(حلقـات) لغــز أسمــه.. الــزواج..؟!

**د .أشرف محمد كمال** · 03-01-2012, 18:15

(2)

.. تزوج (على) من (راشيل) , و سكن معها في (تل أبيب) . و استمر الحال لمدة عامين . بعدها فوجئ بـ (راشيل) تقول له :
ـ علي حبيبي .. إنت لازم تحاول يبقى عندك فلوس كتير.. علشان تأمن مستقبلك ..و مستقبل ولادك ..!!
ضحك (علي) قائلاً :
ـ مش لما يبقى فيه ولاد الأول ..!! ماهوه.. إحنا متجوزين بقالنا سنين .. و مافيش عيال لحد دلوقت ..!!
اضطربت (راشيل) , و قالت في سرعة :
ـ بكره يبقى فيه ولاد .. لكن لازم يلاقوا عندهم إللي يكفيهم.. و زياده .. فلوس .. أرض .. شركات .. عمارات ..
قاطعها (علي) قائلاً :
ـ ماهو الحمد لله شركة السياحه بتاعتي شغاله كويس.. خصوصاً اليومين دول بعد الاستقرار .. و معاهدة السلام .. إللي بين مصر و إســرائيل ..
غضبت (راشيل) بعد أن نفذ صبرها :
ـ إنت مش فاهم قصدى ..!! شركة سياحة إيه .. و بتجيب إيه ..!!؟ دى مكسبها في السنه ما يجبش تمن عربيه فولفو .. ولا شيفروليه ..!!
قاطعها قائلاً بخجل:
ـ يا ستي بكره تكبر ..و نكبر معاها .. و نقدر نحقق سوا كل إللي بنحلـم بيه ..!!
ازدادت حدة غضب (راشيل) , و قالت ساخرة :
ـ إن شاء الله .. بعد آلاف السنين .. إنت ليه مش عاوز تفهم ..؟!!
تعجب قائلاً :
ـ أفهم إيه ..؟!
ابتسمت له ؛ و أخذت تداعبه في رقبته , و تلثمه بشفتيها. قائلة :
ـ فيه شغلانه حلوه أوي .. و فلوسها كتير .. و مش هتكلفنا حاجه .. لو فتّحنا مخنا .. و قدرنا ننفذ كل المطلوب مننا ..!!
هتف (علي) جزعاً :
ـ شغلانة إيه ..؟! إوعي يكون قصدك ..!!
أومأت له برأسها . فاستطرد قائلاً :
ـ عايزاني أخون بلدي .. و أتجسس عليها ..؟! و بعدين إنتوا عاوزين إيه ..؟! ما احنا بينا وبين بعض .. معاهدات سلام .. و عايشين في سلام ..!! إنتوا لسه عايزين تعرفوا إيه ..؟! و عايزين لسه منا إيه ..؟!
ربتت على كتفه , و هي تحتضنه , و تملس على شعره :
ـ يا حبيبي إحنا عايزين نحافظ على السلام .. و نتأكد إن ما فيش حرب ممكن تقوم تاني .. تهدد مستقبلنا .. و مستقبل ولادنا .. و نمنعها في الوقت المناسب .. علشان ما تدمرناش.. و تضيع حياتنا ..
و استدركت قائلة :
ـ و بعدين إيه كلمة منا دي .. مانت بقيت منا خلاص .. و احنا واحد .. و مستقبلك هو مستقبلنا .. و هيا دي حياتنا .. و الواحد بيعيش مره واحده .. يبقى لازم ننتهز الفرصه ..!!
صمت (علي) و أخذ يفكر ملياً , و قد بان عليه الاضطراب . ثم قال بتردد :
ـ يعني أنا المطلوب مني إيه ..؟! أنا ماليش دعوه بالحاجات العسكريه خالص ..!!
أجابته (راشيل) على الفور , و قد ارتسمت على وجهها علامات الظفر :
ـ و مين جاب سيره الحاجات العسكريه ..؟! ما احنا بنصورها بالأقمار الصناعيه ..!! لأ إحنا عايزين .. المعلومات الاقتصاديه .. عن الصناعه .. و الزراعه .. و المشاريع القوميه .. عايزين نعرف نبض الشارع .. و كل إللي بيحصل في حياتهم اليوميه .. عايزين أي وثائق تقدر تحصل عليها .. عن المشاريع السياحيه.. أو البتروليه.. أو التبادلات التجاريه ..
ثم ابتسمت له , و استطردت قائلة :
ـ شفت بقى يا سيدي الموضوع بسيط إزاي .. و مالوش دعوه بالحاجات العسكريه .. و الدفع هيكون بالدولار .. لإن دي مصالح أمريكيه تجاريه.. مش سياسيه ..!!

يتبع

**د .أشرف محمد كمال** · 03-01-2012, 18:16

(3)

.. مضت قرابة عشرين عاماً . و أصبح (علي) الآن برتبة جنرال في (الموساد) الإسرائيلي . و أحد أهم الشخصيات البارزة في (تل أبيب) بل تم ترشيحه في (الكنيست) الإسرائيلي؛ تقديراً لخدمته المتفانية في خدمة أهداف إسرائيل الكبرى ؛ بعد أن حصل على الجنسية الإسرائيلية , و أصبح اسمه (رفاييل حاييم) , و أدار أكبر شبكة للجاسوسية في مصر طوال تلك الأعوام . و أصبح من أغنى أغنياء إسرائيل . ذلك بالطبع بفضل زوجته (راشيل) التي ورثت أموال أبيها (كوهين) , و أدارها (علي) طوال تلك السنين , بالإضافة طبعاً لما جناه من وراء عمله الخطير , الذي تفانى فيه على المدى الطويل .
.. لكن ما لم تعرفه إسرائيل أو (راشيل) حتى الآن ؛ أن (علي سويلم) أو (رفاييل حاييم) , ما هو إلا (مصطفى وجدي) الضابط بجهاز المخابرات المصري . و أنه قضى كل تلك السنين في خدمة بلده مصر ؛ بعد أن عرف كل جواسيس , وعملاء إسرائيل في مصر . و كان يمدهم بالمعلومات التي لا تمثل في حد ذاتها قيمة , أو بمعلومات خداعية تحاول تسريبها أجهزة المخابرات المصرية . بينما حصل هو بحكم موقعه , و تغلغله داخل إسرائيل على الكثير من المعلومات الاستراتيجية الحيوية , و مواقع تمركز القوات الإسرائيلية على الحدود اللبنانية , و ساهم بقدر كبير في خروج إسرائيل من لبنان , و دعم الانتفاضة الفلسطينية , و تنفيذ الكثير من المهام الانتحارية للفدائيين؛ تحت الاسم الحركي (سيف الدين) الذي لم يره , أو يعرفه أحد حتى الآن ..!!
أما المفاجأة الأكبر الخاصة بـ (راشيل) ؛ أن (رافييل) أقصد (علي سويلم) – عفواً - (مصطفى وجدي) . أب لكل من (أحمد) و(محمود) . و هما ضابطان بالجيش المصري . و لم ينجب من (راشيل) طوال تلك السنين . لأنه رفض أن يكون له أبناء من أم يهودية . و كان يستعمل لذلك بعض الأدوية - فلا يجوز لأب مسلم أن يكون له أولاد يحملون الجنسية الإسرائيلية - فقد يلتقي بيوم من الأيام الأخوان في ميدان القتال . و يكون لكل واحد منهم انتماءات و أفكار و عقائد مختلفة ؛ بسبب اختلاف الأم , رغم صلة الدم ..!!

**د .أشرف محمد كمال** · 03-01-2012, 18:19

الحلقـة الثانية عشـر

الـزواج في الصـين
(1)

