بينتا القديم

***

بيتنا القديم
ابو سقف من الواح صفيح
جدرانه م الطين الحزين
طين السنين اللى اشتكت
من العواصف والمطر
حزين ... حزين
زى دعوات اليتامى
فى ليل صفر
شبابيك من البوص انتنت
واتشبكت واتمتنت
بالشردى وبقصاقيص دبار
اتمكنت
اما العتب كان من رخام
ازاى يكون عتب الغلابة
من رخام ؟
فى بيت بيهطل فى الشتا
حتى حيطانه من زمن
متفتتة
فى مرة قالو فى البلد
عسكر السلطان بتهجم عالبيوت
البيوت ام السكوت
ام السكوت لو مات تموت
زى الرحايا فى البيوت
اتعطلت واتكسرت
زى الوجوه الدبلانين
ما اتغبرت
دخلوا العساكر جوه بيتنا
وساقوا جدى بالبنادق والسياط
سبق النحيب صوت العياط
حتى ماكانش هناك كلام
ازاى يكون عتب الغلابة
من رخام ؟؟

****

بيتنا القديم
ابو الليالى الطيبة
حدوتة فى الليل الطويل
خضرة ومية مفضضة
ومدهبة
ونجمتين من صحبتى عالمصطبة
واحدة بتمسح عالجبين
والتانية ايدها مطبطبة
وحصيرى مسلول العيدان
لكن باحس فى قعدتى بطعم الامان
وعساكر السلطان خلاص
من يوم ما مات الخوف زمان
ماعدتش اسمع صوت رصاص
ماعدتش اسمع الا صوت امى الحزين
بدموع على قرص العجين
لما يلين ع " المطرحة "
جوه " الطابونة " يستوى
يا ايدين حبيبتى الطيبين
هفهفت ريح النهار
لما وعيتلك كنت هايم
فى انتظار
كنت محتاج انى اقاوم الاحتضار
كنت محتاج ان يصبح لى دار
او جدار يحمينى من برد الشتا
انا اللى كنت زمان ضلوعى مشتته
اسل م الليل لقمتى
واسرق من الريح النفس
ياما هربت من العساكر والحرس
وكنت طفل صغير يتيم
جوه فى بيتنا القديم
ابو سقف من الواح صفيح
جدرانه م الطين الحزين
طين السنين اللى اشتكت
من العواصف و المطر