تويت
الطـب في زمـن الكوليــرا
الطـب في زمـن الكوليـرا
..عندما كنت بعد طبيباً في مقتبل العمر تلقفتني أياد العديد من الزملاء الأكبر سناً والأكثر خبرة؛ ليعلموني أصول ممارسة الطب..وكنت كالغر الساذج ..صفحة ناصعة البياض يكتبون فيها ما يشاؤون وينقشون في مخيلتي البريئة حصاد نفوسهم المريضة وخبراتهم الفاسدة - لكني ألتمس لهم الآن بعض العذر - فلربما الذي دفعهم إليها الحوج والحاجه التي هي أم الاختراع. تبناني أحدهم (رحمة الله عليه) وبدأ يبث فيّ أول سمومه – عفواً أعني دروسه- في الطب الحديث..!!
- شوف بقي يا دكتور.. أهم حاجه إنك تروح تستلم في أي وحده صحيه نائيه..في آخر الدنيا وتقعد هناك..لا هتحتاج تروح الخليج ولا دياوله..الناس هناك معاها فلوس كتير بالزوفه.. وبيتنشأوا على دكتور ملحلح وفهلوي..يعرف إزاي يضحك عليهم..وهما هيدفعوله دم قلبهم.
تعجبت وسألته قائلاً:
- طب مادام معاهم فلوس كتير زي ما بتقول ..ليه ماينزلوش أقرب مدينه ويتعالجو مع دكتور كبير..؟!
ابتسم ابتسامة عريضه , وقال في ثقة العالم ببواطن الأمور:
- لا ما هما بيعملو كده فعلاً طول الصبح.. لكن من بعد المغرب هما ملكك.. ومافيش حد يصّجر يطلع بره البلد..لإن مافيش مواصلات ..والطريق بيبقى مقطوع ..ولا فيه صريخ ابن يومين.. فبيبقم مضطرين لك..حتى لو عارفين إنك لسه دكتور جديد ..ومبتعرفش أي حاجه..!!
نظرت إليه في عتب , فاستدرك قائلاً:
- لا أنا مش قصدي حاجه ..لا سمح الله..!! بس ماهو أي دكتور تكليف بيبقى معندوش خبره..وبعد شويه بيتعلم في الناس ..وبيعرف إيه اللي يريحهم..وإزاي يعرف يكلفتهم ..ويخليهم يقتنعو بيه .. واذا دخل دماغهم.. بيبقى يا هناه وياسعده.. هيشوف اللي ماشفتوش رقاصه في شارع الهرم.. والفلوس هتنزل عليه زي الرز.. وهيبقى إله الطب عندهم.. والبلد كلها هتتعالج عنده من كبيرهم لصغيرهم.. والكلمه اللي هيقولها لهم..عمرها ما هتنزل حتى لو راحوا لأستاذ في كلية الطب.. كلامه هوا اللي هيمشي ..وهيبقى مصدق عندهم حتى ولو مالوش أي أساس علمي..!!
رفعت حاجبي في دهشة , وهممت أن استفسر منه, فاستطرد قائلا:
- شوف بقى ياسيدي.. أهم حاجه إنك تعمل لنفسك برستيج.. وتغلي الكشف بتاعك..آآآه..عشان مايستقلوش بيك .. ويقولو إنك دكتور صغير.. كل لما يتلسعو في الكشف ..كل لما يصبروعلى العلاج.. وميرحوش يكشفو عند حد تاني .. وإياك تجامل حد وترجع له الكشف.. حتى ولو كان أبوك..!! وإلا هيطلع من عندك ويروح لواحد تاني هيدفعه دم قلبه.. كمان تقل أيدك في الدوا..الناس بتقيم الدكتور بقيمة الروشته بتاعته..كل لما بتبقى تقيله..وفيه أصناف غاليه.. وأسامي مش معروفه..كل ما بيقولو عليه دكتور قاري و شاطر..
قاطعته قائلا:
- مش المفروض إن انا أديهم أدويه من الوحده..؟!
قهقه قائلاً:
- أدويه إيه إللي موجوده في الوحده من أساسه..؟! إنت قصدك على شوية السلفا والأسبرين..والتتراسيكلين ..ودوا المغص والحساسيه ..وطارد الديدان ..وحبوب البلهارسيا ..؟! دا إذا لقيتهم أصلا موجودين..!! أصل الطلبيه بتخلص من أول يوم .. أو إنت بتبقى ماضي على العهده.. ومبتستلمش حاجه..والموظفين هما اللي بيقومو بتسديد الدوا على تذاكر العيانين..!!
سألته حائراً:
- طيب ماهوه ..في تذاكر للعيانين ..أمال بيتكتب فيها إيه..؟!