أما الزواج في دول شرق أسيا مثل الصين , و كوريا , و اليابان . فيتشابه كثيراً ؛ نظراً لأنهم يشتركون في نفس اللون - يطلق عليهم الجنس الأصفر - فهم أولاد (يافث) بن سيدنا (نوح) , و الأفارقة الزنوج , و البربر من أولاد (حام) . و الأوربيون , و العرب من أولاد (سام) بن سيدنا (نوح) أيضاً ..!! فالسمة المميزة لتلك البلاد هي تلك البشرة البرونزية , و العيون الأفقية ؛ حتى أنك تظن أنهم يمشون , و هم نائمون , أو أنهم لا يرون , أو يتربصون بك كالنمور الجائعة ..!! فهم متشابهين إلى حد أنك لا تستطيع أن تميز أحدهم عن الآخر , و كأنهم صورة مكررة من توائم مستنسخة ..!! المهم أن الزواج في تلك البلاد له طقوس عجيبة و غريبة , لكن أهم ما فيه احترام الزوجة الشديد للزوج , و أهل الزوج الذي يصل إلى درجة الاستعباد - هذا ما كان عليه الحال منذ عدة سنوات ..!! - أما الآن..؟! فأصبح الحال لا يقل عنه في غيرها من البلاد ؛ خاصة بعد أن انتقلت له صورة العالم الغربي عبر الأقمار الصناعية , و الإنترنت . و بعد أن أصبحن يضعن العدسات اللاصقة , و يقمن بعمليات التوسيع , و التكبير , و التصغير , و التبديل في خلقة الرحمن القدير ..!!
كما أنهن الآن أصبحن بارعات في ألعاب الكاراتيه , و الجودو , و الكونغوفو , فأمسى الآن الرجال يخشون اغضابهن , و إلا لاقوا منهن ما لا يحمد عقباه , و لضاعت هيبة المحارب الساموري العظيم ؛ الذي كان يضرب به المثل منذ قديم الأزل ؛ لكن ما زالت البيوت تخفي الكثير من الأسرار . و سنحاول في خفة أن نكشف عنها الستار .
لعل من أهم مظاهر تلك المجتمعات ؛ هو زيادة معدلات الإنجاب , مما دفع بعض الحكومات إلى فرض عقوبات , إذا ما زاد العدد عن طفلين , و حكومات أخرى قامت بإخصاء الرجال , و جعلهم عقيم . حتى ضاعت هيبتهم أمام الحريم ..!!
تلك الأسرة التي نحن بصددها لم تكن قد عرفت هذا الاختراع بعد . فكان لديها سبعة أطفال . مما جعل الأب (جو مان جي) , و الأم (سون جين هي) دائمي الشجار طوال النهار ؛ أما في الليل , فيعدن للمداعبة و الهزار . و ينجبون مزيداً من الأطفال ..!!
قالت (سون) إلى (جو) بحنق ـ طبعاً باللغة الصينية ـ :
ـ إنت تشوف لك حل بقه ..يا سي جو .. أنا مش معقول كل سنه.. ألاقي نفسي حامل .. أنا ما عدش فيا صحه خلاص..!!
نظر (جو) لها وقد رفع حاجبيه متعجباً :
ـ طب و أنا أعمل لك إيه .. هو أنا السبب ..؟!! مانتي إللي بتغلطي.. و تنسي تاخدي الحبايه يا ست هانم ..!!
قاطعته (سون) قائلة :
ـ ماهو إنت إللي لابخني .. إنت و عيالك .. هو أنا عاد فيا دماغ .. و بعدين إشمعنا أنا إللي يكون عليا كل حاجه .. إنت ليه ما بتعملش عملية زي بقيت الرجاله ..؟!!
قاطعها (جو) غاضباً :
ـ إياك عدتي تجيبي سيرة الموضوع ده تاني ..!! هما الرجاله بعد كده يبقوا رجاله ..؟!! كله إلا كده .. هيا حصلت .. والله عال .. يعملوها الستات ..و يقعوا فيها الرجاله ..!!
نظرت إليه متأففة , و قالت :
ـ مانت فضلت تقول كده.. لحد ما بقى عندنا سبع عيال ..
قال لها (جو) صارخاً :
ـ و أنا مالي ..؟! ما تشوفيلك و سيله تانيه ..!!
وضعت يديها على خديها و زفرت قائلة :
ـ ماناجربت كل الوسايل .. من لولب.. لحقن.. لحبوب .. و مفيش حاجه نافعة معاك ..؟!!
ضحك بصوت جهوري , ثم قال :
ـ برضك أنا السبب ..؟! مانا إللي بلاقيكي كل يوم.. منيمه العيال من بدري .. و لبسالي القميص البمبي .. يبقى العيب عليا إني بأدي واجبي ..؟!!
ابتسمت في خجل قائلة :
ـ يا سلام يا سيدي ..!! طب و أنا أعمل إيه دلوقتي ..؟!
نظر إليها (جو) بهلع قائلاً :
ـ ليه ..؟ هو حصل إيه تاني يا ستي ..؟!!
أدارت وجهها عنه . و انكمشت برأسها حتى اختفى بين كتفيها , قائلة:
ـ أنا الدوره.. بقالها شهرين .. ما جتش عندي ..!!
جحظت عيني (جو) - برغم صغرهما- و قال صارخاً:
ـ يا نهار أبوكي إسود .. بقالك شهرين.. و مخبيه عليا ..!! و لسه دلوقتي جايه تقوليلي يا وليه ..؟!!
ملحوظة : هذه ترجمة فورية من اللغة الصينية لما يقابلها بالعامية المصرية . لكن نفس العبارات الزوجية تقال بين الأزواج على الرغم من اختلاف اللغات و اللهجات ..!!

يتبع

**د .أشرف محمد كمال** · 03-01-2012, 18:21

(2)

.. بكت (سون) قائلة :
ـ الله .. و أنا أعمل إيه ..؟! ما هو ده إللي حصل .. يعني هو كان بخاطري .. ما هو كان غصب عني ..!!
ثم استطردت متسائلة :
ـ طب ما نروح عند الدكتور شين .. إللي صحبتي ..أوشين قالتلي عليه .. و نزل لها الحمل ..؟!
نظر لها (جو) شذراً :
ـ نعم يا ست هانم .. إنتي كمان عاوزاني أقتل إبني .. علشان ربنا ينتقم مني.. و يحرمني .. و يعاقبني على ذنبي .. أبداً .. دى إرادة ربنا .. و ربنا عاوز كده ..
قاطعته (سون) باكية :
ـ طيب إزاي هنربي كل دول .. دول بيدخلوا الحمام بالطابور .. و بيناموا على السرير بالدور .. و بين الواحد و التاني عشر شهور .. أنا أجيب صحه منين لكل دول ..؟!! روح إنت إعمل زي ما باقول .. شوف دكتور يعملك عمليه تمنع الخلفة على طول ..
نظر إليها (جو) ساخراً :
ـ شوفي .. أنا مش مسؤول عن الموضوع ده .. و لو اقتضى الأمر إني أطلقك .. مش هاروح للدكتور .. جايز ده يكون الحل المضمون إنك ما تحمليش على طول ..!!
ضربت بقبضتها على يديها قائلة :
ـ هيا حصلت يا جو ..إنك تطلقني كمان ..؟!!
قال لها ضاحكاً :
ـ أيوه علشان تستريحي خالص .. و أروح أتجوز واحده تانيه.. تكون لسه حلوه.. و صغيره .. و خدودها زي البرقوق..
بينما كان يتحدث إليها مولياً ظهره ؛ كانت (سون) في حالة من الغضب أقرب إلى الجنان . و وجهها أحمر من الاحتقان . تكاد تنفجر مثل البركان . فاستطرد :
ـ .. و جسمها زي الغزلان .. و بقها خاتم سليمان .. و صدرها ..
ثم التفت إليها , فإذ بها تنقض عليه فجأة – و هي البطلة الدولية في الكاراتيه - و ضربته ضربة قوية أسقطته أرضاً , قضت عليه , و جعلته لم يعد يصلح لها أو لغيرها ..!! و لم يعد فى حاجه إلى إجراء العملية . سجل ذلك الاختراع في الهيئة العالمية لتنظيم الأسرة باسم (سون جين هى) الصينية التي اخترعت تلك الطريقة الجهنمية ؛ لعلاج المشكلة الصينية من دون التكاليف الباهظة لإجراء أية عملية . أو استخدام الوسائل التقليدية ..!!
.. لذا نأمل نحن رابطة الرجال العرب, ألا تكون قد وصلت تلك المعلومات السرية عبر القنوات الفضائية إلى النساء في الدول العربية . خاصة و أنهم يحتكرون الآن استخدام الأكياس البلاستيكية , و السكاكين الصدأة في علاج كافة المشاكل الزوجية ..!!

**د .أشرف محمد كمال** · 03-01-2012, 18:24

الحلقة الثالثة عشـر

الـزواج في الهند
(1)

..أما الزواج في الهند . فهو على الطريقة الهندية - ذلك لأنهم كلهم هنود ..!!- ففي الهند توجد طوائف شتى , و أديان متعددة . و لغات بالمئات . فالغالبية العظمى هندوس , و بوذيين , و الأقلية مسلمة . أما الهندوس فيقدسون البقر تقديساً عظيماً . و لا يذبحونه – و لا أدرى ماذا يأكلون ..؟!! لكن الظاهرة الواضحة هناك هي قلة عدد الكلاب الضالــة ..!!- حتى إذا ما دهست بقرة شاردة أحد أطفالهم ؛ فأصابته بعاهة مستديمة , أو قتلته ؛ يقيم أهله الولائم , و الاحتفالات بأنه نال البركة , و إذا ما وجدوها تهيم على وجهها في شوارع المدينة سجدوا محني الرؤوس . فقد ينال أحدهم بركتها بأن تتبول أو تتبرز عليه . ليظل يحمل بركتها لعدة شهور دون أن يغتسل ..!!

