****************

أنا با تألم

أنا با تالم أنا با تألم من أحوال الناس باتعلم

حتي الصخر بدأ يتكلم واتعلمت لربي أسلم

الناس دايما عايزة تفيدها لو ما عملتش نلت عنادها

ترمي طمعها أو أحقادها وف أحزانك تخلع إيدها

المتمسك بيهم يخسر عمر ما حاجة مفيدة هتقدر

ولا واحد بجراحك يشعر يهرب لو يلقاك تتأزم

النفس البشرية لئيمة تشكمها راح تبقي حكيمة

لو تهملها هتبقي ذميمة بقي لازم لجنونك تحكم

أنا با تعب م اللي باشوفه الواحد اسود جوفه

حال العالم وصنوفه ليه الواحد عايش يظلم

ليه الناس ما بتتغيرشي ليه لطريق الغوي ما تخافشي

علي أخطاءها ما تتندمشي لكن ربك دايما يحسم

يا إلاهي طهر قلبي أفضل ثابت علي دربي

واهدي للعالم حبي عمري ما أغدر يوم او احرم

********************

يا حنان

يا حنان يا حنان بطلي لعب في الودان

ولا تقطعي في الفستان ولا تلعبي في الماتور

يا سمير يا سمير بطل ضرب في الحمير

يا اللا ناكل فطير أنا وانت ونور

يا علاء يا علاء روح لما ما صفاء

اوعي تشرب دواء إلا بإذن الدكتور

يا كريم يا كريم اوعي تضرب سليم

علشان تاكل كريم ربي يكفيك الشرور

يا سماح يا سماح حي حي علي الفلاح

بالصلاة قلبك يرتاح ويحس بطعم النور

يا علا يا علا ربي تنولي المني

توصلي دايما إلي قمة طول الدهور

يا عماد يا عماد يا اللا نبطل عناد

ربي يهديك الرشاد تبقي فارس جسور

يا منال يا منال انت جميلة جمال

وانت زينة العيال دايما ليكي أشور

يا عصام يا عصام اسمع مني الكلام

علشان تعرف تنام وانت مليان سرور

*****************

الواد صلاح

لو تعرف اللي اسمه صلاح يضرب ف خروفنا النطاح

لا يريح ولا عمره ارتاح إلا ما يبدأ بالعدوان

يسخر دايما م العواجيز يضرب صاحبه بالعواكيز

ولا عنده خل ولا عزيز وبيسرق حاجة الدكان

ويكسر ف الشيء يلقاه والفاسد يرتاح وياه

وبيعطي الأستاذة قفاه ولا يرحم أبدا حيران

عرف الناظر أحواله قام جايب عمه وخاله

واتكهرب م اللي جرا له ولا شاف منهم أي حنان

بقي يمشي من تحت العين وبأفعاله بقم شاهدين

وحسابه حساب الملكين ولا شاف ويا الظلم أمان

قال علي نفسه زي الزفت ويقول أنا م الحزن نشفت

يبكي ويقولها اتاسفت وانا دي الوقت بقيت ندمان

عايز احب طريق الخير عايز أمشي بحسن السير

عايز يفضل عندي ضمير وأحمل راية للإحسان

عايز أزرع أرض الحب أبقي عظيم وأخش القلب

وابقي صديق علي طول الدرب وابني الفرحة للإخوان

بقي دي الوقت حبيب الكل أرضه ملانة بزهر الفل

واتحرم علي قلبه الغل ويقول أنا آسف يا زمان

ويقول أنا صرت الكسبان

******************

أدن أدن

أدن أدن يا ديك يا ديك أدن تاني الله يخليك

دانا دايما با رتاح لعنيك

بالتقي صوتك كله سماح بتصبحني كل صباح

وتزود عندي الأفراح وانا ودني بتحن إليك

بادعي واقول يا ربي اهديني دا ملاكة ربنا تحميني

لما لقيتها يا ديك صحيني وعشان كده دايما أناديك

ديكي يا ديك يا بو صوت مسموع دا مقامك عندنا مرفوع

بامسك لك ف الضلمة شموع اصحي الفجر الله يرضيك

أذن أذن يا ديك يا ديك

*******************

أحوال الإنسان

كل الناس بتعيش ف الكد ساعة الحر وساعة البرد

والأيام وقتها تتعد ولا لمطامعك تلتقي حد

الإنسان أحواله كتير حب النفس عدو الخير

ونهايته يكون التدمير وحياته مليانة برعد

الإنسان يهرب م اليأس يرمي الهم يحب النفس

يبني لروحه ونفسه وبس ويحارب علشان السعد

نفرح يوم نعمل أفراح ساعة الحزن نعيش ف جراح

ولا واحد ف الدنيا ارتاح بس حلاوة العيش ف الجد

الإنسان عايش محتار بيجيبه وياخده التيار

وحياته مليانة مرار ولا بيهده غير اللحد

لو يقعد جواه يتمد

**********************

واحد خاين

واحد خاين كاره بيته لا ارتحت له ولا يوم حبيته

يا ما نصحته كمان وصيته ويا ريته يسمعني يا ريته

لا يحن لأهله و لا ناسه ولا عمره بيجود إحساسه

وبيكتم دايما أنفاسه علي نفسه كرهته وعزيته

ولا بيحب الخير لقرايبه ولا واحد راح ينجح جانبه

وبيهدي لهم كل مصايبه عن نفسي وبس أنا صديته

أنا كارهه وكاره لقياه ولا عايز أتمشي معاه

ولا عمري أآمن لهواه وطريقه عمري ما خطيته

واحد خان ملا ن بالضر أسود قلبه ما عمره يسر

عبد لغله ف نفسه الشر دا ف يوم راح يتخرب بيته

الإخلاص عمره ما هيشوفه ولا عمرك هتشوف معروفه

ويا ربي تهدي لنا خسوفه خاين دربه من جبروته

******************