أجابني في ضيق , وهو يتعجب من غبائي ,ومحدودية أفقي:
- مبيكتبش فيها حاجه..!! إنت بتقنع العيان أن الدوا اللي في الوحده مضروب .. ومش هيخففه .. وإن احسنله يشتري دوا من بره.. و بعدين تبقي تتسلي بالليل تكتب على التذاكر ..الأدويه اللي إنت عاوزها عشان تسدد العهده اللي عندك في الكشوفات..!!
فنظرت إليه في بلاهه , وسألته:
- طب والأدويه دي كلها أصلاً راحت فين..؟! مش المفروض إنها وحده حكوميه..ودي عهده..؟! والمفروض أديهم دوا من الحكومه ببلاش..!!
ضحك بشده حتى دمعت عيناه , وقال لي بنفاذ صبر:
- إنت لسه صغير .. وشكلك مش عارف حاجه..؟! لما تروح الوحده ..هناك هتعرف كل حاجه.. هتلاقي موظفين عارفين كل حاجه.. و مظبطين أمورهم من سنين ..وأي دكتور جديد بيعلموه الفوله.. وبيفطموه على كل حاجه.. الأدويه بتتباع بره في البقاله.. وللصيدليات.. ومزارع الفراخ والمواشي..دا غير اللي بيتعطى هدايا للعمده ..والغفره.. والعساكر.. وظباط النقطه.. ومدير المدرسة ..والباقي ساعات بيتعطى للي بيقطع كشف خصوصي نفحه من عندك..
سألته مستغرباً:
- يعني ايه كشف خصوصي..؟! مش المفروض أن الوحده مجانيه ..طول فتره العمل الصباحيه..؟!
أجابني في حنق:
- إنت باينّك مش عارف حاجه خالص.. وهتتعبني معاك..!! مجاني إيه ياعم..؟! كل الناس بتقطع تذكره بفلوس .. والفلوس دي بتروح للحكومه ع الفاضي.. لكن الناس من نفسها بتدفع كشف خصوصي عشان تهتم بيها ..وتعملها اللازم.. وكله بتمنه.. بتكشف عليهم مظبوط .. وبيستفيدو من الأدوية الموجوده.. والمعمل ..وبيعملو أشعه ببلاش.. و بياخدو خدمه مخصوص.. زي اللي بيلاقوها بعد الساعه 12 لما بيجولك السكن يكشفو..
فتحت فمي ببلاهه , وسألته:
- هما كمان هيجوني السكن.. واشمعني بعد الساعة 12.. مش مفروض الشغل لحد الساعه 2..؟!
زفر بضيق:
- لا الشغل عندنا بيبتدي الساعه 10 .. وشباك التذاكر بيقفل الساعه 12.. إلا طبعاً لو كان جايلنا تفتيش..بس دا مبيحصلش كتير .. مره ولا اتنين في السنه .. وساعات مبيجيش .. بس البركه في حبايبنا في الإداره الصحيه .. بيبلغونا قبلها بكام يوم.. فنكون مظبطين كل حاجه.. حتى العيانين نفسهم.. ثم إنت من حقك تكشف بعد مواعيد العمل في الوحده .. وتقلبها عياده خصوصي..مش كفايه إنك قاعد في البلد .. ومزوغتش زي باقي زمايلك إللى .. مبيروحوش خالص في الأماكن التانيه..!!
ثم هز رأسه لينفض تلك الأفكار , و استطرد قائلا:
- متضيعش وقتنا ..وخليني أقولك الكلام المهم.. إللي هيخليك دكتور شاطر.. والناس كلها تحكي.. وتتحاكي بيك..
بان عليّ الاهتمام , واصغيت إليه في شغف بكل جوارحي..فأردف قائلاً:
- شوف ياعم.. أهم حاجه إن العيان يدخل عندك تعبان ..يطلع مرتاح..
شردت مفكراً..في ذاك الذي فسر الماء بعد الجهد بالماء:
- ماهي دي رسالتنا..إننا نعالج المرضى.. ونبذل كل جهدنا عشان شفاؤهم..
فقاطعني صوته قائلاً:
- أهم حاجه إنك تديله حقنه.. أي حقنه.. إنشاله حقنه ملح ولا جلوكوز.. أهم حاجه إنه يحس انه خد اي حاجه..هتلاقيه بيقولك تسلم إيديك يا دكتور.. وطالع يدعيلك ويصيت لك في وسط العيانين..!! أهم حاجه تريح الزبون.. والزبون دايماً على حق.. يعني إللي جاي وعاوز محاليل ..مش هيخف إلا لو علقتله محاليل..واللي عاوز رسم قلب..أعمله رسم قلب.. حتى لو مبتعرفش تقرأ رسم القلب.. وياسلام لو تجيب لك جهاز كومبيوتر بشاشاه مغلوشه.. وتقولهم انك بتعملهم أشعه تلفزيونيه.. وتخليهم يشوفو بعنيهم الأميبا وهيا بتلعب قدامهم.. والديدان وهيا بتتلعبط في معدتهم.. هما بيحبو الحاجات دي.. وبيطلعو يحكو للعيانين اللي بره.. ويروحو البيت يقولو لقرايبهم وأهاليهم .. دا الدكتور وراني كل حاجه.. وشفت بنن عيني ..محدش قالي..!!