المهم أن ذلك المجتمع الغريب العجيب له طقوس متفردة في الزواج . تجد السيدة المتزوجة تضع دائرة حمراء على جبهتها . و الأرملة تضع دائرة سمراء , و النساء يرتدين تلك الملاءة الملونة الشفافة . تلف به جسمها عدة لفات . فإذا ما تعثرت في تلك الملاءة . أو عبث بها أحد الأطفال , أو الرجال . انفضت عن آخرها . و ظهرت كما ولدتها أمها..!!
.. في هذا المجتمع . يلعب السحر , و الدجل , و العرافين ؛ دوراً كبيراً في الزواج , و اختيار الوليف . فيذهب راغبي الزواج , و الأهل إلى الكاهن , أو العراف ؛ الذي يقوم بدوره بعدة طقوس و إطلاق البخور , و يقوم ببعض رقصات الهنود التي توارثها عن أجدادهم الهنود الحمر , و يفك الأعمال و السحر الأسود الذي قد تكون صنعته لهم بنت الجيران , أو أحد الحساد . ثم يخبرهم بأن هناك عمل ما قد تم وضعه تحت شجرة أو ببطن سمكة , و يذهبون هناك و ياللعجب يجدونه مدفوناً..!! بعدها يقرر الكاهن إن كان موافقاً على ذلك الزواج أم لا ..!!
و في قصتنا هذه أحد هؤلاء العرسان و السحار (كومار) و أبوه المهراجا (باهندار) و أمه الأميرة (جلنار) . يقفون في انتظار أن ينطق (كومار) بعد أن بدأ طقوسه , و أشعل النار و راح يغمض عينيه . و يضع كفيه أسفل ذقنه كالتمثال . و بعد طول انتظار أخذ يصرخ :
ـ سنجهار ..مدار .. شون بذار .. ألدهن عيار .. دمار .. دمار ..
ثم صمت مرة أخرى .نظرت إليه الأميرة (جلنار) و سألته :
ـ فيه إيه يا كومار ..؟!
أشار بيديه إليها مقاطعاً , فصمتت في الحال . أخذ (كومار) يدور حول النار كالمجنون . كمن يبحث عن شئ ما سقط منه في الأرض . ثم أخذ يرقص , و هو واضعاً يديه خلف ظهره . مرة ناظراً لأسفل . و مرة ناظراً لأعلى ؛ كمن أصابته ضربة شمس ..!!
و بعد عشرات اللفات , و طول انتظار . توقف بغتة حتى فزعت منه الأميرة (جلنار) . ثم قال بصوت عال :
ـ ناهي ..!!
ضربت الأم على صدرها . و جزع الأب , و غضب الابن , و ثار. قائلاً :
ـ فيه إيه يا عم يا مجنون إنت !! لأ ليه ..؟! إنت فاكر إني هاصدق الكلام التخاريف بتاعك ده .. أنا راجل متعلم في انجلترا ..و متخرج من جامعة اوكسفورد .. و كل الخزعبلات دى هيه إللي مخليانا متخلفين لحد دلوقت .. و بتضحّك الناس علينا .. أنا بس ما رضتش ..أزعل أبويا و أمي ..و قلت لما أشوف أخرتها إيه ..!! لكن إنك يا حتة صعلوك .. تفرق بيني وبين حبيبتي .. دا يبقى آخر يوم في عمرك النهارده ..!!
ثم أخرج مسدساً كان يحمله في جراب حزامه و صوبه نحو رأسه . هنا صرخ المهراجا (باهندار) قائلاً :
ـ بيندار ..!!
عندها خفض (بيندار) المسدس قائلاً في خزي :
ـ أنا آسف يا والدي .. لكن لا يمكن أوافق على الكلام ده .. دا راجل عجوز بيخرف ..!!
قاطعه والده قائلاً :
ـ إستنى لما نشوف هوا عاوز يقول إيه ..؟!!
ثم التفت إلى (كومار) , و سأله :
ـ ليه يا سّيدي بترفض الزواج ده ..؟!!
نظر (كومار) شذراً إلى (بيندار) , و هو يتوعده في نفسه .ثم قال :
ـ هذه العروس من برج ناري .. و انتم من برج مائي .. و إذا ما دخلت عليكم .. فستولد الدمار و خراب الديار ..!!
هنالك ثار (بيندار) , و أمسك بعنق (كومار) . ثم أخذ يخنقه , و هو مصرّ أن يقتله . لكن والده منعه , و أبعده عنه . فقال (بيندار) غاضباً :
ـ إنت بتصدق الكلام ده يا والدي .. ده راجل محتال ..و بيخرف كمان .. هو كان يعني شافها .. ولا عرف تاريخ ميلادها ..؟!!
أخذ (كومار) يسعل . ثم هتف قائلاً :
ـ أنا شفت طالعها المكتوب جوا النار.. و عرفت إنها هيا و برجك أضداد ..و لو إتجوزتها ..و خلفت منها أولاد .. دا هيكون آخر يوم في عمر المهراجا باهندار .. و نهاية سلسال عيلة ماهيتار ..
جزعت الأميرة (جلنار) , و قالت :
ـ لأ .. بعيد الشر .. يعني إللي خلقها ما خلقش غيرها .. بكرة أجوزه ست ستها .. و أنقي له أجمل الجميلات ..!!
صرخ (بيندار) في أمه قائلاً :
ـ لا يا أمي .. أنا باحب منار .. و مش هتجوز واحده غيرها .. و لو جبتولي بنات الدنيا .. لا يمكن أتجوز إلا هيا ..!!
ثم انصرف غاضباً , و تركهم لا يدرون ؛ ماذا يفعلون ..؟!

يتبع

**د .أشرف محمد كمال** · 03-01-2012, 18:26

(2)

.. ذهب (بيندار) إلى دار حبيبته (منار) . فجلسا معاً في الحديقة , و أمسك بيديها الرقيقة قائلاً :
ـ منار يا حياتي .. أنا نفسي تكوني مراتي .. حتى مماتي ..
أجابته (منار) جزعة :
ـ إن شاء الله أنا يا حبيبي .. يا منايا و كل نصيبي .. أنا لا يمكن أعيش يوم من بعدك .. و ما عدتش قادرة على بعدك .. أنا مش عارفه إيه بس مخليك مستني .. و يخليك بعيد عني ..؟!!
قال على الفور :
ـ أمي ..!!
هتفت بحنق :
ـ حماتي .. هيا بدأت من دلوقتي ..؟!! مش قادرة تستني.. لما الموضوع يبقى رسمي ..؟!!
أشار لها بيديه (بيندار) قائلاً :
ـ لأ ..!! إنتي مش فاهمة الموضوع بالضبط .. قال إيه يا ستي ..!! كومار السحار بيقول إن جوازي.. أنا و إنتي.. هيجيب الدمار و خراب الديار ..!!
قاطعته باستنكار :
ـ أما صحيح حتة حمار ..!! جته شكه في زوره .. و ينقطع لسانه من لغلوغه ..
استطرد قائلاً :
ـ و بيقول كمان .. إن لو إتجوزنا .. والدي باهندار هيموت .. و سلسال العيله هينقطع ..!!
قاطعته ثانية :
ـ لأ .. دي راسه إللي عايزه تنقطع .. أكيد حد موحيه يقول الكلام ده ..؟!
نظر إليها مستفسراً :
ـ إنتي قصدك إيه ..؟!!
أومأت له برأسها ,و غمزت له بعينها قائلة:
ـ طبعاً إنت عارف قصدي كويس .. أكيد أمك دفعت له .. علشان يقول الكلام ده .. لإن إنت عارف إنها كانت عاوزه.. تجوزك بنت أختها .. جلبهار ..!!
قال لها مستهجناً :
ـ لا يا شيخه .. مش معقول الكلام ده .. ما هي عارفه إني ما بطقهاش .. و إني لا يمكن أفكر أتجوزها .. دي شبه القرده الهنديه ..المرسومه على المعبد ..!!
أجابته (منار) قائلة :
ـ و إيه يعني .. ما هي أمك بتدور على فلوس بنت خالتك .. و الأراضي إللي عندها بكره لما تورثها ..!!
بان الفهم على (بيندار) و قال:
ـ إنتي فكرك كده ..؟!
ثم التفت , و ضرب على قبضته غاضباً:
ـ طيب أنا هاتصرف .. و أشوف السر ورا الموضوع ده .. و بكره أجيب لك خبره ..

