عــــودة هنـــداوي

**منار يوسف** · 02-12-2011, 16:10

يا سلام على هنداوي
فصيح بصحيح
عجبتني آرائه خصوصا حكاية ألغاء وزارة الداخلية
هما بيتغروا على ايه و سايبنا في انفلات امني و بيذلونا كل يوم
هنداوي جاب الحل اللي يكسر أنفهم
كمل يا هنداوي
واضح أنك بتفتح جروحنا و بتعرف تلاقي العلاج
و سلم لي على البقرة بسنت

شكرا دكتور اشرف
متابعين معك حكايات هنداوي
بس ياريت بلاش تقنعه يرشح نفسه لرئاسة الجمهورية و ينافسنى
أنا ما صدقت لقيت كام صوت فدائي بيشجعني

**د .أشرف محمد كمال** · 02-12-2011, 18:18

المشاركة الأصلية بواسطة فايزشناني مشاهدة المشاركة

الصناديق مش كل حاجة يا عمنا هنداوي
ممكن تلاقي بلطجية من نوع تاني
مبروووك على الحبر الفسفوري ببلاش
احنا ما نعرفوش إلا في اوقات محددة
حلوة الحكاية مش كدة
يمكن تتعثر الولادة شوية بس مصر ح تنجب ديموقراطية ديلوكس
حنشوف النهاية ايه يا هندوي
بس لازمن تكملو للآخر ولا تخلوش حد ياخد صواتكم
ده صوتك يبقى ملكك وتديه للي ح يمثلك في البتنجان " البرلمان "
فلاح وحتبقى فلاح يا هندواي ..... والله يعينك
مش كده برضو يا دكتو أشرف
سلامي لكل المصريين

أنتم معندكوش حبر فوسفوري يا فايز يا أخويا في سوريا
لو عايز نبعتلكم شويه ولا أنتم مش محتاجينه
على رأيك الحل في البتنجان
وأخونا سليم شايفه في البرطمان
بس أنا شايف إن لما يبقالك صوت
أحسن من السكوت
فالساكت عن الحق شيطان أخرس
أينعم آني فلاح وهأفضل طول عمري فلاح
عشان الفلاح هو أكتر واحد يعرف قيمة الأرض
دمت بود يا صديقي وسلامي لك ولشعب سوريا الباسل

**د .أشرف محمد كمال** · 02-12-2011, 18:24

المشاركة الأصلية بواسطة منار يوسف مشاهدة المشاركة

يا سلام على هنداوي
فصيح بصحيح
عجبتني آرائه خصوصا حكاية ألغاء وزارة الداخلية
هما بيتغروا على ايه و سايبنا في انفلات امني و بيذلونا كل يوم
هنداوي جاب الحل اللي يكسر أنفهم
كمل يا هنداوي
واضح أنك بتفتح جروحنا و بتعرف تلاقي العلاج
و سلم لي على البقرة بسنت

شكرا دكتور اشرف
متابعين معك حكايات هنداوي
بس ياريت بلاش تقنعه يرشح نفسه لرئاسة الجمهورية و ينافسنى
أنا ما صدقت لقيت كام صوت فدائي بيشجعني

أطمني هنداوي أعلن في مؤتمر صحفي على قناة الحصيرة مباشر مصر
إنه مش هيرشح نفسه للرئاسة وأنه هيرشح الفستان البمبي
وبعدين بسنت بتسلم عليكي وبتقولك أنها جاموسه مش بقره
عشان بيني وبينك هيا بتزعل من الحاجات دي..!!
أشكرك أخت منار ويسعدني متابعتك
دمت بود

**د .أشرف محمد كمال** · 03-12-2011, 13:47

عــودة هنــداوي (5)

(5)

