مجموعه من الشباب
تهتف.. الشباب00 الشعب يريد اسقاط وزير
الداخليه..
- تقرارعدة مرات..
- يظهلرعلى وجه هند
الدهشه..
- هند تسال شاب من
الواقفين.. هند00 فيه ايه؟
الشاب00 بنطالب بحريتنا وبحقوقنا..
بنطالب بتغير وزير الداخليه
- شاب (2) بجانبه.. شاب(2)00 عايزين العدل..
هند00 لكن بيقولوا الشعب يريد اسقاط
النظام..
- الشاب بتعصب.. الشاب(2)00 ايوه..احنا هنعتصم هنا فى
ميدان التحريرحتى يرحل
وزير الداخليه وهاتكون بمشيئة
الله مظاهرمليونيه اساسها
التغيير..
احنا دلوقتى عشر تلاف وعلى
الجمعه هتكون مليونيه ..ولازم
يكون للشعب كلمه لاننا خلاص
فاض بنا..
- هند تنظر اليه دون
ان تتكلم..
- قطع -
م/8 نهار/داخلى
(شقة هند)
- ام هند تفتح الباب
تجد محسن .. ام هند00 ايوه يابنى اى خدمه..
محسن00 هند موجوده..
ام هند00 لاء اقولها مين!
محسن00 انا محسن زميلها فى الجرنال..
ام هند00 دا راحت الجرنال من بدرى.
محسن00 ازاى دا انا لسه جاى من
الجرنال..
ام هند00 طيب ماتتصل عليها على
المحمول..
محسن00 قفلاه..
- بقلق.. ام هند00 اهيه هاتكون راحت فين
يعنى !
محسن00 طيب يا حاجه..انا هحاول
اتصل بها تانى..يمكن ترد
علىّ..
ام هند00 طيب يابنى وابقى خليها
تطمنى..
محسن00 حاضر..
- تركها ومشى..
بينما هى يتغيروجهها
الى الاضطراب..
- لنفسها.. ام هند00 هتكون راحت فين بس..
- قطع -

م/9 نهار/داخلى
(مكتب رئيس التحرير)
- محسن يقف امام
رئيس التحرير.. محسن00 يا استاذ خالد انا روحت
لها البيت بنفسى لقيتها خرجت
من الساعه 8 جايه الجرنال..
رئيس التحرير00 امال راحت فين؟
محسن00 انا سمعت ان فى ميدان
التحرير مظاهره بطالب بتغير
وزيرالدخليه.
- بدهشه.. رئيس التحرير00 ايه!! بتقول ايه؟
- ينهض مسرعا.. يبقى اكيد هند هناك عايزك
كل حته فى الميدان..
محسن00 حاضر..
- محسن يخرج..
- بينما رئيس التحريريقف
يفكر لحظه وهو واضعا
اصبعه الابهام على خده..
- قطع -




م/10 غروب/خارجى
(ميدان التحرير)
- المتظاهرين وقد ملئوا
ميدان التحرير..
- محسن وهويقابل هند.. محسن00 انت فين.. رئيس التحرير
قالب عليكى الدنيا بحالها..
هند00 ليه؟
محسن00 معرفش عايزك..
هند00 انامش هنتقل من هناالاماينفض
ينفض ميدان التحرير..
محسن00 طيب باقولك ايه.. حيث كدا
بقى فيه مصورجاى حالاغطى
انتى الموضوع اصل انا ورايا
موضوع تانى.. سلام عليكم..
- يتركها ويمشى مسرعا..
- تنادى عليه.. هند 00 محسن ..محسن..
- يبتعدعنها..فتلتفت الى
المتظاهرين..
- قطع -

م/11 ليل/خارجى
(ميدان التحرير)
- مجموعه من الشباب
يهتفون ويرددون
هتافات فى مسيره.. الشباب00 الشعب يريد اسقاط النظام..
الشعب يريد اسقاط النظام..
- هند وعمروالمصور
على احد الارصفه..
عمرو00 انتى شاركتى فى مظاهرة
قبل كدا..
هند00 دى اول مره.. ولا عمرى
مسكت يافطة كده وطلبت بها
حقى..
- يجمع الامن المركزى
بجنبات الميدان..
- مصادمات بين الامن
والشعب..
- الشباب يرفعون عدد من
الافتات.. عمرو00 تفتكرى هاتبقى سلميه..
هند00 مش عارفه.. بس اللى باين
قدامى انهم ناوين على نيه
المره دى..انت شايف عنف
الامن..هو ده اللى ممكن يطور
للاسوء اذا زادة المواجهه..
عمرو00 ربنا يستر..
- قطع -