يتبع

**د .أشرف محمد كمال** · 03-01-2012, 18:28

(3)

..عاد (بيندار) إلى منزله . فوجد مجلس العائلة مجتمعاً على العشاء . و وجد خالته (جلبهار) , و ابنتها . فقال محدثاً نفسه :
ـ دي باين الحكايه زي ما قالت منار ..!! هما لسه بيعاملوني معاملة العيال .. و فاكرين إنهم يقدروا يفرضوا عليا أي حد ..؟! أنا إللي لازم أختار .. و لو ما كنتش هاختار دلوقتي .. إمتى بقى هاختار ..؟!!
ما أن رآه والده (باهندار) حتى هتف :
ـ بيندار .. تعالى يا ابني ..سلم على أعمامك.. و عماتك .. و أخوالك ..و خالاتـك ..
تقدم (بيندار) متوجساً, ثم قال :
ـ خير .. اللهم اجعله خير ..!! إنتم كلكم متجمعين ليه ..؟! إنتم داخلين حرب مع عيله زنزبار.. ولا إيه ..؟!!
هتفت أمه (جلنار) :
ـ عيب يا ولد .. إيه الكلام ده ..!!
أشاح بيده قائلاً :
ـ الولد إللي بتتكلمي عنه ده .. عنده خمسه وعشرين سنه دلوقت .. و لسه بتعامليه على إنه عيل صغير ..!!
أجابته قائلة :
ـ و هيفضل طول عمره في نظري عيل ..و لازم يسمع كلامي .. و هاجوزه إللي أنا أخترهاله ..!!
قاطعها (بيندار) ساخراً :
ـ كله إلا دي ..!! طبعـاً عـاوزة تجوزيني بنت أختك جلبهار ..؟!! أبـداً ..!!
هتفت خالته (جلبهار) قائلة :
ـ مالها بنتي ..؟! هيا بايره ولا باير ..!! دا ألف مين يتمناها .. لولا العهد إللي أخدته أنا و أختي.. أنها ليك .. و هيا لسه في اللفه ..
قاطعها قائلاً بامتعاض:
ـ أيام لما كانت في اللفه كان لسه ما بقاش لها شكل .. حرام يا أمي ..إني أتحمل خطأ ارتكبته.. خالتي و جوز خالتي .. و أتجوز واحدة ما اخترهاش قلبى .. أبداً .. دا يبقى آخر يوم في عمري ..
و انصرف غاضباً , و صعد إلى حجرته . ثم أرسلت أمه إلى السحار (كومار) . فأتى في الحال . و جعلته يخبر العائلة بما سبق أن قال . ثم كان أن نزل (بيندار) فجأة , فرآه و جن جنونه . و أمسك بتلابيبه , و طرحه أرضاً . ثم أوسعه ضرباً . فأمسك به الخدم . و خلصوه من يديه , و هو يصرخ قائلاً :
ـ لازم أدفعكم كلكم التمن .. و أولكم الجبان كومار .. لازم أنتقم منكم كلكم .. و ما يطلعش عليكم نهار ..
ثم جرى خارجاً من المنزل . لا يلوي على شئ , و الشرر يتطاير من عينيـه .

يتبع

**د .أشرف محمد كمال** · 03-01-2012, 18:29

(4)

.. و بعد عدة ساعات . جلست العائلة على مائدة العشاء . بينما جلس (كومار) في أحد الأركان . و رفض أن يتناول الطعام بحجة أنه صائم للعبادة . وأخذ يتلو طقوساً لطرد الأرواح , و مباركة المهراجا . ثم انصرف في الحال . فقال (باهندار) :
ـ لقد قررت أن أؤجل زواج بيندار كام سنه لحد ماتنصلح الأحوال .. أو لحد ما تضع الأقدار حداً لهذه الأفعال .. رغم أنى كنت أتمنى أن أجيب حفيداً .. يرث كل هذا المال .. و يحافظ على السلسال .. و نسل عائلة ماهيتار ..
ثم بدأ في تناول الطعام , و من بعده جميع أفراد الأسرة . وماهي إلا بضع دقائق . حتي انتفض (باهندار) . ثم أمسك بصدره , و صرخ من الألم , و سقط على الأرض و قد جحظت عيناه , و فارق الحياة . ثم بعدها ببضعة ثوان ؛ تساقط أفراد الأسرة الواحد تلو الآخر كالذباب . ففزع الخدم . و تحركوا في الحال . و ساد هرج و مرج في المكان . و اتصلوا بالمستشفيات . و امتلأت ساحة القصر بعربات الإسعاف , و عساكر الشرطة في كل مكان ؛ إلا أنه لم ينج من سكان ذلك القصر أحدٌ ..!! فاتجهت أصابع الاتهام كلها نحو (بيندار) . بعد أن أخذوا أقوال الخدم و الحراس . و عرفوا ما كان من أحداث . أخذت الشرطة تفتش عن (بيندار) حتى تم العثور عليه في حديقة قصر (منار) . ما يزال يطارحها الغرام , و ينظم لها في الأشعار .
..و في قسم الشرطة , قال له الضابط :
ـ أحسن لك تعترف .. مش هيفيدك الإنكار .. كل الأدلة ضدك .. و الشهود كمان شهدوا إنك هددت كل من بالدار .. و قلت لهم مش هيطلع عليكم نهار ..
أخذ (بيندار) يبكي , و يصرخ قائلاً :
ـ أنا .. !! أنا أقتل أبويا .. و أمي .. و إخواتي .. و أخوالي .. و عماتي .. أقتل كل عيلتي ..؟!! مهمن كان غضبي ..!! أنا عمري ما أعمل حاجه زي كده .. و لو كان التمن عمري .. أعيش بس إزاي من غير أهلي ..؟! أنا لابد أعرف مين إللي عمل العمله ديا .. أكيد دي من عمايل كومار الكلب .. لابد أنتقم منه .. و أشرب من دمه ..!!
ضحك الضابط , قائلاً :
ـ حلوه أوي التمثيليه دي .. كإنك ما تعرفش إن كومار إتقتل .. ؟!
أسقط في يد (بيندار) , و هتف جذعًاً :
ـ إيه .. كومار إتقتل .. إزاي دا حصل ..؟!!
ضحك الضابط مرة أخرى , و قال ساخراً:
ـ يا سلام ..! أمال لو ما كنش إتقتل بالمسدس بتاعك .. كنت هتقول إيه ..؟!
ذهل (بيندار) , و ألجمته المفاجأة , ثم قال بصوت هامس :
ـ المسدس بتاعي ..؟! كومار إتقتل .. أبويا .. و أمي .. و إخواتي ماتوا ..؟! دى مكيده ..!!
ثم استطرد قائلاً :
ـ دى أكيد مكيده .. حد مدبرها علشان يخلص من عيلتنا .. أكيد فيه حد ورا الموضوع ده .. أنا لازم أعرف مين إللي مدبر كل حاجه .. و أنتقم ..و آخد بتاري .. و أطفي ناري ..!!
ضحك الضابط مرة ثالثة , و قال متعجباً :
ـ مش لما تشوف هتعمل إيه الأول في نفسك .. ؟! إنت هيتحكم عليك أكيد بالإعدام .. و أنت آخر واحد في عيلة ماهيتار .. و بموتك كده ينتهي السلسال ..!!
تنبه (بيندار) فجأة , ثم قال :
ـ بس .. أنا كده عرفت مين إللي مدبر الموضوع ده .. أكيد ده شنكار بن زنزبار .. هوا إللي كان عاوز ياخد بالتار .. إللي بين عيلته و عيلتي .. كمان كان عاوز يتجوز حبيبتي .. هوا الوحيد المستفيد من كل الخراب إللي أصاب عيلتي .. و هوا أكيد إللي دفع لكومار .. عشان يوقع بينا .. و هوا إللي سرق المسدس مني .. و قتل بيه كومار علشان التهمه تلبسني ..!!
صفق الضابط بيديه قائلاً بسخرية :
ـ الله .. حلو أوي الفيلم الهندي ده .. بس إزاي تثبتها بقه يا بطل الأبطال ..؟!!
ثم هتف قائلاً بغضب :
ـ يا عسكري .. خده على السجن ..
..هكذا تحققت نبوءة العراف (كومار) . بعدما أحاط بتلك العائلة خراب الديار , و الدمار . لكن لا يوجد هناك ما يقال إلا : ( كذب المنجمون و لو صدقوا .. و ما عفريت إلا بني آدم ..!!)

