ثورة تانية...

تقليص
X
تقليص
 
  • الصفحة لـ 1
  • تصفية - فلترة
  • الوقت
  • عرض
إلغاء تحديد الكل
مشاركات جديدة
السابق template التالي
  • جمال نصير
    أديب وكاتب
    • 06-07-2012
    • 522
    #1

    ثورة تانية...

    ثورة تانية..
    .............
    تانى ثورة....
    تانية وللا تالة وللا الف مرة..
    أوعى تانى تجيب لى سيرة أى ثورة..
    لما ننسى جراحنا نبقى نقوم ... ندور..
    لما ندفن همنا .. هنروح نثور
    اتخدعنا..
    واترسم حوالينا سيرك ... وراح يدور..
    نبقى نحلم ليه بثورة ...
    تتحرق فيها الزهور....؟؟
    *****
    لا يا صاحبى... قوم ... وكمل..
    ال فات كان درس لينا...
    واكتشفنا مين معانا.. مين ورانا..
    مين بيسرق من شقانا..
    مين بياكل من قفانا...
    مش هنسقط تانى ... قوم...
    وارمى حملك والهموم...
    *****
    لا يا عم .. أقوم لمين...
    البلد دى مش بلادنا..
    البلد للنصابين..
    وال يسرق.. يبقى سيد المغلوبين
    هى حبة طبالين ...
    عزفهم ... للرقاصين...
    والكلاب ... تنهش وتلعب...
    فوق رقاب المطحونين...
    يبقى أصحى ليه .. وفين..؟
    لما نبقى...مسلمين..؟؟
    *****
    لا يا صاحبى ...انت تايه...
    تهت ونسيت احنا مين...
    مصر مش سيف فوق رقاب الطيبين...
    مصر مجد .. ونور .. ودين...
    مصر خضرة ... ونيل.. وطين
    وال انت بس شايفه..
    دول زبالة ... الزبالين...
    اى دولة .. واى عالم ..
    فيه حثالة ... ومخلصين ..
    *****
    سبنى نايم .. جاى تقولى كنا مين..
    مصر كانت ... دي زمان..
    والنهارده....... دينها يرضى بس مين...؟؟
    مصر كانت جنة واسعة..
    واحنا فوقها .. معششين..
    والنهارده...
    نشّفوها ...المجرمين..
    عششت غربان غريبة..
    فوق فروع الغلبانين...
    مصر كانت .. دين .. ودولة..
    والنهاردة ..
    بس غابة ... سفاحين..
    القوى هو ال عايش..
    والضعيف... بيموت سجين..
    يبقى اصحى ليه ..لمين..!!
    *****
    قوم يا صاحبي..
    دى امانة... فوق كتافك ...
    لما تلقى الضنك حالك..
    لما تلقى الظلم ... جالك
    لما تلقى الجهل .. سادك
    لما تلقى الدم ميه..
    وال ما ت مالهش ديه..
    وان بلدك تايهه .. ضايعه .. بدون هويه...
    المفكر ... يقتلوه.. أو يسجنوه..
    واما بيموت .. يحرقوه.. أو يسرقوه
    وال لسه ضميره عايش ... يفرموه
    والحرامى..
    والمطاطى..
    وال خاين ... مجدوه..
    تعمل أيه..؟؟
    راح يجيلك نوم .. تنام..؟؟
    او تحس ولو في سرك ... بالسلام...؟!
    *****
    أه يا صاحبي..
    جيتنى ليه الله يسامحك..
    كنت سيبنى ..ف سر سرى ..اعيش لوحدي..
    وسط خوفى مستريح ... وف مواجعى
    بس صحيت المواجع .. نار تاكلني..
    لحظة واحدة.. خدنى ف إيدك...
    تيجى نصرخ...
    علّى صوتك..
    هات واطيها فوق عاليها..
    صحى تانى الشعب .. فيها
    صحى كل شباب بلدنا ...
    كل حر .. وكل حرة ... من ولادنا...
    حتى يمكن... ييجى واحد من جنودنا ...
    ييجى واحد راضع الحرية .. شارب من همومنا..
    يرفع الراية يوحد.. بين صفوفنا
    يزرع الاحلام .. ف شعبه.. وف بلدنا
    *****
    جمال نصير...
    مايو 2015
    التعديل الأخير تم بواسطة جمال نصير; الساعة 25-05-2015, 14:27.
    الكلمات الدلالية (Tags): لا يوجد
  • لمياء كمال
    أديب وكاتب
    • 26-10-2012
    • 270
    #2
    فعلا جميل
    كانت الكلمات تذوب على لساني وترقص وتغني
    عدا عن المعاني الحميمية الواقعية والتي سخرت وأبدعت

    سعيدة إني هنا في حضرة شاعر مبدع مثلك
    وتصفيقة من الأن وحتى آخر السنة لهذا الجمال
    التعديل الأخير تم بواسطة لمياء كمال; الساعة 25-05-2015, 05:11.

    تعليق

    • جمال نصير
      أديب وكاتب
      • 06-07-2012
      • 522
      #3
      المشاركة الأصلية بواسطة لمياء كمال مشاهدة المشاركة
      فعلا جميل
      كانت الكلمات تذوب على لساني وترقص وتغني
      عدا عن المعاني الحميمية الواقعية والتي سخرت وأبدعت

      سعيدة إني هنا في حضرة شاعر مبدع مثلك
      وتصفيقة من الأن وحتى آخر السنة لهذا الجمال



      من الان وحتى آخر السنة هذه التصفيقة ... بس .. طيب وبعدين؟؟ على أى حال ... تجملت بمرورك الكلمات يا لمياء ... شكرا لك من القلب ..

      تعليق

      السابق template التالي
      يعمل...
      X