م/12 ليل /داخلى
(مكتب رئيس التحرير)
- رئيس التحريرينهر
محسن.. رئيس التحرير00 فات يوم بحاله ولافيه حس
ولاخبر.
محسن00 معرفش ايه اللى حصل..
رئيس التحرير00 هوانا كل ما اسالك عن حاجه
تقولى معرفش..اتصل بها
وشوف ايه الحكايه..
- محسن وهويتصل فى
الهاتف.. محسن00 مفيش شبكه..
- بنرفزة.. رئيس التحرير00 حاول تانى وتالت..
- قطع -






م/13 ليل/خارجى
(التحرير)
- هند وعمروالمصور
يسيران فى ميدان التحرير.. هند00 عارف يا عمرو انا مرعلىّ
ساعات كنت بحس بالانكماش
فى نفسى ..
- بدهشه.. عمرو00 انكماش؟!
هند00 يعنى زى ماتقول كدا كنت بقول
لنفسى يا حيطه دارينى.. كنت
برفض اشارك فى اى مناقشات
سياسية ولا عمرى كتبت عن
السياسة وقولت فيها رايى..
عمرو00 طيب ليه؟
هند00 مش عارفه..كنت يأسه اوخايفه..
اوكنت براهن على رهان خاسر
على الحريه وكل ماكنت باشوف
حد من زمايلى يطوله عصا
الامن او يوهان من حد ضد
الحريه.. كنت بتراجع..
- وهى تشير للناس امامها.. شوف النهارده الناس اتجرأت
وبتقول يسقط النظام..يعنى فيه
تغيير.
عمرو00 طبعا..لان الناس خلاص روحها
بقت فى مناخيره وهتتفجر..
- وهويحضر فى الكاميرا.. يلا يلا اخدك كام صورة وانتى
فى التحرير..
باقولك ايه الاول انتى مش
هتروحى..
هند00 لاء طبعاهفضل فى التحريرحتى
ولو استمرت المظاهره شهر
بحاله..
- يحاول تصويرها..
- قطع -
م/14 نهار/داخلى
(مكتب رئيس التحرير)
- رئيس التحرير جالسا
فى مكتبه منهمكا فى
كتاباته..
- يدخل محسن منكمشا.. رئيس التحرير00 ايه.. ملقتهاش برضه..
محسن00 الميدان فيه مالا يقل عن
عشر تلاف فرد يافندم..
- وهوينهض واقفا.. رئيس التحرير00 ايه اللى هايحصل..
محسن00 فيه اللى بيقول انهم طالبين
تحسين اوضاعهم وفية اللى
بيقول انهم طالبين باسقاط
النظام..واللى بطالب بتغيير
وزير الداخليه..
- مركزا فى شيئ ما.. رئيس التحرير00 اسمع انا عايزك تاخد معاك
محررين كمان وتنزل
الميدان وتنقلى كل حركةكل
همسه..ماتسبش حاجه سواء
بالموبايل اوتكتبها..فاهم..
ودور على هند وانت فى
الميدان..
محسن00 حاضر..
رئيس التحرير00 بسرعه..
- محسن يتجه نحوالباب
ويخرج..
- رئيس التحرير لنفسه.. دا كدا فات يوم ..هى باتت
فى التحرير ولا ايه..
- قطع -





