مشاركات ((جمال نصير))
(1) مرايتى القديمة
مرايتى القديمة..

مراية قديمة محطوطه..
بعدى عليها كام مرة .. ف نفس اليوم...
واشوف نفسى ..
دى مش نفسى ..!!
دا حد غريب بيشبهنى ..!!
ومتركب على وشى ..!!
*****
ومر العمر بسنينه..
وأشواكه..وازهاره
ونفس الشكل ما يسبنى ..
وخد حلمى ..
وخد لونى .. وخد نفسى ..
بقينا صحاب .. على إسمى ..
جمعنا الاسم والمعنى..
بقينا لوحدنا ف صورة..
فى لوحة قديمة محفورة..
على قبرى ..
بتوصفنى ..
أنا وسجنى
*****
وبين ساعة .. وبين تانية ..
بحس بغربتى النايمة على قلبى ..
بتوجعنى ..
بحس بحاجة تهمس لى ..
وتدخل جوا أعماقى .. توشوشنى..
تقول فينك ؟؟؟
بتدبل ليه ..؟؟ وفين روحك
دا قلبك نام على ضلوعك..
وفين نفسك .. وفين رسمك
وفين أحلام بتمشى فيك .. ف اوصالك
وفين إنت .. وأيامك
ورحت ف صورة بهتانه
وغبت ف سكة حيرانه
بتهرب فيك..
وتهت أنت .. ف أوصالك
*****
وجات مرة..
كعادتى ببص ف مرايتى ..
ف شكل جديد .. بيضحك لى ..
يقول مبرووووووووووك .. لقيت نفسى
لقيت رسمى .. لقيت جسمى..
*****
من الفرحة نسيت إسمى ..
نسيت كام صورة تشبهنى ..
وروحت لصورتى أحضنها ..
لقيتها فى قلبى .. وبتبكى
وجوا عروفى .. تحضنى..
تقول تانى .. أنا وإنتا
مراية جديدة تجمعنا
أنا النص ال كان تايه .. ومتخبى
أنا القلب ال كان مسجون .. وساجنى
أنا الروح ال بتحرك حياك جواك..
أنا النفس ال كات عايشه .. سنين وياك..
وبينا الف ألف ستار..
وبينا ألف ألف جدار..
وعدت إليك..
وحبك شال .. ستار جواك..
وحن عليك..
*****
بجد قوليلى يا مرايتى
.. أصدق نفسى .. وللا أنتى..
بجد .. صحيح .. لقيت نفسى ؟؟
لقيت صورتى ؟؟
ومن تانى ..
رجعت لروح .. بتعرفنى ..
ومن أصلى
ومن جنسى ومن رسمى..
ويبقى الاسم والمضمون ..
ف توب واحد بيلبسنى..
يعبر عنى .. يوصفنى..
صحيح يا مرايتى من تانى ..
هعيش عمرى .. ؟؟
وأشوف نفسى ..؟؟
ويجمعنى كيان واحد .. أنا ونفسى .. ؟؟
*****