.. تفهم المراسل الصحفي وجهة نظر (هنداوي) , و سأله مستزيداً :
- و هتعمل إيه تاني .. ياعم هنداوي..؟!
أجابه مسترسلاً :
- تاني هام .. هأعمل بيت مال.. عشان أخد من الأغنيا .. و أعطي للفقرا .. يعني بدل ما الزكا تتوزع بمعرفة كل واحد .. و نفسه.. لأ .. الحكومه تجمعها من الناس .. و توزعها بالعدل على المحتاجين .. و تعمل بيها مشاريع .. و مساكن .. و مستشفيات.. و مدارس.. و طرق.. و ملاجئ أيتام .. و دار للمسنين.. أصل البلد دي فيها ناس عايشه كويس .. و ناس كويس إنها عايشه..!!
اندهش الرجل من أفكار (هنداوي) ,و سأله مستفسراً:
- يعني أنت عاوز تعمل .. وزارة تضامن اجتماعي..؟!
قاطعه (هنداوي) قائلاً:
- لأ يا بيه .. تكافل..!! كل واحد يكفل غيره.. الغني يكفل جاره الفقير.. و الشارع يكفل بعضه.. و القريه تكفل أهاليها.. و المحافظة تكفل نفسها.. و البلد تراعي الكل.. و متفرقش بين ريف و حضر.. بحري و قبلي.. مسلم و مسيحي.. كلنا واحد .. زي بعض ..أولاد تسعه .. و أمنا هيا مصر..
سأله المراسل متعجباً:
- طب مادي نفس فكرة الضرايب.. يعني أنت عاوز تزود الضرايب على الشعب..؟!
أجابه مستنكراً:
- يا سابل الستر يارب .. لا يا باشا .. ضرايب إيه كفانا الشر..!! دا حتي أسمها بيحبس الدم.. أنا بقولك زكا.. كل واحد بيزكي عن ماله .. و عياله .. عن صحته .. و عافيته.. يعني إللي بيزرع.. يطلع زكا عن محصوله .. و إللي بيبيع .. يطلع زكا عن تجارته.. و إللي بيشتغل.. يطلع زكا عن ماله .. و إللي بيصنّع .. يطلع زكا عن إنتاجه.. دا حتي إللي بيصوم .. بيطلع زكا عن صومه..!!
فسأله الرجل بنفاذ صبر:
- طيب إزاي هتنفذ دا كله .. ياعم هنداوي ..؟! أنت هتجبر الناس يدفعو كل ده .. غصب عنهم..!!
أجابه علي الفور :
- لا يا باشا.. مافيش غصب .. ولا أيوها حاجه..!! كل واحد هيدفع بخُطره.. و من ضميره.. لما يحس إن فلوسه دي لله.. و راحه في مكانها.. مش هتتسرق.. ولا تتسفر بره .. في بنوك سويسره .. و أدينا شفنا أهوه .. إن الحرام مابينفعش .. و أخرته هتبقى في طره.. عملوا إيه أصحاب الملايين بفلوسهم الحرام..؟! آخرتهم ناموا على البُرش.. أو هيتدفنو تحت الأرض .. في حفره متر في متر.. ماهينوبهم غير حتة قطنه.. و كفن من غير جيوب.. و حسابهم عند الحي الذي لا يموت.. علام الغيوب.. ربنا يستر علينا .. و على ولايانا.
فسأله في خبث:
- طيب ..و المسيحيين هما كمان هتدفعهم زكا..؟! ولا هيدفعو الجزيه.. زي مابيقولو السلفيين..!!
ابتسم (هنداوي) , و قال في سماحة:
- يابيه متعومش على كلام الجماعه التانيين.. إحنا كلنا أخوان .. و مصريين.. في مركب واحده.. و البيت لاذق في البيت.. متقدرش تفرق بينّا إحنا الأتنين.. و إللي هيسري على المسلمين .. هيسري على المسيحيين.. و الخير هيعم على الجميع .. أصل الطوفان لما بيجي .. مبيفرقش بين الغرقانين.. و لازم كلنا نكون مستعدين .. و أيد واحده على المعتدين..!! قول آآآمين.