م/15 نهار/خارجى
(ميدان التحرير)
- لقطات عامه للمتظاهرين
فى الميدان..
- مسيرات لبعض الشباب
يهتفون فى وسط الميدان.. الشباب00 حريه.. حريه.
تعيش مصر حرة..
- تستمرالهتافات حتى تبتعد..
- هند وعمرو المصور
يشاهدون الاحداث.. هند00 العدد كل ما دا مابيزيد..
عمرو00 ولسه..ربنا يستر..
- يشاهدون عساكرمن
الشرطه تحاط بالمكان.. شوفى الشرطه حاوطت
المكان والعربات المصفحه
والاسعاف والمطافى..
- هند ترى العربات المصفحه..
وتشيراليها.. هند00 وكمان عربيات مصفحه
نازله اهيه..
عمرو00 كدا بقى انا مش مطمن..
واكيد فيه حاجه هاتحصل..
- قطع -
م/16 نهار/داخلى
(منزل هند)
- عزيزه جارة ام هند
جالستان فى الصاله .
- عزيزه تهمس لام هند.. عزيزه00 مادرتيش ياام هند..
ام هند00 فيه ايه يا عزيزه ياختى..
عزيزه00 بيقولواان فيه مظاهوة
كبيرة قوى فى التحرير..
- بخوف. ام هند00 اهيه علشان أيه..
عزيزه00 مسمينها ثوره مليونيه.. الله
هوانتى ما بتتفرجيش على
تليفزيون ولا ايه..
- ام هند تنهض واقفه..
وعلى وجهها الاضطراب.. مالك يا ام هند..
ام هند00 خايفه على هند..هند
مابتتش فى اوضتها ياست
عزيزه..وخايفه لاتكون فى
المظاهره اللى بتقولى عليها
دى..
- عزيزه تنهض هى
الاخرى.. عزيزه00 ماتخفيش انتى بس..اهيه
هتلاقوهم شويه وهيروحوا
لحالهم..وهند هتلاقيها جايه
دلوقتى يا ام هند..
- قطع -

م/17 نهار/خارجى
(التحرير)
- على الرصيف يجلس
رجل مسن 60عام
يدعى(رمضان ) مرتديا
جلباب قديم ولحيته تبدوا
ظاهره..
- هند وعمرو يقتربان منه..
ثم تساله هند وهى
تفتح اوراق كانت
فى أيديها لتكتب فيها.. هند00 انت منين يا حاج..
رمضان00 من الجيزه يابنتى..
- تكتب ما يقوله..وعمرو
يلتقط له بعض الصور.. عندك كام سنه..
رمضان00 عندى 60سنه ..
هند00 ايه اللى جايبك هنا..رمضان
جيت انا وولادى التلاته..
- بدهشه.. هند00 ولادك التلاته..
- عمرويميل ناحيتها.. عمرو00 اصلهم اتبلغوا عن طريق
الفيسبوك زى مابيقولوا
وقالولى جيت معاهم..
- لرمضان.. هند00 طيب ممكن تقولى حكايتك
ايه انت وولادك..وعلشان
اطمنك انا صحفيه ..
- تشيرلعمرو.. وده عمروالمصور زميلى.. وتاكد..
انى هاقف معاك للنهايه..
انا مهمتى انقل هموم الناس..
يلا قول ياعم رمضان..
- قطع -


م/18 نهار/خارجى
(امام العماره)
- تنزل ام هند من سلم
العماره تقصد كشك
عم حسانين الخردواتى
المقابل للعمارة.. ام هند00 العواف يا عم حسانين ..
حسانين00 اهلا وسهلا يا ام هند..
- تعطيه ورقه صغيرة
فيها تليفون هند.. ام هند00 خد والنبى اتصل بالنمره دى
على هند بنتى..
حسانين00 حاضر..
- ياخذ الورقه ويدير
قرص الهاتف..لحظه
والسماعه على اذنه.. مقفول..
- ام هند بقلق.. ام هتد00 جرب تانى كمان مره ..
حسانين00 حاضر..
- يتصل مرة اخرى.. برضه مقفول.. لا ماعندهاش شبكه
لا تكون قفلاه..
- بحيره.. ام هند00 كده يا هند..ياترى قفلاه ليه..
حسانين00 اسمعى سيبى الرقم هنا وانا
هاجرب عليه تانى واول ماترد
هاخليها تتصل عليكى..
ام هند00 يا ريت يا عم حسانين احسن قلبى
واكلنى عليها..وعايزه اطمن عليها.
- قطع -