**د .أشرف محمد كمال** · 03-01-2012, 18:32

الحلقة الرابعة عشر

الـزواج العنكبوتي

(1)

..بالطبع لا أعني هنا زواج العناكب السوداء ؛ حيث تقوم الأنثي بطعن زوجها في ليلة الزفاف بذنبها في منتصف ظهره , لتقتله بعدما يكون قد أدي مهمته , و أصبح لا داعي لوجوده . فتلتهمه بضراوة , و تشف . ثم ترتدي بعد ذلك لأجله السواد طيلة العمر..!! لكن أقصد ماعُرف مؤخراً بزواج الشبكة العنكبوتية (النت) ؛ حين يتعارف شبان و فتيات ؛ بل رجال , و سيدات من كافة الأعمار , و مختلف البلاد ؛ ببعضهم عن طريق النت , و تتوطد بينهم أواصر الصداقة , و المحبة . فيرتبطون بقصة حب عنيفة , حتى لا يستطيع أحدهم الاستغناء عن الآخر , و يهيمون في غياهب تلك الرغبة المستحيلة , و الأحلام السرابية الجميلة . لذا دعونا نستعرض هنا في عجالة أحد تلك النماذج العنكبوتية , و نتابع هذه المأساة الكوميدية.
.. التقيا في أحد المنتديات . بهرها بأسلوبه , و أفكاره , و أشعاره . خلبت لبه برومانسيتها , و سحرها , و دلالها . توطدت علاقتهما على مدار عدة شهور , ظنا أنهما عرفا كل شئ عن بعضهما مما زاد من ارتباطهما . تبادلا رسائل الحب , و الهيام عن طريق( الشات ) . و في أحد تلك الأيام . دار بينهما ذلك الحوار..
قال (الكتكوت الجريح) - لا تتعجبوا فهذا هو (النك نيم) الذي أطلقه على نفسه في المنتدي-:
- زوزو حياتي ..انا مش عارف أقولك أيه..؟! أنا خلاص معدتش قادر.. استغنى عنك..!!
أجابته (زهرة بلا أنياب) – و هذا هو أسمها أيضاً- بدلال :
- و أنا كمان ما بقدر كوكو .. حبيبي ..!!
استطرد كاتباً:
- أنا مش عارف يا روحي.. إيه أخرة إللي أحنا فيه..؟! أنت من بلد .. و أنا من بلد .. و عمرنا ماهنتقابل..!!
أجابته في سرعة:
- ليش .. أحنا كل يوم مو مع بعض..!!
- بالكتابه بس .. أنا نفسي يوم أشوفك .. أمسك إيدك أملس على شعرك.. أسمع صوتك..
- أنا ممكن أرسلك صورتي .. و نعمل شرينج ..أو حتي نشغل الكاميرا لايف .. بس انت عارف ظروفي .. أخاف حدن من أهلي يسمعني .. أو يشوفني .. و أنا مشغله الكاميرا..!!
- معاكي حق أنا كمان .. مراتي بتراقبني .. و بتعمل كبسات مفاجئة عليا.. و بلاقيها فوق راسي .. زي عسكري الدرك..!!
- ماتفكرني أنك متزوج .. كل مابفتكر أنك لك واحده تانيه غيري ..بتلاطفها و تلاطفك ..و تلاعبها و تلاعبك.. بنجن..!!
- أحنا هنغير.. ولا إيه..؟! مأنا صارحتك بكل حاجه من الأول .. و قلتلك ظروفي.. و بعدين عاوزاني اطلقها يعني .. طيب هأعمل أيه في الخمس عيال.. إللي في رقبتي..!!
- كان بدي هادول.. يكونو ولادي منك..!!
- طب إزاي هنجيبهم ..؟! بالمراسلة..!! مش لما نبقى نتجوز الأول..؟!
- و الله فكره..!!
- قصدك إيه..؟! أنا كنت بهزر..!!
- يعنى إيش بتهزر.. أنت تضحك عليّ ..و تريد تتسلي ..!!
- لا أبداً يا حياتي.. بس إزاي يعني..؟!
- أنت ماسمعت ..عن زواج المسيار..!!
- لا ماسمعتش بيه..!! مش مطبق عندنا..؟!
- عنّا مطبق .. يعني اتنين بيتزوجوا .. و كل واحد بيظل ببيتو..
- هههه ..ودا يبقى اسمه جواز ازاي..؟!
- لا ..ماهم ممكن يتلاقوا بأي مكان ..اذا سمحت لهم الظروف..!!
- طيب أحنا ازاي هنتجوز..؟!

يتبع

**د .أشرف محمد كمال** · 03-01-2012, 18:34

(2)

..أخذت تفكر, ثم أجابته بعد فترة صمت قصيرة:
- مو الجواز.. ايجاب .. و قبول..؟!
- أيوه بس عندنا محتاج لمأذون ..و توثيق العقود ..و شهود .. و إعلان..؟!
- أول ماكان فيه مأذون .. و كانو يتزوجوا برضا الطرفين ..من دون حتى عقود..
- طيب .. و الشهود ..هنجبهم منين..؟!
- بسيطه.. بنخلي حدن من زملائنا.. يشهد علينا..
- يا سلام.. هو حد منهم يعرفنا.. كلهم بس يعرفونا بالنيك نيم..
ثم استطرد كاتباً بعد لحظات تردد:
- طيب .. و الإعلان .. !!
- بنعلن في المنتدى أن الكتكوت الجريح .. و زهرة بلا أنياب .. اتزوجو في صفحة التهاني
- طيب ..و هنستفيد إيه من جوازة النت دي..؟!
- كيف .. يعني أنت ما بدك تتزوجني..؟!
- أبداً يا حياتي .. بس أنت عارفه إني راجل متجوز..!!
- عارفه أنك متزوج ..!! مو من حقك مثنى ..و ثلاث ..و رباع..؟!
- أيوه .. و الله فكره ..!!
- لكن إنسى الثلاث.. و الرباع هادول ..!! و لا باقطع خبرك..
- الله اشمعنى بقى ..؟! يعني ليه اللي ترضيه لغيرك .. ماترضهوش لنفسك..؟!
- أيه أنا.. لا زييّ زي.. و لا مثلي حد..!!
- ياسلام على الغرور.. بس أنت ماقلتليش برضوا ..يعني أيه فايده الجوازه دي..؟! و هيا مع ايقاف التنفيذ..!!
- أول شي منشان .. ماحد تاني من المنتدى يفكر أنه يغازلني ..أو يحاول يتقدملي ..ثانيا هادول البنات اللي عم يتنططو إلك في مواضيعك .. يبطلوا.. مثل هيك الحركات اللي بيسووها ..و ينهدوا..!!
- آآآه .. يعني عاوزه تحتكريني.. و تقضي على مواهبي الأدبية..!!
- إيه ..أنا باريدك تكتب إلي بس ..و ماحد أبداً يقرالك..
- يا لطيف ..!! دا مراتي بقى .. تبقى أهون..
- أيه جاب السيرة الزفت دي..انت لازم تفكرني كل شويه أنك متزوج واحده تانيه..!!
- لا و أنت الصادقه.. دا إنت التانيه ..و هيا الأولانيه..
- ظريف .. و لو .. أنا بنسيك اسمك..خليك أنت معي بس..
- لكن متنسيش أن شرط التعدد في الجواز العدل .. يعني لازم أعدل بينكم..
- ليش ماكفاها عشرين سنه زواج .. أيش بدها منك تاني..؟! أريدك تعدل..و تعوضني عن هيد السنين كلها..!!
- إلا بالحق أنت لحد دلوقتي ماقلتليش .. أنت عمرك كام سنه..؟!
فوجئت بسؤاله فصمتت برهة ثم أجابت:
- هوا فيه رجال عاقل ..بيسأل واحده ست عن عمرها..؟!
- لا بس أنا كنت عاوز أعرف عندك كام سنه ..؟! عشان أعرف فرق السن بينا..
- و هادا إيش يفرق معك ..؟!
- عشان أعرف إذا كنا ..هنعرف نجيب عيال بعد الجواز .. ولا لأ..!!
- و كيف بدك تجيب أولاد.. بالمراسلة متل ماقلت..؟!
- أيوه صحيح فكرتيني ..أنا كنت نسيت..!!طيب قوليلي بصراحة .. أنت ليه ماتجوزتيش لحد دلوقت..؟! ولا تكوني بتضحكي عليا.. و تطلعي متجوزه..!!
- أبداً أنا مو متزوجه ..ولا تزوجت قبل .. فيه ناس وايدين.. اتقدمولي.. لكني كنت برفضهم..
- ليه..؟!
- لأنى ماكنت بحبهم ..و رافضة اني اتزوج بلا حب.. و كان إلي مواصفات معينه .. لفتى أحلامي.. ضليت أدور عليها كل ها السنين.. و مالقيتها..!!
- أيوه .. اللي هما قد ايه .. بقى السنين دول..؟!
- بطّل هزارك الثقيل هادا.. عمرى مابقولك على سني ماتحاول .. بعينك..!!
- يعني ازاي اتجوز واحده .. لا شفتها ..و لا أعرف حتى اسمها الحقيقى .. و لا سنها..؟!
- ما انا كمان ما اعرف عنك شي ..!!.. يمكن تكون شايب طاعن بالسن ..و منتهي الصلاحية..؟!
- ياسلام .. ماأنا قلتلك كل حاجه عني.. وعن سني .. وعن ظروفي..!!
- و أنا ايش عرفني .. مايمكن تكون بتكذب عليّ..؟!
- طيب ما يمكن تكوني انت كمان بتضحكي عليا ..و وحشة ومافيش حد راضي بيكي..!!
- يا سلام دا أنا بينهبلو عليّ العرسان.. من و أنا عندي 16 سنة .. حتى كانوا بيغازلوني بكل مكان .. وايدين من اقاربنا كان بدهم يتزوجوني..
- دا كان زماااان.. من يجيي 50 سنه ..!! لكن ايه أخبارك دلوقتي..؟!
- أنت مو بتبطل هيد الغلاسة ..أبدا ما بخبرك عن عمري ..
- يعني ماأعجبتيش بحد .. ولا حبيتي حد قبلي
- لا طبعاً حبيت كتير قبل .. بس أهلي ماكانو ..بيوافقوا عليهم..!!
- ليه..؟!
- منشان كان سني صغير وقتها.. و ماكانو مناسبين لعائلتنا.. و لسه ببداية حياتهم .. و طمعانين بثروة عيلتنا..!!
- آآآآه قولتيلي بقه ..أنك غنيه ..و عندك فلوس..!!
- أكيد أبوي شيخ كبير .. وعندنا أراضي .. و عقارات ..و معارض سيارات..
- واو دا أنت لقطه..!! خلاص أنا موافق
- موافق على إيش..؟!
- على جوازنا..!!