جمال نصير فى 30 اكتوبر 2013


******
(2) الحمل
الحمل

خمسين سنة.. تاهت ف عينى كأنها ..
خدعة سراب..
ما أنا كنت تايه زيكم..
عايش حياتى كأنها ..
من غير حساب
لما كبرت وراسى مالت .. شيبت..
شفت السنين دى كلها ..
سنوات عقاب..
*****
خمسين سنة...
مش حسبة برضه هيـّنه
حتى الأخصّ... ف مصرنا..
اليوم يمر كأنه أطول م الحياة..
مشوار طويل ... مليان حفر
مغموس بنار .. من دمنا
*****
على أى حال ..
موضوعنا ماهوش ف السنين...
.. ولا مُرها..
أيام وبتعدى وخلاص..
بتعدنا ... ونعدها..
موضوعنا بعد العمر دا..
وسنين حياتى ال إتحنت
واتغربت... واتشقلبت..
واتمزقت واتبهدلت...
ولقيتنى عايش وسط عزبة مضلمه
ما كانتش مصر ال إتولدت ف أرضها..
ما كانتش دوله لوحدها..
كانت يا دوب عزبة صغيرة ف إيد (حَمَل )...
*****
كان (الحَمَل...) مرسوم لنا ف صورة (أسد...)
لو حد قرب جنب منه ... يخطفه ..!!
أو ع الاقل .. فشعر ريشة ... ينتفه...!!
وفضلنا ننفخ ف الحَمَل..(قصدى الأسد)..!!
وبنينا له جوّا القلوب... غابات كتير..
يمكن يحن بحالنا ..
يمكن ينكسف...
بس الأسد.. (قصدى الحَمَل) !!
من جهله صدق كدبنا..
شفناه أسد .. فعمل أسد
من ضعفنا .. شفناه كبير
رغم انه جاهل والزمن...
كتب الشهادة ف صفحته
(إنسان حقير ...)
فرعن ..وعايز ...
يتعبد ..
بس ال يكبر بالضلال...
لازم يجيه يوم ...
يتجلد
لما إفترى...
بان وإنكشف...
زى الفران .. ساعة الهدد
*****
لما خلصنا من الأسد ..
(قصدى الحَمَل)
طيب ومين صاحب الحَمَل ..
(قصدى الأسد)..؟؟
ما هو كل حيوان تلجمه...
ليه برضه صاحب يحكمه..
وكات الحقيقة المرعبة...!!
إن الحَمَل ....
له ناس كتييييييييييييييير ...
(أقصد دول)..
عماله تعلف ..( قصدى تحكم ) .. فيه وهو م الهبل...
موهوم بإنه إله كبير...
جاله الخبل...!!
*****
وبقدرة الله الصمد
قامت زلازل ف البلد ..
(قصدى الدول)
والعالى طاح وسط التراب..
والواطى طاح .. بين الخراب
عمال يبص من الهباب
إزاى هيرجع للبلد...
زى الفيران ... من غير عدد..
وساعتها بس عرفنا مين هى ( الدول...)
*****
جمال نصير .. ابريل 2012
*****
(3) عذرا سيادة الرئيس
أنا أهطل...
بقيت كلمة على لسانكم...
نسيتوا إن فيه (عادل) مراقبكم..
نسيتوا إن فيه ( جبار ) يحاسبكم..
*****
أنا المعتوه .. وحاكمكم !!
وفوق راسكم..
وكل الكره ميعشش ف أوصالكم...
هدوس أكتر
وكل الجُبن ما يصغّر فى أمثالكم...
هكون أكبر
وكل ما تظلموا روحكم
هكون أطهر
*****
أنا أهطل
عشان الكرسى كان حلم الكتير منكم ...
وحارقكم
عشان واحد ...بسيط منكم ... ومن طينكم
عشان الوهم جواكم ... بيخدعكم
عشان الجهل ماليكم .. يلمعكم
عشان ال قضى عمره ..سجين عايز ..
يحرركم
عشان انتو.. رضيتوا الذل فوق راسكم
وصار ف جبينكوا ... يوصفكم
*****
أنا أهطل..
عشان شفتوا السجون فضيت ..
وفيه أوباش وناس بجحة .. هنا كترت
وفيه بشوات .. بتحكمكم
وفيه أسوار... تلف وتصنع الغابة ... تسوركم !!
*****
أنا الأهطل...
عشان الشعب إختارني
عشان الطيبة ف المصرى .. بتعشقنى
عشان الأصل.. مصراوى ..و إسلامى
أنا مش رمز للشيعى
ولا السكران .. ولا القبطى
أنا مسلم .. ونورانى
أنا مش رمز علمانى
*****
أنا الأهطل ..
فيبقى الشعب دا أهطل
عشان إختارنى بالفطرة
لا يوم تاجرت بهمومه
فلازم فطرته فسدت ..
ولا عمرى .. فى يوم سممت أحلامه
فلازم نظرته ضعفت ..
ولا عمرى .. سرقت الارض والميه
من الشعب ال نايم فى العسل يشتم
فلازم (.......) ظهرت !!!
*****