يتبع

**د .أشرف محمد كمال** · 06-12-2011, 16:51

(6)

تمادى المراسل الصحفي في سخريته , و سأل (هنداوي) :
- طيب قولي .. هتعمل إيه في التعليم.. ياعم هنداوي..؟!
أجابه (هنداوي) على الفور:
- هالغي الثانوية العامة..!!
قاطعه الرجل ضاحكاً:
-هاتلغي الثانوية العامة مره واحده..!! أمال الناس هتدخل الكليات إزاي..؟!
أجابه (هنداوي) في أسي:
- ماهو أصل الثانويه العامه دي بقت زي البعبع.. كله خايف منها .. وعاملّها ألف حساب.. و البيت إللي عنده حد في الثانويه.. زي اللي مقتوله قتيل ..عايشين في هم بالليل ..و مذله بالنهار.. قوم لو لغيناها ..و خليناها سنه عاديه.. زي أي سنه.. خلاص .. يبقى شيلنا حمل كبير من على الطلبه و أهاليهم..!!
قاطعه مستفسراً:
- بس أنت كده .. هتخلي كل السنين تبقى ثانويه عامه.. و الدروس الخصوصيه هتكتر..!!
استدرك (هنداوي) قائلاً:
- لا.. يا سيدنا.. أنا مش قصدي كده خالص.. أول هام إللي عاوز يدخل الطب.. لازم يدرس من أول الثانوي.. المواد اللي تساعده .. في الكليه.. لو نفع فيها يدخل من غير مجموع ولا يحزنون.. و إللي عاوز الهندسه نوبه.. يدرس المواد إللي تجهزه أنه يبقى باش مهندس .. و هلما جره يعني من الأول.. نعرف امكانيات.. و مواهب كل واحد.. عشان يدخل الكليه إللي تناسبه.. و كل أب يعرف مستوي إبنه..!!
أومأ المراسل برأسه قائلا:
- و الله فكره ياعم هنداوي.. و إيه كمان..؟!
أجابه (هنداوي) في حماس:
- هألغي مجانية التعليم..!!
نظر إليه في ذهول ؛ كمن رأي مجنوناً , و سأله دهشاً:
- بقى معقول أنت إللي تقول حاجه زي كده.. بعد إللي عمله جمال عبد الناصر.. و خلى كل أولاد الفلاحين .. يبقوا متعلمين..!!
أجابه في حزم:
- يا بيه .. لما كل أولاد الفلاحين يبقو موظفين.. أمال مين إللي هيزرع الأرض في مصر.. و هيطلع خيرها..؟! المفروض التعليم يبقى إلزامي لحد الإبتدائيه.. عشان ميبقاش فيه أميه.. و العيل النابه.. يكمل .. مابنقلش حاجه.. يدوه منحه بالمجان.. و إللي أبوه مقتدر يدفعله .. كل واحد على حسب مقدرته.. و إللي مينفعش في العلام .. يزرع أرض أبوه و جده .. أو يتعلم حرفه و يمسك صنعه.. كل بني آدم ربنا إداله موهبته .. و كتب له رزقه..!!
هز الرجل رأسه علامة الفهم , ثم سأله:
- طيب إيه رأيك في رفع رواتب المدرسين.. و محاربة الدروس الخصوصيه..!!
قاطعه (هنداوي) قائلاً:
- و نحاربهم ليه بس في رزقهم .. يابيه..؟! متخليهم يدو دروس زي ماهما عايزين.. حتي عشان يحسنو دخلهم ..و ميطلبوش من الحكومه زيادة مرتباتهم .. مش أحسن مايقعدو من بعد الساعة أتنين على القهوه.. دا الأيد البطاله نجسه..!!
سأله المراسل الصحفي مستنكراً:
- لكن الدروس الخصوصيه دي .. هتبقي تكلفه كبيره على أولياء الأمور..؟! و بتخلي المدرس يهمل شغله ..عشان يخلي الطلبه تأخد درس عنده..!!
أجابه (هنداوي) , و هو يهز رأسه علامة الفاهم ببواطن الأمور:
- و الله يابيه الغاوي ينقط بطاقيته.. و العيل الضعيف .. عامل زي العيان اللي بيروح للدكتور ..عشان يعالجه .. ولا يديله حقنة مقويات.. عشان يشد حيله.. و المدرس إللي ميراعيش ضميره.. فيه رب فوقه شايف.. و مطلع عليه و هيجازيه.. كمان لازم يكون فيه مفتش بيراقبه.. و يوديه ورا الشمس..!!
خطر له خاطر فسأله :
-إنت متعلم ياعم هنداوي..؟!
أجابه بفخر:
أمال يابيه.. أنا ساقط إبتدائيه.. قد الدنيا..!!