يتبع

**د .أشرف محمد كمال** · 03-01-2012, 18:36

(3)

.. نبتت ابتسامة ظفر , و انبسطت أسارير الوجه ثم سألت في خبث:
- متى بدك..؟!
- في الميعاد اللي تحدديه ..أنا تحت أمرك.. حتى لو النهارده..!!
- هيك من دون ترتيبات..؟!
- حلوه ترتيبات دي يعني.. عاوزه نعمل إيه.!!
- مو لازم استعد ..!! و ابلغ صديقاتي الأنتيم .. و نبلغ زمايلنا..
- و ماله شوفي اليوم اللي يناسبك..؟!
- بعدين أنت هلا مو بتدفعلي مهر..؟!
- نعم.. أحنا متفقناش على كده..!!
- كيف..؟! ليش ما تدفعلي مهر .. انت مو دفعت مهر حال مرتك..؟!
- لا طبعاً.. أنا مدفعتش مهر..!!
- كيف يعني ..مابيصير من دون مهر..؟!
- أنا كتبت قايمه بس..
- لا أحنا عنا .. العريس لازم يدفع مهر ..
- طيب .. و أنا ادفعلك مهر أزاي..؟!
- ممكن تدفعه بالفيزا كارت..
- يا سلام .. أشي خيال يا ناس .. و كام بقى المهر بتاعك يا حبيبتي .. و ادفعهولك بأي عملة..؟!
- بالدولار طبعاً..!!
- ياسلام .. و كمان بالدولار ..!! وعايزاني أدفعلك كام بقه..؟!
- أنا عائلتي كبيره جداً.. وعنّا المهر مو اقل من ميت ألف دولار..
- ياعيني .. و اللي مامعاهوش المبلغ ده ..!! و بعدين إيه دخل عيلتك في الموضوع..؟!
- أكيد بيوم من الأيام بيعرفو حبيبي.. و بخليهم قدام الأمر الواقع .. حتي يوافقوا
- يعني هما ممكن مايوافقوش عليا..؟!
- أكيد طبعاً .. عمرهم مابيوافقو.. على واحد من جنسية تانية .. و متزوج .. و عنده خمس أولاد ..!!
- و إحنا بنفضل على الحال ده على طول .. جواز مع ايقاف التنفيذ .. أنت في بلد .. و أنا في بلد تانيها .. و بينا بلاد تركب الأفيال
- حبيبي يمكن بعدين تنصلح الأحوال.. و ممكن اقدم استقالتي و أجيك بلدك .. أو انت تحصل عندنا عقد عمل زين..!!
- يعنى لازم من موضوع المهر ده.. مافيش استثناءات لضيق ذات اليد..!!
- ممكن اقسطو حالك على دفعات ..لأن هادا بيمثل قيمتي عندك .. منشان اللي بيجي رخيص بيروح بالساهل .. و لازم تشعرني إني غالية عندك .. مو كفايه أنك ماجبتلي دهبيات..!!
- أيه دهبيات دي كمان ..؟!يكونش قصدك شبكة..!! هوا فى حد قالك إني مليونير..؟!
- انا مو أقل من الستات التانية..عندنا الشبكه بتبقى ألماس
- ياسلالالالالام ..الله يرحمك يامه .. كانت شبكتها خلخال فضه
- واو.. أنت شكلك بيئه .. و داخل على طمع..!!
- أنا ابداً ..!! الحمد لله أنا ميسور الحال .. وعندي مشاريعي الخاصه ..و فلوس كتير .. بس بتاجر بيها في السوق و مشغلها في البورصه ..
- بتّاجر في إيش..؟!
- أنا عندي بازار كبير.. ببيع فيه انتيكات ..و لوحات ..و تحف اثريه .. بشتريها من المزادات..
- تقصد جاليري..؟!
- أيوه تقريباً..
- زين .. يعني أنت رجال موسر .. كيف ما معك ميت ألف دولار
- لأ طبعا معايا .. بس معظم فلوسي بضاعه .. و موجوده في السوق..
- خلاص بأقسطلك إياهم علي خمس شهور ..منشان أنت صعبت عليّ ..لكن دير بالك .. أن المؤخر بيكون مليون دولار
- كمان مليون دولار..!! ليه هوا أنا متجوز السفيره عزيزه ..ولا الأميره ديانا..؟!
- أكتر كمان ..ماقلتلك أنا مالي مثل .. ولا زي زي..!!
- طب وريني حاجه كده.. و لو صوره على الماشي
- لما نبقى نتزوج أول ..!!
- ياسلام ماينفعش ..لازم أتأكد الأول ..لحسن تطلعي راجل..!!
- بعد كل هالوقت شاكك بكلامي ..باكر بتطلع على كل شي..
- أنا مستني بكره على نار.. و إن شاء الله.. هبعتلك الدفعة الأولى على أول الأسبوع الجاي
- عظيم ..و أنا ببتدي .. في الترتيبات منشان الحفله
- حفلة ايه دي كمان..؟!
- بنعمل حفلة على النت .. بينا و بين اصحابنا فى الشات روم.. منشان يشهدو على جوازنا..!!
- طيب استني.. لما الاقي يوم مناسب تكون مراتي.. و ولادي خارجين بره.. و مش موجودين في البيت
- زين.. حدد إنت اليوم ..و انا بتصل باصحابنا واعرفهم..
- باي
- باي
..و قد كان , و أرسل (الكتكوت الجريح) مبلغ العشرين ألف دولار عن طريق (الفيزا كارت) على الحساب الذي تركته له (زهرة بلا أنياب) , و في الليل ذهب ملهوفاً ليفتح النت عند موعد الحفلة , فوجد بلوك على الأيميل , و رسالة على (الأوف لين) تقول:
- و الله و شربتها ..يا ظريف..!! وعاملي فيها أبو العريف ..؟! تعيش .. و تاخد غيرها.. عشان تبقي تفوق لبيتك و ولادك .. و تبطل تحلم ياخفيف .. محسوبك عبووووده .. ماركه مسجله..!!

**د .أشرف محمد كمال** · 03-01-2012, 18:38

الحلقة الخامسة عشر

الـزواج في زحـل
(1)