أنا أهطل..
فيبقى أنت كمان أهطل
دا لو فعلا – سعادتك كنت حقانى-
ولو فعلا – بتعرف حق انسانى –
ولو فعلا – حكمت بعقل عقلانى -
*****
أنا أهطل..
بعلبة زيت .. وكيس سكر
بقيت فوقكم...!!
فيبقى الزيت مع السكر .. بيحكمكم !!
ويبقى الزيت مع السكر.. أصيل عنكم
أنا أهطل..
لان المرشد العاهر !!.. بيرشدكم
فى بار سكران .. معاه النسوة عريانه... بيأمركم
وقاعد جنبه كام أراجوز .. بينهبكم
*****
أنا أهطل..
لان حرقت مصحفكم
زرعت الفُجر فى قلوبكم
منعت أذان ف مسجدكم
وسبت الفن يصنعكم
ويصنع قبح ف بيوتكم
وسبت الظلم يستشرى .. ف محاكمكم
وسبت القهر يتحكم .. ف أرزاقكم
*****
أنا أهطل..
لان عشيرتى – فى المذهب - بتكشفكم
وفيه أخوان .. على قلوبكم .. بتفضحكم
وفيه سجان على الكلمة
وفيه حراس على الهمسة
وفيه إعلام بيخدعكم
وسايب للسفيه يشتم
وسايب للقبيح يكذب
وسايب (للشعير ) يكتب
يقول (أشعار) تفرحكم
وسايبكم .. بحرية بجاحتكم ..
*****
أنا أهطل..
وهفضل رغم أحقادكم ..على راسكم
وهفضل طول ما فيه صندوق .. مخيبكم
وهفضل لو بكيس سكر..
وزيت مغلى على رؤوسكم .. هيحرقكم
*****
يا شعب صحيح نسيت أصلك
.... يا فرعونى ...
رضيت بالذل طول عمرك
ولما الحق صار عندك
رمتنى بطوبة شيطانى
ولما أنا جيت أعلمكم
معانى الحق والعزة .. بترفضنى ..
وقاعد بس .. تعصينى
*****
أنا أهطل..
بقول حسبى
اله الكون .. مراقبكم
ورب العرش إختارنى.. لأحكمكم
و اقول حسبى
وحسب المرشد المظلوم .. ينوركم
وحسب الشاى ..
وكيس سكر ..
وحسب الشعب عند الله.....
هيخذلكم
*****
أنا أهطل ... لكن باقى
لان الشعب إختارنى .. وخيبكم
لان الكل عايزنى .. ورافضكم
لان الله هينصرنى.. ويهزمكم
*****
أنا أهطل ..
وهنسى انكم بشوات .. بمال الشعب مش مالكم
وهنسى انكم بهوات.. على الجهال .. بتعبدكم
وهنسى انكم ادوات .. ف ايد (وقحة ) تحرككم
وهنسى انكم اطفال..
فى إيد (امريكا) تحرسكم
نسيتوا الله .. ومين غيره .. هيهزمكم
*****
جمال نصير فى 20/1/2013
******
(4) كرسى الرياسة

بعض أسرار كرسى الحكم

هو كرسى الحكم أيه ....
أخطبوط .......
وال يغرق فيه ... يموت....
وللا نجم ومستخبى .. ف الظلام......
لو تقرب منه تغرق ... ف السكوت....
*****
هو أيه كرسى الرياسة....
ليها رجفة .. لما تجلس فوق حريرها
فيها عازل .. بين خشبها وبين شعوبها
وال يجلس ينسى نفسه ..
ينسى وعده..
ينسى كل الدنيا بعده ......
*****
هو أيه كرسى الرئاسة ... فى الديوان ....
هو سرك لبهلوان ......
ال يجلس ساعة يطلع له لسان..
فجأة يبقى بدون ودان ..
يلقى نفسه بعد قعده .... مسه جان..
يلقى كل الدنيا جنبه .. مهرجان
*****
وللا سلم .. للهبوط......
وال يركب .. بس ينزل ..
للتابوت...
وللا شربة خمر مرة ......
وال عايز ... ييجى يشرب .. بس شفطة
يلقى نفسه .. ف نفسه .. يضرب
يلقى كل شعب عنده ... زى دفتر..
كل دوره .. فيه يشخبط
مهما نصرخ .. هو يسكت
شلـّى كل الدنيا ... تخرب...
*****
هو أيه كرسى الرئاسة .. كاس هموم ......
وال شايف نفسه تعلب ..
شاف كاسات الهم بركه ... من غيوم
ييجى ويجرب معانا ... كيف يعوم....
حتى لو عام مرة واحدة
مرة تانية راح يدوم......
*****
هو كرسى الحكم خدعة ....هو لدعة..
بس لدعة حية .. عقرب.. ....
زى مسة جن فوق الرأس .. بتحرب ...
هو قعده .. وسط ميتم ...
كل دورك تيجى تندب
هو محرات .. بس يخرب......
و بهموم الشعب ... تكذب
هو دفر شؤم وأنت .. بس تكتب
هو مدفع ... بين جموع الشعب .. يضرب
*****
هو ليه كرسى الرياسة.. له بريق..
لو تشوفه .. فجأة تنشف .. دم .. ريق
فوق تراب الارض تسبح... كالغريق
مش مصدق.....؟؟
روح لموسى... للبرادعى ... أو شفيق ..
روح لحمدين .. مش مبطل من ساعتها ..
صراخ ... نهيق........
*****
هو كرسى .. بس ممكن مرة يوصّل ..
للجحيم
أو يوصّل .. للنعيم
هو كرسى .. بس إبرة ف ظهر نايم
كرسى عايز بس عادل .. أى حاجة الا انه .. قلبه ظالم
عايزه واحد .. مرة حالم..
مرة قاسى زى سيف الحرب .. حاسم
قلب طيب .. مخ عالم
*****
جمال نصير : فبراير 2013
******
(5) واهرب فين
وأهرب فين

