رباعيّات ليْـثِـيَّة

**د/ أحمد الليثي** · 09-10-2007, 13:25

فلاح بلدنا وعاجنـة البلهارسيـا جِتِّتُـه
أصل أبوه النيـل وشـرب من مَيِّتُـه
قالوا: ظلمت النيل! طب قولوا مين موِّتُـه؟
هي يعني البلهارسيا من اختراع حضرتُـه؟

**د/ أحمد الليثي** · 09-10-2007, 13:32

امتى الزمان يسمح يا جميـل
وينضفـوك يا نهـر النيـل؟
وارجع أغنّي فيك مواويـل
ووهيبة تمشي عليك وتميـل.

**د/ أحمد الليثي** · 10-10-2007, 07:44

بحب الحكومة وحبي شديد
أمِدِّلْها إيدي تمـد في إيـد
وتلطم خدودي وقلبي سعيد
أصل كرامتي كرامة عبيـد

**د/ أحمد الليثي** · 10-10-2007, 07:49

يا سيدي الحكومة دي زي المدام
تتعب وتشقى، وعيشتـك سُخـام
وان جيت ف مرة تقول ده حرام
قول على نفسك لربي الدوام.

**د/ أحمد الليثي** · 10-10-2007, 13:09

حب الحكومة دا واجب علينا
وخدمة جنابها دي كلّ ما لينا
نبـوس بحرقة إيديها الأمينة
وشوطة رجولها علامة وفينـا

**د/ أحمد الليثي** · 11-10-2007, 19:18

اصحى يا نايم، النومة طالت، وطول العمر مش مضمون
الضامن الرَّزَّاق، والرزق ما فيه حيلة، والحِيَل شكوك وظنون
والظن إثم، والإثم خيبة وندم، والندم ما فيهش سكون
والسكن زوجة، والجواز غالي، والغلا يصحِّي عيـون.

**عبدالرحمن السليمان** · 11-10-2007, 21:49

المشاركة الأصلية بواسطة ahmed_allaithy مشاهدة المشاركة

سايح ف أرض الله من بلاد لبلاد
مشحطط أم العيال، ومعاها كمان الاولاد
نفسي أرجع لبلدي، ويوم ما رجعت
قالوا إخوانجي وكمان من الموساد!

آه ألف آه يا دكتور أحمد آه ألف أواه!

أيش نصنع إذا كان السلطان من سلالة جنكيز خان!

لقد تصالح جنكيز خان مع الموساد ولم يتصالح بعد مع الانسان!

**د/ أحمد الليثي** · 12-10-2007, 19:19

قومي يا مصـر وقولي لي: ليه معاكي احتـار دليـلي
النهـارده مكشَّـرة، وف الماضي كنتِ بتضحكي لي
مش هو ده وشِّك يا غالية، حتى نيلك مش هو نيـلي
والناس كمان اتغيرت، ولقيت عـدو مكان زميـلي.

**د/ أحمد الليثي** · 15-10-2007, 12:17

بحب الحكومة، بحب الحكومة
وليكم عليّا لاعمل عزومة
وادبح جاموسة وحمارة وبهيمة
لاولاد الذينَ ولاد اللئيـ ...

**د/ أحمد الليثي** · 19-10-2007, 09:14

أنا الأديب اللي ما يعرف

[align=center]أنا الأديب اللي ما يعرف
راسه من رجليه
شقلبت حالي كده الدنيا
وراح اعمل أيه؟
إيد قصيرة، وآدي التانية
ممدودة للبيه
وان قلت كلمة وموزونة
يغمز بِعْنيه*
والاقي نفسي كده في زنقة
وعشايَ عليه.**[/align]

======
* بِعْنيه: عين جناب البيه
** عليه: على الله عز وجل.

**عبدالرؤوف النويهى** · 19-10-2007, 12:13

ما أحلى الكلام لما يطلع من صلاح جاهين
أقصد أأقول الليثى باشا ..كبير المنشدين

على الربابة يغنى ومالوش فى الملتقى مثيل
باحبك ياليثى ،يانوارة القلب ، وحبى للمواويل

سطور ومجدولة بطمى النيل والقطن والحلبة
حزين على شعبنا وأنا بينهم والليثى فى الغربة

عبدالرؤوف النويهى
المحامى بالنقض

**د/ أحمد الليثي** · 19-10-2007, 12:58

أحبك الله يا نويهي،
وجمعنا دايمــاً ع الخيـر
في مصر أو كده في الغربة،
أو مطرح ما يحط الطير
دي أرض الله واسعـة وقدرنا
نروح من مصرنا لمصير
مكتوب وزاهي على جبينّـا
الحـر ما يطاطي لغـيــر.

**د/ أحمد الليثي** · 20-10-2007, 14:39

[align=center]أنا الأديب اللي كلامه موزون بالماس
وكل حرف وله معاني، ومعجون إحساس
لا عمره نافق كده ظالم، ولا باس له مداس

وآديني قاعد ف مكاني، وباعلن إفلاس[/align]

**صابرين الصباغ** · 20-10-2007, 15:10

يامه ...
المصري فاتك وقال سلام
يكنز ويعبي جبال أوهام
يامصري أبوك بنى الأهرام
بالجزمة المليانة خرام

**صابرين الصباغ** · 20-10-2007, 15:14

[align=center]لعبة كبيرة ..أحنا لعبناها
مقالبهم ايوة شربناها
أكلم هما كل التورتة
وصوانيهم أحنا مسحناها[/align]

رباعيّات ليْـثِـيَّة

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

ما الذي يحدث