((مناجاة دمعة ))
چل جنح الفجر حط اعلى غصن اليآس
والتف بالنــــــــدى وحــلاله اغصانــــه
وانه دمع الجفن حط اعلى وچنة شوگ
بمصبـــــــاح وغسـل العيون باحزانــــه
كل يوم ارتجي الگـه الفــــرح بالبـــــاب
وبشوگ الطفــــــل يفتحلي ذرعانــــه
لچن بيد البشر صارت ضحكتي تمـــوت
وياثغــر التِحــــــلّه وحــــزنه عنوانـــــه
انه رايد الهـــي العدل مـــن يمنــــــاك
يعگـــوب النظــــر بس ردلـــي الوانــــه
احس ضغطة سجن چن ضغطة الطامور
من ضگ اعله موسى وظلم ســــجانـه
واحس ظلمه وظلاله چنها بطن الحــوت
مو يونس انه مـــــن گـــلت سبحانـــــه
اسبحلك نعم وبدمعـــي تالــي الليــــل
فگ عنـــي الحبس ميلـــــي جدرانــــه
نخيتك بالدمع ماعنــــدي شفة صــــوت
انخِرس تالي الحرف من گطعو الســانـه
انــه عيني التعـــــــاين بالنظر عيـــــناك
واسألك للفـــــرج بس فگلي بيبانــــــه
***************

بقلم
رشا الشمري