يتبع

**د .أشرف محمد كمال** · 08-12-2011, 19:44

عــودة هنــداوي (7)

(7)

قهقه الرجل ضاحكاً , حتى دمعت عيناه , ثم قال ساخراً :
- ماشاء الله.. ياعم هنداوي.. دا حاجه عظيمه..!!
ثم أردف سائلاً :
- طيب وهتعمل إيه في الصحه..؟!
تلمز (هنداوي) بشفتيه , وقال في حزن:
- الصحه .. ماراحت..؟!
استدرك المراسل قائلاً:
- لأ.. أنا قصدي .. هتعمل إيه في وزارة الصحه..؟!
زفر (هنداوي) بقوة , و قال:
- و الله يابيه.. أنت جيت على الوجيعه.. الواحد مش عارف يعمل إيه.. ؟! مش عارفين نلاقيها منين ولا منين..؟! من البلهارسيا .. للكبد الوبائي .. لفيرس سي .. لفشل كلوي.. لأورام الأطفال .. للضغط .. و القلب.. و السكر.. لأنفلونزا طيور .. لخنازير .. لجنون بقر.. لمبيدات مسرطنه .. أنت تحس كده إن فيه حد مستقصد البلدي..!!
قاطعه المراسل سائلاً:
- ماشي ياعم هنداوي .. أنا معاك في كل إللي قلته.. تعمل إيه بقه .. لو بقيت رئيس للجمهوريه..؟!
ضرب (هنداوي) كفاً بكف , و قال في أسي:
- قول أنت بقااا..!!
ثم استطرد قائلاً:
- شوف يابيه.. ربنا هوا الشافي المعافي.. و الشكوه لغير الله مذله .. الموضوع مش قلة فلوس و بس..!! لأ .. الموضوع سببه قلة الضمير.. لو كل واحد عنده ضمير مايأذيش أخوه.. لا تلاقي إللي بيجيب أكياس دم فاسده .. ولا أدويه منتهيه الصلاحيه .. ولا مكن غسيل كلوي مستعمل و ملوث.. ولا حقن الطراطير بتاعة زمان .. تنعطى من ده لده .. من غير ماتتعقم .. ولا الأرض تنزرع بمية مجاري ..ولا نرمي الصرف بتاع المصانع والأرض في النيل.. ولا نجيب مبيدات وأغذيه أطفال مسرطنه .. ولا نستورد لحمه فاسده .. و نغش كل حاجه .. حتى اللبن و العسل كمان..!!
قاطعه المراسل بنفاذ صبر:
- يعني هتعمل إيه.. ياعم هنداوي..؟!
أجابه في حيرة:
- العمل عمل ربنا يابيه.. إلاهي إللي يعمل كده تتقطع إيده .. أو يتشك في نظره.. و يقعدله في صحته .. و عافيته .. و عياله.. و تبقى آخرته سوده .. قادر ياكريم..!!
ثم أردف قائلا:
- و بعدين مايقدر على القدره إلا ربنا .. نوضب المستشفيات إللي بقت عامله زي .. زريبة المواشي .. و نجهز أود العمليات .. إللي شكلها ولا السلخانه.. و نوفر الدوا إللي سعره بقى في السما .. و نعالج المحتاج ببلاش ..على نفقة الدوله.. و إللي معاه نعالجه استثماري.. مش نسفر الوزرا ..و قرايبهم يتعالجو بره .. و نسيب الشعب يموت جوه..!!
أوما المراسل برأسه علامة الموافقة , ثم سأله :
- طيب و الأطباء .. مش هتزود رواتبهم هما كمان..؟!
أجابه إجابة قاطعة:
- لأ..!!
ثم استطرد قائلاً:
- الدكتور .. مش هيكون له راتب من أساسو..!! بس هيكون له نسبه من كل حاجه هيعملها.. سواء كان كشف أو عمليه.. عشان نشجعهم إنهم ميزوغوش من المستشفيات الحكومي .. و يروحو لعيادتهم .. و المستشفيات الخاصه.. و في آخر كل شهر ضامنين مرتبهم في جيوبهم..!!