..إنه من الغرور منا كبشر أن نعتقد أننا الوحيدين في هذا الكون . و لا توجد مخلوقات غيرنا ..!! فلقد ذُكر في القرآن الكريم وجود عوالم أخرى من حولنا ؛ هذا بالطبع غير عالم الجان ذلك العالم المليئ بالأسرار , و الأساطير , و الخزعبلات ؛ الموجود بالفعل في تماس مع عالمنا . و يشاركنا في مأكلنا , و مسكننا , و كل شئ تقريباً ..!!
لكننا لسنا هنا الآن من أجل دراسة هذا العالم المجهول لنا . فنحن بعقليتنا المادية لا نؤمن إلا بما نراه . رغم أننا نتمتع جميعاً بقصر النظر ـ ربما هذا ما يدفعنا إلى ارتداء النظارات و العدسات ..!! ـ لذا سأرجئ عالم الجان إلى حلقة أخرى . فانتظرونا في القريب العاجــل .
..لن أطيل عليكم . دعونا نركب السفينة . فلقد بدأ العد التنازلي للانطلاق - عفواً أرجو المعذرة - فلم أوضح لكم طبيعة الرحلة . فهذه السفينة الفضائية (هابولو) ستنطلق في رحلة استكشافية إلى كوكب زحل ؛ ذلك الكوكب البعيد الذي يبعد عنا ملايين السنين الضوئية . لكننا سنختصرها في ثانية واحدة . بالطبع ليس بسبب التقدم العلمي , فلم نصل بعد إلى ذلك الحد . و لكن لأن (المخرج عايز كده..!!).
..ذلك الكوكب البعيد , تدور حوله حلقات بألوان الطيف , و يمتلئ بالغازات التي جعلت الحياة فيه لا تطاق ..!! يحيا به نوع غريب من المخلوقات . و سنحاول دراسة الحياة هناك . و آلية الزواج .. إذا كان عندهم زواج ..!!
فالرجل الزحلي (نسبة إلى كوكب زحل) بطبيعته قصير القامة , رأسه كبيرة الحجم نوعاً , أحمر اللون , جسمه يمتلئ بحراشيف قرمزية اللون , أو ربما كان هذا هو ردائه ؛ إن كانوا يرتدون ملابس ..!!
و المرأة الزحلية لا تختلف عنه كثيراً , بل يكاد من الصعب جداً التفرقة فيما بينهما ..!! ربما هذا ما دفعهم إلى إلغاء فكرة الزواج نهائياً . و لا ندري حتى الآن كيف يتناسلون ..؟!!
.. سنرتدي الآن خوذة الترجمة الفورية , و مكبرات الصوت . فنحن لا نسمع لذلك الشعب أية أصوات . فليس لديهم أفواه..!! لكنهم بالتأكيد يتحدثون فيما بينهم . و ربما لا يرونـا أيضـاً , فلا توجد لديهم عيـون ..!! لكن توجد لديهم قرون استشعار , تنتهي بقطعة مكورة مثل كور (البنج بونج) . سنكتشف فائدتها فيما بعد ..!!
و أطرافهم الأربعة محورة . العلوية قصيرة , و السفلية طويلة كحيوان (الكونجارو) بلا أصابع ؛ بل بها لواصق . تساعدهم في تسلق الجبال الزحلية الشاهقة , و الهبوط إلى الأخاديد العميقة . يقضون حياتهم ما بين الصعود , و الهبوط . لا يمشون على الأرض بل ينامون أيضاً , و هم معلقون من أرجلهم كالخفافيش ..!! درجة الحرارة هناك تجاوز المئة تحت الصفر . أي تحت التجمد . لكن لا يوجد جليد بالطبع . فلا توجد هناك مياة أصلاً ..!! و لون تربة الأرض , و الجبال أحمر اللون ؛ ذلك لنمو نوع من الطحالب التي يعتمدون عليها في التغذية , لذا لقب كوكب زحل بالكوكب الأحمر ..‍‍!!
لكن كل ذلك لم يمنعهم من بناء المدن , و السكن داخل الكهوف الجبلية . و الآن لنقضي تلك الأمسية مع هذه الأسرة الزحلية . و نرى بعضاً من مشاكلهم الزوجية ..

يتبع

**د .أشرف محمد كمال** · 03-01-2012, 18:40

(2)

.. بمجرد أن رأت المرأة الزحلية زوجها الزحلي , سألته في عصبية :
ـ إنت كده سايبنا طول الليل .. بين أربع جدران أنا .. و ولادك.. إللي متعفرتين .. ولا الجان ..؟!!
نظر إليها باقتضاب ـ رغم أنه لا توجد له عينان أو حواجب – و قد انتصبت قرون الاستشعار فجأة , و أخذت تطلق شراراً ؛ علامة الغضب . ثم قال :
ـ أنا أعملك إيه يا ست هانم .. مانا كنت في الشغل زي كل يوم ..‍‍!!
ملحوظة (1) : كوكب زحل يدور حول نفسه مرة كل عام أرضي ؛ لذا فالليل هناك ستة أشهر . و يكون في أطول حالاته في فصل الشتاء فيبلغ حوالي تسعة شهور . اما الشتاء هناك فيستمر قرابة العشرة أعوام ؛ لإن الكوكب يدور حول الشمس دورة كاملة كل أربعين عاماً . لذلك فهم يعيشون فترات طويلة من الظلام الدامس ؛ لذا أخذت تلك المقولة الأرضية (دي ليلة زحل) من ذلك الليل الأسود الغطيس . و ليس الشتاء عندهم كشتائنا . فلا توجد عندهم أمطار ..!! لكنه أكثر فصول السنة الزحلية انخفاضاً في درجات الحرارة . و زيادة في معدلات الإنجاب ..!!
استطردت الزوجة :
ـ إنت سايبنا هنا في البرد .. من غير ما تجيب لنا حتى دفايه .. أو فرن زئبقي ..
ملحوظة (2) : الزئبق الأحمر يوجد عندهم بكثرة , و يستخدم كوقود ..!!
قاطعها (زحلول) قائلاً :
ـ شوفي .. أنا مش ناقصك .. أنا عايز آكل و أنام .. مانا كمان تعبان طول النهار.. و الليل
..و صعد إلى سقف الكهف , و تمطى , ثم تدلى منه ..!! فاستوقفته زوجته قائلة :
ـ إنت هتنام من دلوقتي .. إنت مش هتاكل ..؟!
فالتفتت قرون الاستشعار تجاهها , و قال بلهفة :
ـ يعني إنتي طبختي لنا حاجه ناكلها ..؟!!
ابتسمت قائلة في دلال :
ـ طبعاً .. طبخالك شوية طحالب تجنن ..
قال بامتعاض :
ـ طحالب تإني ..!! هو إنتى مفيش عندك غير طحالب ..؟!!
أجابته ساخرة :
ـ قالوا أطبخي يا جاريه قالت كلف يا سيدي .. يعنى إنت كنت جبت سلق ..و قلـت لك لأ ..؟!!
هبط فجأة (زحلول) من السقف , و قال في أسى :
ـ طيب هاتي أي حاجه .. أنا عاوز أنام بدري ..
زفرت بضيق :
ـ أهو دا إللي إنت فالح فيه ..!!
قال لها , و هو يلتهم الطحالب بلواصق يديه باشمئزاز :
ـ برضوا..!! إنتي عايزه لسه إيه ..؟! مش لسه الأسبوع إللي فات مخلفين سـحلول ..!!
نظرت الية معاتبة , ثم قالت :
ـ و ماله ..!! فيها إيه ..؟!! ما هو ليل زحل طويل ..!!
قال في حزن :
ـ يا زحلية .. حرام عليكي .. انا جاي حيلي مهدود .. و بعدين كل شئ له حدود .. أحنا هنودي كل السحاليل دي فين ..!!
فلم يكونوا قد عرفوا تنظيم الأسرة بعد .. و عندهم مايناهز المليون سحلول..!!
فقالت له مقاطعة :
ـ يا خويا بطل قر .. ما يحسد المال إلا أصحابه .. ربنا يخليلي ماما .. هيا إللي بتربيلي السحاليل ..إنت عارف أن بابا بطارياتة فضيت من زمان .. وهيا بتسلي نفسها بتربية السحاليل , و بتقول هما إللي منورين حياتـها ..!!
قال لها بخضوع :
ـ يعني إنتي برضك مصممه ..؟!!
قالت في حزم :
ـ أيوه ..!!
قال لها صاغراً :
ـ أمرك..!!
.. صعدا سويا إلى سقف الكهف و تدليا . و إذ بقرون الاستشعار لـ (زحلول) تتلون باللون الازرق , و قرون الاستشعار لـ (زحلية) تتلون باللون الاحمر . ثم بغتة , في حركة مفاجئة . تلامست قرون الاستشعار لكليهما . فتولدت شحنه كهربائية , وانبعث وميض أبيض أضاء الكهف حتى كاد يعمي الابصار . و أخذ جسديهما في الانتفاض كمن مسته الكهرباء إلى أن هدءا , ثم ظهرت في منتصف الحجرة كره (بنج بونج) بيضاء , حولها هالة من ضياء . ثم ما لبث أن ظهر لها أطراف و قرون استشعار . و أضاءت الحجرة كمصباح كهربائى مشع . فأشاعت جو من البهجة و السرور في ذلك الليل الزحلي العقيم
ملحوظة (3) : الطفل الزحلي يظل مضيئاً حتى سن البلوغ ؛ لذا فهم يستخدمونه وسيلة للإنارة , و التدفئة في ليالي الشتــاء المظلمـة .. الباردة ..!!
.. هبطت (زحلية) , و قد حملت السحلول الصغير بين يديها ثم أخذت تداعبة بقرون استشعارها فأخذ يضحك . و ملأ الحجرة بالضجيج ؛ بينما ظل (زحلول) معلقاً بالسقف , و قد راح في سبات عميق ..!!