م/19 غروب/خارجى
(ميدان التحرير)
- هند وعمرومازالوا
يسالون رمضان..
- هند تجلس بجواره وعمرو
يقف بجانبهم.. رمضان00 ابنى الكبير ادهم كبرته وعلمته
وخاد شهادة الجامعه..بقاله يجى 7
سنين..قدم على وظيفه ومخلاش
مكان الا وراحه..وماحلفهوش الحظ..
هند00 ليه؟
رمضان00 علشان المحسوبيات..
عمرو00 قصدك الوسايط..
رمضان00 هى دى ..هى دى يابنى..اللى موقفه
المراب السايره للشباب اللى
ماعندهمش وساطه..
هند00 هيه وبعدين..
- بتنهيده.. رمضان00 سنه وصل ل 35سنه وفضل يشتغل
فى القطاع الخاص شغلانه تشيله
وشغلانه تحطه والقطاع الخاص كمان
رفضه كام مره وهويعافر فى غيرها..
علشان صاحب الشغل اكتشف
سرقه عنده فتهمه فيها..وكل ده
علشان زميله اللى معاه ميخلهوش
يزحمه فى لقمة العيش فى المحل..
- قطع -


م/20 ليل/خارجى
(ميدان التحرير)
- هتافات من بعض
المتظاهرين.. المتظاهرين00 حريه..حريه..
- اعاده عدة المرات..
- وصول اعداد من الشباب
الى الميدان يرفعون يافطات
مختلفه..
- محسن يقف فى الميدان
يبحث بين المتظاهرين
عن هند..يتلفت يمين ويسار..
- قطع -


م/21 ليل/خارجى
(ميدان التحرير)
- عاصم ابن رمضان بجانب
ابيه الجالس على الرصيف..
وهند وعمروامامهما.. رمضان00 ده ابنى عاصم الوسطانى
اسمعى منه حكايته..اتكلم
ياعاصم..قولهاجيت هنا ليه..
عاصم00 حاضر يابا..
هند00 حكايتك ايه يا عاصم..
- يتنهد.. عاصم00 هاقول ايه ولا ايه..البطاله
ولا الاسعارولامشكلة ولا
السكن ولا الروتين ولا
المواصلات ولامريض بالكلى
- بدهشه.. هند00 مريض بالكلى!!
عاصم00 ايوه من3سنين وانا بعانى من
المرض..بسبب تلوث المواد
الغذائيه اللى بيقولواعليها
الموادالمسرطنه..والهرمونات
اللى اصبحت حاجه مكدسه
مزارع الفاكهه اليومين دول..
ولا مية الشرب المخلوطه
بالمجارى..
- عمرويلتقط له عدة صور.. هند00 عندك حق..لكن انت بتغسل..
عاصم00 ايوه..والغسله الواحده بتكلفنى
180جنيه.. ولازم 3تيام فى
الاسبوع..
هند00 وبتجيب الفلوس دى كلها منين..
عاصم00 ولاد الحلال كتير بيسعدونى..
علشان كده انا هنا النهارده
بطالب بعلاجى على نفقة الدوله.
بطالب الحكومه تبص للغلبان
اللى زيي.. بطالب بالقصاص
من اللى اتسببوا فى انتشار
الفشل الكلوى وبقى عند الكبير
والصغير..
- قطع -


م/22 ليل/خارجى
(امام كشك حسانين)
- تقف ام هند ومعها
عزيزه جارتها..تسأل
حسانين.. ام هند00 هند مرددش برضه يا عم
حسانين..
حسانين00 لاء برضه ياام هند..
- بخضه.. ام هند00 يبقى لازم ادورعليها..
عزيزه00 على فين يا ام هند..
ام هند00 هدور على بنتى..بقالها يومين
بره..ايه..
عزيزه00 هاجى معاكى..مش هسيبك..
ام هند00 لاء خليكى ..
- تتركها وتمشى منها..
- عزيزه من خلفها.. عزيزه00 لاء والنبى ماهاسيبك..
- تسرع من خلفه
- قطع -

م/23 ليل/ خارجى

(ميدان التحرير)
-هند وعمرو امام
رمضان وقد تركهم عاصم
وذهب مع المتظاهرين.. هند00 طيب ياعم رمضان مش
هاتقوللى حكاية ابنك التالت ايه.
رمضان00 خالد..
هند00 اسمه خالد..
رمضان00 ايوه الصغير عنده 16سنه..
لسه بيتعلم..فى المدرسه.امه
الله يرحمها وصتنى عليه
قبل ماتموت..
هند00 طيب وده حكايته ايه..
رمضان00 خالد دايما مدلع لانه اخر
العنقود..لكن دايما مندفع ودايما
دمه حرلما بيحس بالظلم..
مابسكتش..
- يأتى عمرو اليهم.. عمرو00 تعرفوا ياجماعه وصل عدد
الشهداء اد ايه اكتر من عشرين
شهيد..
- ياتى اليه شاب مسرعا.. الشاب00 عم رمضان عم رمضان.. الحق
ابنك خالد استشد..
- بفزع.. رمضان00 ايه؟
- يغمى عليه..
- بخضه.. هند00 عم رمضان ..عم رمضان..
هاتوا الاسعاف..
- قطع -

