باركي لي يمَّه بقيت ليبرالي..يا فرحِتِك يوم ما تحضَّرت
والحق داروين أدرى بحالي..ومعايا موزة مش تنوَّرت
و ان شفت جلباب مر قُدامي..حاصْرُخ واقول اني تعوَّرت

من النهار ده حتبقى رسالتي..أهاجم اللحية والدين
وادعو لسلام وحب بالكوم..وللطاغية اسقَّف عالزنازين
ولا ادوقش طعم الراحه والنوم..إلَّا وكل الناس قالعين
واخُد قبول مسيو ورضا مستر..تبقى الحياة هَنَا وهّاجة

حاعمل خلاص انا كلْ ما بدالي..ديك رومي مَلْو التلّاجة
حاتحدّى ابويا وأشتم خالي..وأسلّفك إذا محتاجة

الفكرة إنِّ الناس أحرار..والحر هوَّا اللي يختار
واخترت اعيش عيشة الخواجات..سُكر وسهر وبنات وقمار

والست دي شُغلانتي الست..السر فيها دي راس مالي
صعبان عليّا حالها تعبت..نفسي أبوسها طوّالي
وتلبس على آخر موضة..وتجيب حبيبها للأوضة
يا حلاوة الدنيا الفوضى..والكل مع مرادو سالي

ما كفاية بقى هم ورجعية..مومن وإيماني في القلب
إزّاي حاعيش الدنيا ديّا..والمال لكل من هب ودب
ووقتي في عبادة بيضيع..
لابد نعبد على السّريع
نرضى نسلِّم بالتطبيع

ُونرابي وان طُلنا ننهب..
بسلوب حضاري ومُهذّب
دا شرط لازم عند الغرب

باركي لي يمَّه دا إبنك
إبنك دا ليبرالي مؤدّب