يتبع

**محمد برجيس** · 10-12-2011, 19:02

ما أجمل حكاوي و قصص هنداوي
و ما اعمق ما تحتويه من معنى
مرور أولي و لي عودة للمتابعة
خالص شكري لك د. أشرف
لإطلاعنا على هذه الروائع

**فوزي سليم بيترو** · 12-12-2011, 07:58

هنداوي معاه شهادة ساقط ابتدائية قد الدنيا
وحيرشح نفسه لرئاسة الجمهورية
لكن يا دكتور أشرف ، برنامجه الإنتخابي
أشك أنه الّي كاتبه له واحد - عقر -
ممكن يكون ساقط إعدادية ؟!
يا أصحاب الشهادات . خلّي الشهادات تنفعكم .
معاك يا دكتور أشرف . أكمل وقول على لسان هنداوي ما بدا لك .
محبتي
فوزي بيترو

**فايزشناني** · 12-12-2011, 13:06

عمنا هنداوي نايم في العسل
ساقط ابتدائية ويحاضر زي دكاترة الجامعة
المشكلة يا أخي أشرف
اني هنداوي عوّل على الضماير
وهو لسه في ضماير شغالة ؟؟؟؟
محسوبك في آخر جلسة حوار مع ثلة من المسئولين
اقترحت عليهم أن يستوردوا درجات هوائية من الصين مثلاً
ويركنوا عربياتهم الفارهة ويركبوا الدراجات دية
منها يشجعوا السياحة.... ويحافظوا على البيئة
وأهم حاجة يوفروا أموال طايلة على الحكومة اللي هي في الآخر أموال الشعب
ضحكوا من الكلام وفكروني بهذّر
قلتهلهم ده مش هزار ده كلام جد
بس ما اقتنعوش
وكلامي راح فافوش
سلملي على هنداوي وقلو لمن يلاقي ضماير
يبعتلنا سوريا شوية .... احنا محتاجينها هنا برضو
وسلاموووو

**د .أشرف محمد كمال** · 12-12-2011, 15:43

المشاركة الأصلية بواسطة محمد برجيس مشاهدة المشاركة

ما أجمل حكاوي و قصص هنداوي

و ما اعمق ما تحتويه من معنى
مرور أولي و لي عودة للمتابعة
خالص شكري لك د. أشرف
لإطلاعنا على هذه الروائع

أشكرك أخي الغالي محمد برجيس على إطلالتك الجميلة وكلماتك الرقيقة
وأرجو ألا تحرمنا من عوداتك فهنداوي بلدياتك بيسلم عليك ودائماً في انتظارك
دمت بود

**د .أشرف محمد كمال** · 12-12-2011, 15:49

المشاركة الأصلية بواسطة فوزي سليم بيتر[size=6

و;761835][/size]

هنداوي معاه شهادة ساقط ابتدائية قد الدنيا

وحيرشح نفسه لرئاسة الجمهورية
لكن يا دكتور أشرف ، برنامجه الإنتخابي
أشك أنه الّي كاتبه له واحد - عقر -
ممكن يكون ساقط إعدادية ؟!
يا أصحاب الشهادات . خلّي الشهادات تنفعكم .
معاك يا دكتور أشرف . أكمل وقول على لسان هنداوي ما بدا لك .
محبتي

فوزي بيترو

الموضوع مش موضوع شهادات يافوزي يا أخويا
الموضوع موضوع بصيره
لكن زي مأنت عارف العين بصيره والأيد قصيره
بس مافيش أطول من اللسان
على الله يلاقي إللي يسمع
خالص مودتي وخاص ودي

