تويت
لهبيلة هي لقبيلة
لهبيلة هي لقبيلة
********************
علاش يادنيا انتي هبيلة
شي ترفعيه وشي تدنيه
سلامة لعباد فيك قليلة
اللي ترضِّيه واللي تغضّْبيه
واللي تشعليه بلا فتيلة
علاش يادنيا انتي هبيلة
شي تنجيه وشي تعطبيه
وشي عايش عيشة ذليلة
شي تنصفيه وشي اظَّلميه
تحگريه وما ب يدو حيلة
علاش يادنيا انتي هبيلة
يوم جيتك ، جيتك باكي
واللي جابوني ليك فرحو
أنا دموعي راوية حنكي
وهوما نشطانين يمرحو
ليوم يادنيا حين كبرت
ومن زمانك تعلمت
عرفتك يا دنيا غرارة
دواير زمانك غدارة
وشلا رهوط فيك غير مكارة
لهبيلة ماشي هي انتي
لهبيلة هي لقبيلة
********************
المريني ادريس
القصر الكبير بتاريخ : 06 / 07 / 2017
تعليق