تويت
حالة شروذ ( 64 )
حالة شروذ ( 64 )
************
ياذيك لْ آنا لْفاتْناني
لْواغْلة ف دخالي منْ زَمان
عْييت منَّك ونْت سَاكنَاني
واللِّي بينَّا ياريت ماكان
شْحال طالبتك باش تنساني
جْفيتك وْ غيَّرت لْعنوان
مازالة شابْطة وْلاصْقاني
مابْغيتي تْلعْني الشِّيطَان
شاهْية تْشفِّي عَدْياني
عنْوة فيّا بايَن عْيان
يا لْوالْجة فيَّا قْبل زْمَانِي
قْبل عْلُوقي وقْبل التَّكْوان
تغْرارَك بَ الجّْمَركْوانِي
لْبسْني صْقِيعْ مْسدِّي نِيرَانْ
**************
المريني الدريس
القصر الكبير بتاريخ : 18 / 04 / 2014