تويت
عــــودة هنـــداوي
عــودة هنــداوي
.. بعد مرور تسعة أشهر عجاف, و ولادة متعسرة لنور الفجر . قرر (هنداوي) أن يخرج عن صمته الذي طال ؛ ظناً منه أن دوره قد انتهى , و أن الثورة قد شقت طريقها, لكنه وجد أنه ارتد ثانية إلى الخلف. و عاد إلى نقطة الصفر. جلس (هنداوي) على المصطبة مستنداً إلي الحائط , ممسكاً بكوب من الشاي في يده . ثم قال بعد أن رشف رشفة كبيرة محدثاً صوتاً عالٍ:
- مافيش فايده..!! الناس دي مش عاوزه تفهم أبداً..؟! يعني نروح نقلعلهم ملط في الميدان.. عشان يقولوا هنداوي اتجنن تاني..!! نعملهم ايه بعد كده..؟! سبناهم يحكموا ويتحكّموا.. قلنا معلش ماهم ولادنا برضو.. قالو نعمل انتخابات الأول قلنا و مالو.. مايزعلش حد .. قالوا دستور.. قلنا دستور ياسيادنا.. قالوا فلول.. قلنالهم هاتوا اللي تجبوه.. و الله مابتفرق معانا الأسماء.. قوم بعد دا كله.. يموّتو ولادنا اللي نفدو من الموت الأولاني..؟! قال هي ناقصه..!! ولا يعني هما بيستقوو بس على الضعفه..؟! آه مهو أصل الكتره تغلب الشجاعه.. الله طب مش أحنا الأكتر برضو..؟!
ثم نظر فيمن التفوا حوله من الفلاحين البسطاء, فوجدهم قد فغروا فاههم, و جحظت أعينهم , ينظرون إليه في بلاهة. فاستطرد قائلاً:
- أنا نفسي أعرف بس.. هما عاوزين منّا إيه..؟! يعني هما عاوزين البلد تخرب..!! ولا عايزنا نهج ..و نسبلهم البلد.. يعني تبقى البلد بلد أبونا.. والغُرب يطردونا.. طب أمال إيه لزمتها الانتخابات.. و المؤتمرات في التلفزيونات..؟! و الكلام الكتير .. إللى بقى مفيش أكتر منه.. زي الهم على القلب.. ماهو كل حاجه رجعت تاني زي الأول ..و أسخم..!!
تلفت حوله في تعجب , ضاربا كفاً بكف , ثم قال متسائلاً :
- حد فيكم ياولاد .. فاهم حاجه في الانتخابات..؟!
فهزوا جميعهم رؤسهم علامة النفي , فضحك قائلاً:
- مأنا بقول كده برضو..!! يعني الناس اللي بره حتصوت ولا لأ..؟! إذا كان محدش من اللي جوه ..عارف إن الانتخابات هتتعمل من أصله ..!! و لو هتتعمل.. هتتعمل أمتى..؟! ولو عرفنا أمتى.. هنصوت ازاى..؟! و مين إللي هيحميها..؟! إذا كان حاميها حراميها..!! طب القاضي هيعوضوه بمليون جنيه لو مات.. أمال الشعب مين إللي هيعوضه..؟! وهيجيبو الفلوس دي كلها منين..؟! آآآه ماهو أكيد من قفا الشعب برضو..!! طب إيه بقى كان لزمتها.. إذا كنا مش عارفين هنتتخب مين أصلاً..؟! و بعدين مهما همه .. اللي كانوا بينزلوا كل مره نازلين تاني..!! أمال بيقولوا ليه إن كل حاجه هتتغير بعد الثوره..؟! أنا شايف كل ولاد فرحات باشا.. نازلين قوايم ..و نوايم .. فئات و مستقلين.. دا حتى بناته ..و أجوازتهم نازلين كمان..!! أهو لو دا مكسبش.. غيره يكسب..!! و ولادنا ياعيني غلابه .. ممعهمش حتى يدفعو تمن الاشتراك..!! طب كان إيه لزمتها الهوسه دي..؟! الله يرحم أيام زمان.. كان الواحد صوته بيتحط .. وهو نايم في البيت.. مستريح أربعه وعشرين قيراط .. ولا شايل هم أيوها حاجه..!!
يتبع إن شاء الله
تعليق