قاطعته لأول مره قائلاً بتأفف:
- بس ده يبقى نصب..؟! أنا كده بضحك على الناس وبستغلهم.. وبتاجر بجهلهم.. ومرضهم..!!
نفر فجأة , وهب واقفاً, وقال غاضباً :
- إيه الكلام الكبير اللي انت بتقوله ده..؟! نصب إيه ومتاجره إيه..؟! إنت عارف إنت لو قلتله إنت معندكش حاجه مثلا ..هيعمل فيك إيه..؟! هيقول إنك دكتور مبتفهمش حاجه.. ومبتعرفش حاجه..هوا جايلك ومقتنع إنه عيان.. وعاوزك تأكد كلامه بس ..وأي حاجه هتديهاله بعد كده ..هيصدقك ويخفّ.. شفت إنت إزاي شفيته وعالجته من الوهم.. مش هيا دي رسالتنا اللي عمنا أبوقراط علمهالنا.. نص المرضى اللي هيجولك معندهمش حاجه.. بس حالات نفسيه.. والمطلوب منك إنك تاخدهم على راحتهم وتعالجهم..والنص التاني بيكونو مرضى مزمنين .. بحق وحقيق .. وبيكونو لفو على ميت دكتور غيرك ومخفوش برضو..يبقى إنت لما تريحهم نفسيا ممكن حالتهم تتحسن..ولو مخفوش أهو هيبقى زيك زي غيرك ..وهيروحو لدكتور تاني بعدك..!!
ثم صمت لبرهة وكأنه تذكر شيئاً مهما ,فاستدرك قائلاً:
- على فكره ..لو فرضاً جالك واحد وكان كاشف عند دكتور تاني ..لازم تعيب في العلاج بتاعه..حتى ولو كان مظبوط.. وكنت هتكتبله نفس الأصناف..!! اختار أسماء شركات تانيه عشان ميخدش باله.. وفي الغالب هيخف بعد كام يوم.. نتيجه مفعول الدوا الأولاني اللي مصبرش عليه.. وهيفتكر إنه خف من الدوا بتاعك.. بس حاول متعيبش في زميلك بشكل فيج ..و أوفر .. عشان ميشكش فيك.. قوله مثلاُ انه مخدش باله من التشخيص..معملش فحوصات.. نسي يكتب الدوا الفلاني.. يمكن كان مشغول .. وكبر وبقي بينسي.. وأقعد شكر في نفسك.. وأنك يا ما عالجت حالات حار فيها أساتذه في كلية الطب .. والمرضي كتبولك رساله شكر .. ومافيش مانع تعلق عندك في العياده كام قصيدة شكر فيك .. وكام شهاده تقدير..على كام شهاده بالإنجليزي ..حلوه ..بتعمل شغل كويس..
ثم صمت لبرهة تمنيت فيها أن يكف عن الكلام نهائيا بعدما أصبت بالغثيان من هول ماقال , لكنه استأنف الحوار قائلاً:
- وأهم حاجه إنك تظبط مع كام معمل .. إنهم يظبطولك التحاليل.. ويظبطوك وكده.. يعني إنت مثلاً تقول أنا شاكك في كذا ..يروحو المعمل أو لبتاع الأشعه ..الراجل اللي هناك يقولهم نفس الكلام بتاعك ويثبتهم.. وكمان تتفق مع إللي واقف في الصيدليه.. اللي جنبك يسيطك قدام العيانين.. ويشكّر في روشتاتك .. وتعملك كام تركيبه بالاتفاق معاه..على كام وصفه فيها تحبيشه من كل حاجه.. تجيب مفعول على طول.. وتقول للعيان روح للصيدليه الفولانيه عشان بيعمل التركيبه بتاعتي..ويكون طبعاً لك نسبه في كل روشته بيصرفها من عنده.. وكمان تربّط مع مندوبين شركات الأدويه أنك تأخد نسبه من الأدويه الغاليه بتاعتهم اللي بتكتبها.. دا غير العينات والهدايا والسفريات اللي هيطلعوك على حسابهم.. وتقول للناس وقتها انك كنت في مؤتمر طبي.. أو بتحضر زماله أو دكتوراه..!!
فنظرت إليه طويلاً بأسى..ثم أوليته ظهري ,وانطلقت مغادراً , ولم أنبس ببنت شفة. فناداني بعلو صوته ساخراً:
- إنت رايح فين يا داكتوووووور..؟!
فأجبته دون أن التفت إليه:
- رايح أشوف لي عقد عمل في الخليج..!!
وإلى اللقاء في الحلقة القادمة .. الظاكتووور
تعليق