حذاء يهز عروش: رباعيـات

**د/ أحمد الليثي** · 17-12-2008, 14:32

النعل صنعة إيد ملفـوفة ياااه في حريـر
والشاب شاب أصيل، راجل من المغاوير
قام بنعــله ورمى .. وياما نعــال هتطير
في وش نطع خسيس طالع من المجارير.

**د/ أحمد الليثي** · 17-12-2008, 14:33

فيه جزمة للظلم والإذلال
وجزمة تمشي في الأوحال
وجزمة ما تسوى نص ريال
وفيه جزمة على الرؤوس تنشـال.

**د/ أحمد الليثي** · 17-12-2008, 14:33

حط الجزمة يا عم ف متحف
رش عليها م الورد وصُب
جزمة حر شريف ولا أنضف
خلَّى عروش الدنيا ف رعب.

**د/ أحمد الليثي** · 17-12-2008, 14:34

شفت الجزمة وهي تطـير؟
شفت كرامة وعزة وأصـل
شايلة الجزمة و ع الطراطير
كانت الجزمة دي كلمة فصل.

**د/ أحمد الليثي** · 17-12-2008, 14:34

والله دي جزمة مقامها كبير
جزمة اتخلقت ويَّا رسالة
أقوى سلاح دكّ وتدمـير
عارفة طريقها لوش حثالة.

**د/ أحمد الليثي** · 17-12-2008, 14:34

صرخ الحـر كفاية خيانة
وقلع الجزمة وزي الدانة
صوِّب اضرب في الأكلانة
أصل مقـام الكلب إهـانة.

**د/ أحمد الليثي** · 17-12-2008, 14:35

خد عندك يا ابن المـراكيب
ودي وصمة وعمرها ما تغيب
جزمة حـر ووطيت منهـا
عقبى للجزمة اللي تصيب.

**د/ أحمد الليثي** · 17-12-2008, 14:35

بيقولوا دا بوش في أزمة
وخلاص مالوهش لازمة
بييجي له كابوس، ويصرخ
العلبة فيها جزمة ... العلبة فيها جزمة.

**د/ أحمد الليثي** · 18-12-2008, 13:41

[align=center]فيه ناس تشيل المُر وتعمله حِزَم
وترضى بأقدارها ولا ف يوم تنهَزَم
وراسها تعلى على كل البشر
وما للخسيس عندها إلا ضرب الجزم.[/align]

**وائل عبد السلام محمد** · 18-12-2008, 14:53

هى َ حقيقة من غير شك
إن الجزمة رباطها إنفك
راحت قاصدة دماغ مهووس
وبَقِت الجزمة سلاح للفتك .
*************
وائل عبد السلام محمد

**سليم محمد غضبان** · 18-12-2008, 16:29

بوط منتظر بوط كويس
ما بيضرب الاّ في الريس
ريسهم هُمَّ مش إحنا
و من يومها و هو في مِِِحنة

**جلال فكرى** · 18-12-2008, 16:31

أصل الجزمة سلاح معقول
خللى كل الدنيا تقول
إن الكلب لازم يتأدب
ويبطل يسرق بترول

**جلال فكرى** · 18-12-2008, 16:33

أصل الواد بوش ده لسه عويل
مستعفى و عامل عنتيل
قام منتظر لسعه الفرده
خللى الدنيا تقول مواويل

**جلال فكرى** · 18-12-2008, 16:40

لو كانت الجزمة دى تتكلم
وتقود أهل الدار و تعلم
إن جهاد العربى ضرورى
وعمر الاستسلام ما يسَلِم

تعليق