م/24 ليل/خارجى
(ميدان التحرير)
- محسن يقابل ام هند
وعزيزه جارتهم..
وسط جموع من الناس.. محسن00 ام هند..ايه اللى جابك بس
ياام هند..
ام هند00 جيت ادورعلى بنتى يااستاذ
محسن..
محسن00 طيب كنتى خليتك وانا هابلغك
لما القيها..
عزيزه00 انا قولت لها كده ماسمعتش
كلامى..
ام هند00 انا عايزه أشوف بنتى..
محسن00 حاضر انا هادورعليها بس
خلوكم انتم هنا..
- يتركهم بجانب الرصيف
من ناحية طلعت حرب..
- قطع -

م/25 ليل/خارجى
(ميدان التحرير)
- امام الجامعه الامريكيه..
دكتوريعالج عم رمضان
فى خيمه من جانبهم هند
وعمرو..
- هند يبدوا عليها الاضطراب..
- للطبيب.. هند00 عامل ايه دلوقتى يا دكتور..
الدكتور00 حاجه بسيطه.. انشاء الله
يبقى كويس..
- الدكتوريعاود الكشف عليه..
- قطع -


م/26 ليل /داخلى

(مكتب رئيس التحرير)
- رئيس التحريقف
امامه صحفيان.. رئيس التحرير00 ايه هواللى بيروح التحرير
مش عايزيرجع ولا ايه..
انا عايز الاخبار بيوم بيوم..
وعايز تغطية المحافظات
السويس والمحله واسكندريه..
كل ده يكون فى المطبعه قبل
الصدور.. مش عايز حد
مابيشتغلش..
صحفى(1)00 كلهم شغالين..
رئيس التحرير00 طيب ليه مابيتسلوش..
صحفى(2)00 لانهم قاطعين خدمة التليفونات
المحمولة يا استاذ خالد..
رئيس التحرير00 الشبكات التلاته..
صحفى(2)00 ايوه..
رئيس التحرير00 ازاى..
- يحاول الاتصال من
موبايله..يجده غير
مشغل.. صحيح..طيب عايزحد ينزل
التحريرحالا يجيب لى الماده
اللى كتبوها..
صحفى(1)00 حاضر..انا هانزل بنفسى
وهاجيب منهم كل اللى اشتغلوه..
رئيس التحرير00 قوللى ايه اخرالتطورات دلوقتى.
صحفى (1)00 الرئيس عين مدير الخابرات
نائبا له..واجلاء الرعايا الاجانب
من مصر..وتصاعد العنف
والانفلات الامنى..ومان الرئيس
كلف احمد شفيق ببدء الحوار
مع المعارضه..
رئيس التحرير00 طيب اكتب لى كله فى تقرير
وهاته..
- قطع -

م/27 ليل/خارجى
(ميدان التحرير)
- مجموعه من الشباب
يهتفون فى مسيره.. الشباب00 مسلم ومسيحى ايد واحده..
مسلم ومسيحى ايد واحده..
- يهتفون حتى يبتعدون.
- ام هند تحاول البحث
عن هند..وتنادى.. ام هند00 هند.. ياهند..
عزيزه00 انتى بتنادى على مين..
انتى شايفه الزحمه اد ايه..
ام هند00 ماهوانى لازم الاقى هند..
عزيزه00 مايمكن تكون راحت الجرنال..
م هند00 لاء هند مارحتش الجرنال
هندبنتى هنا..انا عارفه دماغها
وسيبينى بقى ادورعليها يا
ام سيد الله..
- قطع -
م/28 ليل/خارجى
(ميدان التحرير)
- هند وعمرويسيران
وسط المتظاهرين..
- بتعجب.. هند00 انا عايزه افهم ايه اللى يدفع
الناس دى تيجى من اخرالدنيا
علشان يشاركوافى مظاهرات زى
دى نجاحها مش مضمون..
عمرو00 الكبت..
هند00 الكبت!
عمرو00 ايوه.. الناس قربت تنفجر..
بقت مخنوقه.. مفيش عدل.. فيه
ناس بتاخد بالملاين وناس مش
لاقيه الاضا..
هند00 عنك حق..الناس هتلاقيها منين
ولامنين..كل حياتنا مشاكل..
عمرو00 كل ده دافع قوى يخلى الحديد
يتكلم..وعلى فكره حدش من الناس
دى كلها هتروح الا لما تاخد حقها.
- وهويشير الى الشباب شايفه..
وهى تنشأ الخيام.. شايفه بينشأوا ااخيم..يعن مصممين
يباتوا فى الميدان لحد مايسقط
النظام..
هند00 بس يارب تنتهى على خيروالثورة
دى تجيب نتيجه..
- قطع -