**د .أشرف محمد كمال** · 12-12-2011, 16:01

المشاركة الأصلية بواسطة فايزشناني مشاهدة المشاركة

عمنا هنداوي نايم في العسل
ساقط ابتدائية ويحاضر زي دكاترة الجامعة
المشكلة يا أخي أشرف
اني هنداوي عوّل على الضماير
وهو لسه في ضماير شغالة ؟؟؟؟
محسوبك في آخر جلسة حوار مع ثلة من المسئولين
اقترحت عليهم أن يستوردوا درجات هوائية من الصين مثلاً
ويركنوا عربياتهم الفارهة ويركبوا الدراجات دية
منها يشجعوا السياحة.... ويحافظوا على البيئة
وأهم حاجة يوفروا أموال طايلة على الحكومة اللي هي في الآخر أموال الشعب
ضحكوا من الكلام وفكروني بهذّر
قلتهلهم ده مش هزار ده كلام جد
بس ما اقتنعوش
وكلامي راح فافوش
سلملي على هنداوي وقلو لمن يلاقي ضماير
يبعتلنا سوريا شوية .... احنا محتاجينها هنا برضو
وسلاموووو

المشكله يافايز يا أخويا إن الصين لحد دلوقت
مقدرتش تصّنع ضماير تقليد..!!
لأنها ملك إللي خلقها
بتنزل كده بختم رباني مينفعش يتغش
وإذا مكناش أحنا يأمة محمد مهبط الديانات إللي هنعلم العالم أمال مين..؟!
المصنع موجود عندنا ..بأيدنا أنا وانت وغيرنا
سيبك أنت من الجماعه المسئولين..بكره هيتسألوا على كل إللي عملوه
على كل نقطة دم طاهره لشهيد أو دمعه فرّت من عين مظلوم
وهيتشوا في نار جهنم بإذن واحد أحد قول آآآآآمين

**د .أشرف محمد كمال** · 13-12-2011, 14:59

عـــودة هنــداوي (8)

(8)

بعد ذلك سأله المراسل الصحفي قائلا:
- طيب .. و السياحه ياعم هنداوي .. هتعمل فيها إيه..؟ً!
فابتسم (هنداوي) ابتسامة عريضة , و قال:
- مالها السياحه.. هيا كمان يابيه..؟! ماتسيب إللي عاوزين يسيحو.. يسيحو في ملكوت الله .. دا الملك لله وحده .. و ربنا بيجازي كل واحد على قد عمله..!!
قاطعه الرجل قائلاً:
- إنت مش فاهم قصدي ياعم هنداوي..!! يعني أنت موافق إن الستات ينزلو البحر.. و يلبسو بيكيني ..؟!
رفع (هنداوي) حاجبيه دهشاً , و سأله في تعجب:
- وهوا إيه البيكيني ده..؟! مش دا برضو نوع بط ..!!
فضحك الرجل حتي كاد يسقط على الأرض , ثم قال , و هو مستمر في الضحك:
- لا ياسيدي مش نوع بط .. بس زي ماتقول كده .. ستات قالعه ملط..!!
تأفف (هنداوي) , و قال في اشمئزاز:
- أستر على ولايانا يارب..!! طب وليه كده يابيه..؟! دا الستر أولى .. هوا فيه راجل يرضى الست بتاعته.. ولا أمه.. ولا أخته .. ولا بنته تلبس كده..؟! قصدي تقلع كده..!! ياعيب الشوم يارجاله..!!
أجابه المراسل في حرج:
- و الله الموضوع ده .. مش عيب عند الأجانب.. و دي حريه شخصيه..!!
قاطعه (هنداوي) غاضباً :
- حريه شخصيه لما يبقى في أودة النوم ..أو في الحمام بتاعه .. مش قدام الناس كده عيانا بيانا .. جهاراً نهاراً.. كده من غير حيا ولا ضمير..!!
قاطعه الرجل قائلاً:
- الموضوع ده عادي عندهم .. دا حتي بيعملو شواطئ للعراه هناك..!!
بصق (هنداوي) على الأرض قائلاً في حنق:
- إخص عليهم و على إللي رباهم.. دي فتنه يابيه.. و رجس من عمل الشيطان.. أعوذ بالله.. دول ناس لاعندهم مله ولا دين.. هوا ربنا أمرنا بكده..؟! فين دول من ستنا مريم العفيفة الشريفة ..؟! ولا من مرات سيدنا موسي إللي كانت بتمشي وراه متغطيه .. و كلها حيا..!!
استدرك الرجل قائلاً:
- أمال هتقول إيه .. في موضوع الخمره .. إللي بتتقدم لهم في الفنادق..؟!
انزعج (هنداوي ) و قال مسرعاً:
- خمره..!! هيا حصلت كمان لموضوع الخمره..؟! لعن الله الخمر.. و شاربها ..و ساقيها .. و بائعها.. و حاملها ..!! دا فُجر و العياذ بالله .. بقى هيا دي السياحه بس يابيه ..؟! نسوان ملط .. و خمره .. مش ناقص تقولي قمار كمان..؟!
قاطعه المراسل نافياً:
- لأ.. مافي السياحة العلاجيه.. و سياحة الآثار.. و المعالم الطبيعيه .. و من ضمنها سياحة الشواطئ.. و خدمة السواح في الفنادق.. أصل واجب الضيافه يحتم عليك أنك تعملهم .. و تجبلهم كل إللي هما عاوزينه..!!
ابتسم (هنداوي) , و قال ساخراً:
- أجبلهم كل إللي هما عاوزينه..؟! ياحلاوه ياولاد..!! يعني لو حد منهم حِلت في عينه أختك .. ولا مراتك.. تديهاله..؟! عيب ياراجل الكلام ده..!! أنتو ماتعرفوش حاجه عن كرم الضيافه بتاتاً ..!! الضيافة لها أصول.. و الكرم العربي .. مالوش مثيل.. بس بالأصول..!! الضيف لما بيكون عندك في بيتك بتقدمله أحسن ماعندك.. و توجبه أجدع واجب ..بس من الأكل إللي بتاكله.. و اللبس إللي بتلبسه..!! و لزمن هوا كمان .. يراعي أصول الضيافه .. و يحافظ على حرمة البيت .. إللي هوا فيه..!!
استوقفه قائلاً:
- بس أنت كده هتطفش السواح .. و هتقضي على السياحه.. و هتقفل بيوت كتير ..مفتوحه من وراها..!!
أجابه (هنداوي) في حزم:
- قُطع العيش.. إللي متغمس بعار ..!! على رأي المثل.. الشريفة تبيع شعرها .. ولا تتاجر بعرضها ..!! و يوم مالناس تعرفك على حقيقتك .. و تعرف أنك بتحترم نفسك .. و بتصون عرضك ..و عرض كل إللي يجي عندك.. هيرجعولك من تاني.. و يطبّعو بطبعك ..لأن الدين المعامله يا باشا..!!

