عشكتج كمر من ايغيب اتكدر
كمرة وهلال وليل من شوفتج كمر
ابليلي انت الكاس من دون الخمر بيج اسكر
ياعود الغزل والناي من يسهر
دندنت بيج العود بيهن وتر خضر
ياعشبة حنان وريحه من عنبر
يا ريح الورد والمسك من عطر
بستانج ورد ولريحهن اسهر
عشكتج ليل للولهان يتخصر
ودمعة نجم لليل باللهيمان تتفسر
سواد الليل من شعرج رسم منظر
يلبيج الشعر اشمطال هم كصر
وجهج للصبح اضويات تتمخطر
فراش العشك من حسنج تره اتهستر
بستان العشك من شوفتج خضر
ياهور الجمال وبادية وخنجر
يابردي وكصب ....... سبحان من صور
ياريل بغيابج دربي يتعثر
بحجايات زعلج جامي يتكسر
بغيابج جفوني الليل بس تسهر
وفنجان السهر من هجرج اتخدر
يمته تعود ضحكاتج الي منظر ؟
ويمتي بخاطري طيفج الي يتصور ؟
انتظرج سحور وبيج اتسحر
وانتظرج الماي وصايم وافطر
وانتظرج فرح بالعيد يتاطر
يمته يعود الي كحلج وعيني تخور ؟... واهيمن بيج انه ابوساتي اتهور
انتظرج غضب للاسد من يزئر
انتظرج طواف ومسبحه ومشعر
وانتظرج قصيدة وعاطفه ومنبر
يمته تعود قافيتج الي مظفر (1)؟
ويمته بلحنج الكاطع(2) يمر اشعر ؟
انطر جيتج الشاجور والمنحر
وانطر جيتج الباورد للعسكر
يمته بنظرتج احلامي تتفسر؟
ويمته بضلعج البوماتي تتسور ؟
اوف ويمته بشفافج اضل أسكر ؟
اوف ويمته اشرب مايج الكوثر؟ ... وروي قفرتي وشفايفي التسعر!
اوف ويمته انت والزعل مهجر؟
للزعل كلبج ياعمري ماصفر؟!!!!!
شنو بزادج ملح جفجيري ما غزر ؟
اوف ويمته حضنج الي يتذكر؟
اوف ويمته بشفافج اضل اسكر ؟


(1)الشاعر العراقي الكبير مظفر النواب
(2)الشاعر الشعبي العراقي كاظم الكاطع

شعر المهندس مصطفى كبه