م/29 ليل/خارجى
(ميدان التحرير)
- ميدان التحريرمن ناحية
رمسيس..
- محسن يقابل هند.. محسن00 هند..
هند00 الله.. محسن..
محسن00 انتى فين..رئيس التحريرقالب
عليكى الدنيا..
هند00 انا اهوه..من اول لحظه فى الثوره
وانابغطى احداثها..
عمرو00 طيب والاستاذ خالد عايزك حالا..
هند00 مش هاسيب الميدان الا لما اشوف
هترسى على ايه..وبلغه كده..مش
دايما بيرفض شغلى..
محسن00 ايوه..
هند00 خلاص..انا ناوية بقى اعمل
موضوع ماكنش يحلم به..
ومش هسيب الميدان الا اخر
شخص فيه..
محسن00 على فكره.. دا ناوى يسفر حد
منا المحافظات.
هند00 عنده صحفين كتيريشوف له حد
يسفره..
- قطع -

م/30 نهار/خارجى
(ميدان التحرير)
- ميدان التحرير من جهة
طلعت حرب..
- عمرويقابل ام هند وعزيزه..
- بدهشه.. عمرو00 الله.. انتى هنا بتعملى ايه يا
ام هند..
ام هند00 بدور على هند..
عمرو00 بدورى على هند..ليه هى هند
صغيره..هند كويسه والحمد لله..
ام هند00 عايزه اطمن عليها..
عمرو00 اطمنى هند كويسه وبخير..
عزيزه00 انت شوفتها يا بنى..
عمرو00 هند معانا هنا..
- بفرحه.. ام هند00 صحيح..
عمرو00 ايوه.. انا سبتها شويه لانى كنت
بساعد حاله تعبانه وراجع
لها تانى..
ام هند00 طيب خدنى معاك لها..
- قطع -






م/31 ليل/خارجى
(ميدان التحرير)
- لقطات من واقع التحرير..
- ميدان التحريرمن جهة
رمسيس..
- هند ومحسن مازالوا
فى المكان.. هند00 فكرتنى لازم اكلم ماما..
محسن00 تكلمى مين.. دا الشبكات كلها قاطعه..
هند00 ايه؟
- تنظرفى هاتفها.. اى صحيح..والعمل..معرفش عامله ايه
دلوقتى..تصور نسيت حتى كل حاجه.
بقالى كذا يوم هنا ولاحسيت بتعب..
محسن00 مين قالك ..رغم الاحداث المؤسفه
دى ..والقتل والاعتقالات والمواجه مع
الشرطه ..بتخلى الواحد يعيش احداث
جديده ليه..
- محسن يرى ام هند
من مسافه بعيدة..
- ام هند وعزيزه وعمرو
ياتون من بعيد..
- بدهشه.. محسن00 الله ..ماما اهيه..
- هند تراها.. هند00 معقول!! ماما..
- تقابلها..ماما..
- بلهفه.. ام هند00 هند بنتى..
- تحتضنها.. هند00 ايه يا ما ما ايه اللى جابك هنا.
ام هند00 قلبى واكلنى عليكى..وبقالك كام يوم
مرجعتيشى البيت..
عزيزه00 ازيك يا هند..
هند00 الله يسلمك يا خالتى عزيزه..
عزيزه00 دا كانت امك ملهوفه عليكى يابنتى..
هند00 اعمل ايه شغلى عايزكده ياخلتى..
- لام هند.. عمرو00 مش اطمنتى عليها يلا بقى علشان
اوصلكم البيت..
محسن00 لاء خليك انت وان اللى
هاوصلهم علشان عايزافوت على
لجرنال..ابعت المطبعه الشغل ده.
ام هند00 قوليلى يابنتى . انتى مش راجعه ..
البيت..
هند00 شويه ياماما.. لحد مانشوف ايه اللى
هيحصل..
ام هند00 طيب وبتباتى فين..
هند00 فى خيمه ..مع بنات زييي..
يلا ياامى انتى علشان تروحى
اصل اللي دخل.. ماتسبهاش
ياخلتى عزيزه..
عزيزه00 حاضر يابنتى..
ام هند00 خلى بالك من نفسك ياهند..
هند00 حاضر ياامى..
محسن00 متخفيش عليهم انا معاهم لحد البيت
- يسرون وتبقى هند
مكانها..
- تشاور لهم .. هند00 مع السلامه ياامى..
- قطع -