وأهرب من دموعى فين؟
واسرح فين بأحمالى
لو اهرب وسط افراحى .. تعزينى
لو اهرب تحت احزانى.. تضمينى
اروح للعود... لصوت الناى
وصوت جيتار .. يواسينى
الاقى دموعى تسبقنى..
تغنينى..
*****
اروح اهرب ورا النجمة..
وتحت الكهف ف الضلمة..
وأتخفى
ف ريش عصفور .. يخبينى
وتحت جناح
من الافراح .. يدفينى
أروح لليل وأشكيله
ظلام دربى
الاقى وحشته القاسية
تاخدنى ف حضنها الناشف
لحزن طويل .. يقسينى
وبرضه هناك ... تفاجئينى
*****
أروح أركب سحاب هربان
من البحار..
من المية..
يودينى .. لصوت الرعد .. يشجينى
أروح للبحر ..يبلعنى
ويحشرنى... فى بطن الحوت .. ليحمينى
يشيلنى الموج على ضهره
ويعمل من ضلوعى شراع
ويغزل من همومى .. دراع
يجدف بيا فى الاعماق
هناك القاكِ يا دموعى .. تلمينى..
*****
طب اعمل أيه
لو أسرح وسط أوردتى
وتحت الجلد من جلدى
وأصبح نقطة من دمى
وحلم خجول على خدى
ورسمة قلب ف كفوفى
وبرضه القاقى يا دموعى..
تواسينى...
*****
لو أعمل نفسى نبتايه
وأغرس فى الصخور جذرى
وامد فروعى ياسمينة
وأطرح ورد للعاشقين
أدس الشوك فى أحضانى
وتصبح دمعتى ياسمين
واصبح نقطة من ميه
وحبة من ندى رطبه
واروى البحر بدموعى
واسقى الطير بوجدانى
لكن القاك على خدى
وجوا الحلق من بقى
بتتهجى حروف اسمى..
*****
فاهرب فين؟؟ واقول يا مين؟؟
امانه مرة يا عمرى .. تودعنى
وتاخد حصتك منى.. وتتركنى
وقول لى بس .. اهرب فين ؟؟
وفين هما البشر عايشين ؟؟
*****
نسيت من قسوة الدنيا
ودقة قبضتك فيا
وزنقة قسوتك ليا
نسيت انى من العايشين
نسيت ان البشر ... جنسى
نسيت ان الفرح .. طبعى
نسيت حتى الكلام اللى..
بيوصف كلمة الافراح..
وماشى فى الحياة .. سواح..
لحد ما القى لى مهرب..
ياخدنى .. حتى من نفسى..
وأهرب ايوا.. لا .. ههرب..
وأموت حتى بدون مطلب..
منايا بس ف الدنيا..
أعيش لحظة ..
يا دوب لحظة .. مع الفرحة
*****
جمال نصير فى 9 اكتوبر 2013

العامية لغة بنت العربية

النص الأول :
الشعب يريد حاكم ثوري محكوم
إنْ كنت ناوي اليوم تختار
النص الثاني :
اسمعني يا صاحبي !
كتبت هذه القصيدة العامية في ابريل 2008 في منتدى قناديل الفكر والأدب
الدنيا عماله تحدفك ياصاحبي ف وش السيل
وانت ما بتتحرك ولا تنطق وهي بتكيل لك كيل
انت أخرس , واللا عاجز قلت:اتهد مني الحيل
قعدت أضحك وافكر ياترى اللي جرى م الشيل؟!
من الهم اللي ملاك وخلاك ضعيف ومايل ميل!!
ولفيت حواليك أدور أشوف السبب لقيت لك ديل!
******

أنا كنت زيك زمان في بلدي لكني عملت عمليه
قمت مع صحبي عمر وسامي وأحمد وسعديه
ودول نماذج شربوا من النيل وروتهم الميه
عزموا على الخير وشافوا أمامهم أحلى أمنيه
ليه مانكسرش الحجر بعزيمة صلبة وأبيه
وسط الليالي العتمه ورود بتعرق ريحه عطريه
وقفنا نزرع نعمر وننتج في أرضنا الخصبه العفيه
*******

لا قلنا ليه؟ ولا مين السبب ؟لا انت ولانا ولا هيه
ورعرع أملنا في الغيطان طرح سنابل قمح ذهبيه
والسيل ده أصبح جداول بتروي وتقول للدنيه ياغبية
أوعي تكوني في يوم على الغلابه قاسية وعفية
دا اللي نوى أفراح من شباب ويا صبايا غنى أغنية
وردد ورانا الحمام طرح السلام تحت الشجر يابهية


وانت يا صاحبي اقطع الديل....
وقوم بقى اعمل العملية

*********
محمد فهمي يوسف

رحاب فارس بريك

امي
***