يتبع

**إيمان عامر** · 15-12-2011, 13:40

القدير والمبدع المتألق

دكتور أشرف

تحياتي لتميز قلمك وإبداعك
وأنا مع هنداوي........ قُطع العيش.. إللي متغمس بعار ..!!

أتابع في شغف

كان نفسي هنداوي يترشح في انتخابات مجلس الشعب وينقل لنا ما يدور وراء الكواليس بالعين المجرده
ولكن عسانا أن يترشح للكرسي الكبير ....

دمت بخير ودام قلمك يقطر إبداع
لك أرق تحياتي

**د .أشرف محمد كمال** · 17-12-2011, 13:24

المشاركة الأصلية بواسطة إيمان عامر مشاهدة المشاركة

القدير والمبدع المتألق

دكتور أشرف

تحياتي لتميز قلمك وإبداعك
وأنا مع هنداوي........ قُطع العيش.. إللي متغمس بعار ..!!

أتابع في شغف

كان نفسي هنداوي يترشح في انتخابات مجلس الشعب وينقل لنا ما يدور وراء الكواليس بالعين المجرده
ولكن عسانا أن يترشح للكرسي الكبير ....

دمت بخير ودام قلمك يقطر إبداع

لك أرق تحياتي

أشكرك أخت إيمان على حسن متابعتك وكلماتك الجميلة
ولو تابعت الحلقات السابقة لعلمت أن هنداوي لا يريد أن يترشح لأي منصب سياسي أوعسكري
لكنه يؤدي واجبه كاملاً بين صفوف الجماهير
دمت بود ودام تواصلنا

عــــودة هنـــداوي

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

ما الذي يحدث