فوتومنتاج:
ــــــــــــــــــــــــــــــــــــــــــــــــــ ــــ
- خطاب حسنى مبارك
قبل ترك منصبه.

- ترقب من المتظاهرين
فى الميدان..وامام التليفزيون.

مزج الى :


م/32 ليل/داخلى
(الجريده)
- محسن يدخل مسرعا
على رئيس التحرير..
محسن00 الحق يا استاذ خالد..
- بخضه.. رئيس التحرير00 فيه ايه؟
محسن00 الرئيس تنازل عن الحكم..
افتح التليفزيون..
- محسن يفتح التليفزيون
الموضوع امام رئيس
التحرير..ويجلس على
مقعد..
- (يظهر بيان عمرسليمان
وهويلقى كلمة الرئيس..)
- بعد الانتهاء من الكلمه..
- رئيس التحريرينهض
من مكانه وهولا يصدق
نفسه..
رئيس التحرير00 معقول.. الثوره تسقط
النظام..
- ينهض محسن واقفا.. محسن00 ايوه يافندم..
- بفرحه غامره..
رئيس التحرير00 دا معجزه..احجزولى الصفحه
الاولى والتانيه..لاء الجرنال كله..
كل اللى معاه ماده تحريريه يجبها
عايزك ترصد لى كل حركه فى
الشارع.. فى شبر عايز اعرف
رد فعل الناس ايه..

- قطع -



م/33 ليل/خارجى

(ميدان التحرير)

- هند عمرويقفان
ويراقبان الموقف..
- هياج شديد ومفاجئ
بالفرحه من المتظاهرين..
- هند تتعجب متسائله.. هند00 فيه ايه؟ ايه اللى حصل..
شاب00 الرئيس ترك منصبه عن الحكم..
هند00 ايه.. معقول الكلام ده..
- بفرحه.. عمرو00 مش قولتلك..مش هتهدى النار
الا مايكون فيه حاجه..

- المتظاهرين يعلون
بالفرحه.. هند00 سجل سجل بالكاميرا يا عمرو..
- عمرو يلتقط عدة
صور لفرحة المتظاهرين..
- هند تترقب وجوه المتظاهرين
وتكتب فى اوراق معها..


- قطع -










م/34 نهار/داخلى
(الجريده)
- منظر عام للجريده من
الخارج..
- الصحفيون..هند وعمرو
ومحسن واحمد واخرون..
يقفون امام رئيس التحرير
المنبهر من تغطية
الاحداث..ومن شــــغل
هند بالاخــــــــــــــص..
رئيس التحرير00 مبروك يا ولاد..اولا على
انتصار الثوره وثانيا وعلى
الشغل اللى عملتوه..
- لهند.. التحقيق بتاعك خلى مبيعات
الجرنال عالى..علشان كده قرر
مجلس الاداره انه يمنحك جائزه
على اجتهادك يااستاذه هند..
- باستراحه.. هند00 الحمد لله..
- تصفيق من الصحفيين
وسط فرحه غامره منهم..
- يظهرعلى شاشة التليفزيون
الموضوع فى ركن من مكتب
رئيس التحرير..الانتصار
والفرحه التى تعم الشعب..
ثم اغنيه مناسبه للشهيد
وهو يعرض صور الشهداء..
وهم مازالوا يصقفون وجوههم
متجهه نحو التليفزيون.
- قطــــع -


(النهـــــايه)