إعدام وطن..
سرقة وطن..!!
تجويع وطن..!!
كل المعاني ممكنة...
بس ال أكتر... وال أثر ..
وال صارت بيه قلوبنا .. مؤمنة..
وكمان يعبر عن مصابنا وجرحنا...
كان فيه وطن ....
كان هو آخر حلمنا.. كان أمننا..
كل أغلى نقطة ف دمنا...
اليوم فرش دمه على وش الزمن
بيزفنا.. .. ويزف فينا جبننا...
*****
كلمة وطن....
معناها نصبح كام ..فريق.. متشتتين
أجناس كتير... متفرقين...
كلمة وطن مش لل بيحافظ على دينه...
ولا...لل عايز يوم يعيش...
مع ربنا..
صبحت يادوب للأفاكين..
ما بقتش للناس الغلابه.. الطيبين...
*****
كلمة وطن.. تقدر تقول ... أصغر كفن..
لم الجميع...
على أرض مصر – الطيبة -
كلمة وطن ... صارت خيال
صارت محال..
صارت ما بين الناس.. سؤال..
مين الوطن...؟
أنا وللا إنت ..
وللا ناس عايشة على وش المحن..
*****
كلمة وطن ...
صبحت ف مصر يادوب شعار..
يحمى الكلاب..
يحمى الدعارة والجريمة والدياب
لكن بشر...!!... ملهاش حساب
إبحث عليها ف السراب
كلمة وطن .. لما هتبحث ف القاموس..
ال اتعمل على إيد جاسوس..
تلقاه ... ضباب
*****
بقى فيه وطن..
يرسم ما بينه وبين ولاده .. ألف سد..
بقى كل واحد فينا دولة ..
حدودها ..هو..
جيرانها ..هو..
بس بينه وبين حدوده... الف حد..
تصرخ بصوت الحق .. تسمع..
صوت ضميرك .. ال رد..
تحمل همومك فوق كتافك..
هم أرض.... وهم شعب..
وهم أمة ....و مش هتلقى الا .. عند
تبحث عن الحق الاسير..
تلقاه ... ف قلب الريح.. جريح..
تبحث عن الدين ... ماتلاقيش..
وتسير طريق الالف ميل..
تبحث عن المعنى الجميل للانسانية..
وعن شهامة وعن مروءة ..
تلاقى بس ف وشك أنت.. حيطة سد..
*****
بقى فيه وطن...
لكن سخبف..
وما فيش فوارق بين حرامى .. وبين عفيف
وما فيش كرامة عشان تعيش
تلقى الخيانة تترسم... إنسان شريف
تلقى الجهالة ف ودن شعب بأكمله ..
تكميم أراء.... تخدير ضمير..
دفن الصبايا والشباب.. تحت التراب..
أو بين سجون وسط الكلاب..
إعدام بريئ... علشان ما يقلق بلطجى ..
تهجير عقول.. علشان يعيش وحده الغبى ..
سرقة فقير.. علشان يعيش البيه .. غنى
تضليل حقيقة .. ونشر دين مغلوط .. ..
وعمه ودقن ف إدين ..فهلوى..
إعلام .. بوليس..
وبشر يعيش دور السياد
وقضاء ملوث بالسياسة ..وبالفساد
وفقير بيمشى عليه غنى..
ويتيم فريسه ف إيد جبان .. أو مفترى
مش شيئ عجيب...؟!
بس الغريب ...
الشعب واعى ودارى بل بيعدمه..
وال بيشرب من عروقه .. ويحرقه..
وكأنه حالف .. للعناد
*****
جمال نصير