**د .أشرف محمد كمال** · 03-01-2012, 18:42

الحلقة السادسة عشر

الزواج في الجــن
(1)

..ألم أعدكم أننا سنلتقي في القريب العاجل ؛ لنبحث موضوع الجان . فكما ذكر في القرآن , وأحاديث النبوية الشريفة الجان يسمعون كلامنا , يروننا , يأكلون ما تبقى من طعامنا . بل ينامون في فراشنا . و يلبسون ملابسنا ..!! - إن لم يذكر عليها اسم الله - لذا أمرنا رسول الله صلى الله عليه و سلم أن نستعيذ منهم دائماً خاصةً إذا ما دخلنا الخلاء , أو الأماكن المظلمة , التي يتخذونها مسكناً . ليس لهم علينا سلطان - سوى على ضعاف الايمان - ذلك لأنهم من خلق الله كسائر المخلوقات . و ما كان الله ليجعل أحداً من خلقه يتسلط على خلقه ؛ إلا بأمره . فسبحان الله القادر على كل شئ..!!
منهم من هم صالحون , و منهم الفاسقين . مثلهم كمثل البشر ..!! يتزوجون و يتناسلون . لذلك من المؤكد أنه توجد لديهم نفس مشاكلنا الزوجية , لذا سنحاول تخيل تلك الحياة الأسرية العفاريتية ..!!
نحن لا ندرى من أين جاء لقب عفريت , لكن يبدو أن هذا اللقب قد تسرب إلينا عبر قنوات الاتصال بين عالمهم و عالمنا . خاصةً من أولئك السحرة و المشعوذيين , الذين يستعينون ببعض الجان المتمردين . الذين يعاونوهم في الكثير من أعمال السحر ,و الدجل التي تصل بكليهما إلى الكفر و الفُجور ..!!
فالجني ما كان ليتغلب على إنسي إلا إذا ما اعتقد فيه . و قل إيمانه بربه . فهو أضعف نسبياً من الإنسان . تحرقة بضع آياتٍ من القرآن . لا يعلم الغيب . فلا يعلم الغيب إلا الله . لكنه قد يطلع على الأحداث المنقضية , فيأتي بأخبارها , أطول من الإنسان – الحالي - عمراً . فيعيش لآلاف السنين . لكنـه يمـوت أيضاً كسائر الخلق ..!!
من رأوه يحدثوننا بأنه صغير الحجم , قصير القامة , لا يتعد ستون سنتيمتراً , غزير الشعر ؛ أما موضوع القرنين فلا يعدوا غير أن يكون أثراً , فربما تكون أذنيه كبيرة حجماً ؛ ليسترق بهما سمعاً . غالبيتهم يسكنون تحت الأرض ـ في الأرض السابعة ـ لكنهم يخرجون إلى أرضنا إما للنزهة ,أو البحث عن الطعام , و أحياناً للعمل ..!!
.. و الآن سنحاول أن نتعفرت قليلاً , و نحيا بعض الوقت مع العفاريت , و نتلصص عليهم للمرة الأولى ؛ و هم الذين دأبوا طويلاً على التجسس علينا ..!!

يتبع

**د .أشرف محمد كمال** · 03-01-2012, 18:44

(2)

..هيا بنا نقترب من اثنين من العفاريت , و ننصت إلى أحاديثهم . قال أحدهم للآخر :
ـ إنما أنا إيه ياعفرتو يا أخويا .. سهرت إمبارح سهرة صباحي .. ولا الدش ..!!
قال له (عفرتو) غاضباً :
ـ بقى كده يا ندل تطلع لوحدك .. و متقوليش ..!! هيه احكيلي شــوفت إيـه ..؟!!
قال له الأول :
ـ لأ ..!! دا كلام ميتحكيش .. أنت أحسن حاجه تيجى معايا النهارده وتشوف بعينيك .. دا السهرات الحمرا عند صاحبنا ما بتنتهيش وعلى كل شكل ولون ..!!
قال له (عفرتو) في تردد :
ـ لا ياعم .. انا عفريت متجوز .. و مراتي محرّجه عليا .. و عامله حظر تجوال .. و منعإني من الخروج بعد المغربيه .. و حبسإني .. ولا حبسة رمضان ..!!
قال له صاحبه :
ـ إنت حر .. خليك إنت في الجواز بتاعك .. مافيش أحسن من الحريه و حياة العزوبيه .. إنت ما شفتش البني أدمين بيعملوا إيه ..؟!! دول بقوا ولا الشياطين .. نقوم إحنا بقه إللي نبقى هاديين.. و عاقليــن .. يبقـوا سابولنا إيه ..!!
انصرف (عفرتو) في الحال إلى بيته خوفاً من بطش زوجته (سوريال) ؛ التي قابلته , و الشرر يتطاير من عينيها , و قالت بصوتها العفريتي :
ـ إنت كنت فين لحد دلوقت .. ياعفريت العلبه ..؟!!
أجابها زوجها , و هو يرتجف خوفاً منها :
ـ أنا كنت قاعد مع واحد صاحبى ..على القهوة ..
قالت بغضب , و هي تشوح بيديها :
ـ أنا مش منبهه عليك.. إنك تقطع علاقتك .. بأصحابك خالص ..
ثم تنبهت فجأه , و استطردت قائلة :
ـ و صاحبك ده عازب .. ولا متجوز ..؟!!
انكمش (عفرتو) ذعراً , و قال :
ـ لأ .. عازب !!
هنا صرخت (سوريال) , قائلة :
ـ كمان ..!! انا مش منبهه عليك ماعدتش تقعد مع عزاب .. انت رجعت تإني تلعب بديلك ولا إيه ..؟!!
ملحوظة : هذا التعبير ليس مجازاً ..!!
أجاب متلعثماً :
ـ أبداً يا حياتي .. دا هو كان واقع في مشكلة.. و كنت بانصحه إزاي يحلها ..!!
قالت (سوريال) ساخرة :
ـ و كمان بتنصحه ..؟!! يا أخي .. إبقى انصح نفسـك ..و وريني فلاحتـك ..!!
خطرت لـ (عفرتو) فكرة ما لبث . و أن طرحها قائلاً :
ـ أصله عاوز يتجوز ..و بيدور على عروسة .. فقلت أقوله على بنت خالتك فريال ..!!
إلا إن زوجته صرخت فيه قائلة :
ـ إنت شكلك كده عاوز تطلع عفاريتي .. مالك إنت و مال فريال بنت خالتي .. إنت شوفتها فين ..؟!! و كلمتها إمتـى ..؟! دا أنا وهي متخاصمين بقالنا شهرين .. و ما بتدخليش بيت .. إنطـق .. أتكلـم .. إيـه إللـي فكرك بيها ..؟!!
تلعثم (عفرتو) بعد أن باءت خطته بالفشل , و أصبح في ورطه لا يستطيع الخروج منها . فأخذ يفكر في كذبة أخرى . فهو لا يدرى عقلية أولئك الحريم , المجانيين . فهم ما بين حال إلى حال . و قال :
ـ ما أنا قولتله .. أنا هاخليك تكلم مراتي .. هيا أحسن واحدة تختار في الدنيادي .. وهي إللى عارفة كل حاجه عن العرايس الحلويين .. و أنا ما اقدرش أقولك حاجه إلا لما أشاورها ..!!
هنا فقط ابتسمت (سوريال) , ثم قالت :
ـ والله كلامك مش بطال ..!! خليه يبقى يقابلني.. و يحلها ألف حلال ..
ابتسم (عفرتو) ابتسامة ظفر, ثم قال :
ـ طب هو ما بيبقاش فاضي إلا بالليل .. و إنتي محرجه عليا أخرج بعد المغربيه .. و مش عارف أروح له النهارده.. ولا استنى شويه ..؟!!
انتاب الحماس (سوريال) , و قالت في حزم :
ـ لأ النهارده ..!! خير البر عاجله .. متضيعش وقت .. أنا عندي له عروسة ما تستناش ..
انتاب الفضول (عفرتو) ,فسألها في لهفة :
ـ مين دي ..؟!!
قالت في اقتضاب :
ـ و انت مالك ..!!
استدرك مفسراً :
ـ مش لازم أعرف الأول ..!! مش دا برضك صاحبي.. و لازم هأقوله على أسمها و أوصافها..؟!!
قالت في تردد :
ـ صاحبتي إقبال ..
تأفف (عفرتو) , قائلاً :
ـ يعني خلاص مالقتيش .. إلا صحبتك العفشة دي ..؟!! دي وحشة جداً .. و كمان أكبر منه يجي متين سنه ..!!
صرخت فيه زوجته قائلة :
ـ عفرتو ..!!
أجابها في خنوع :
ـ حلوه .. حلوه جداً .. دا كأنها مخلوقه علشانه ..!!
ثم انصرف في الحال . و ذهب الى صاحبه ؛ سعيداً أيما سعادة لأنه استطاع أخيراً أن يفر من قبضتها الحديدية . و قال له فرحاً :
ـ أنا النهارده ملك إيديك .. شوف هنقضي السهره فين ..؟!!
تعجب صاحبه قائلاً :
ـ ليه ..؟! إنت عملت إيه ..؟! عرفت تطفش النهارده إزاى ..؟!
ضحك قائلاً :
ـ على حس واحد صاحبنا عبيط ..!! دا أنا عفرتو .. و الأجر على الله .. يلا بينا يلا .. نخلي الليلة حمرا ..
قال له صاحبه :
ـ يلا بينا نروح المقله .. نجيب لنا لب و فشار ..دا السهره صباحي
ثم صعدا , و جلسا في مقاعد المشاهدين المكتظة بآلاف من الشياطين المراهقين , يتفرجون على صنائع البني ادمين ..!!

(حلقـات) لغــز أسمــه.. الــزواج..؟!

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

ما الذي يحدث