هنـداوي في الميـدان

**فوزي سليم بيترو** · 26-11-2012, 15:22

يا عيني عليك يا هنداوي . شايل هموم البلد فوق كتفك
هوَّ كتفك حيشيل إيه ولاّ إيه !
بتتذكر يا هنداوي يوم ما قولتلك اترشح لرئاسة
الجمهورية زمان .
بوس إيدك وِشْ وقفا واحمد ربك . شوف مرسي ، مسكين
لا بينام ليل ولا نهار .
سيبك من ميدان التحرير يا صاحبي ، وارجع لأهلك
وناسك في البلد وعمَّر فيها ولا تسأل فيهم . دول يا
هنداوي جماعة فاضيين . والفاضي يعمل قاضي . ولّه إيه ؟!
فوزي بيترو

**د .أشرف محمد كمال** · 26-11-2012, 20:15

المشاركة الأصلية بواسطة فوزي سليم بيترو مشاهدة المشاركة

يا عيني عليك يا هنداوي . شايل هموم البلد فوق كتفك
هوَّ كتفك حيشيل إيه ولاّ إيه !
بتتذكر يا هنداوي يوم ما قولتلك اترشح لرئاسة
الجمهورية زمان .
بوس إيدك وِشْ وقفا واحمد ربك . شوف مرسي ، مسكين
لا بينام ليل ولا نهار .
سيبك من ميدان التحرير يا صاحبي ، وارجع لأهلك
وناسك في البلد وعمَّر فيها ولا تسأل فيهم . دول يا
هنداوي جماعة فاضيين . والفاضي يعمل قاضي . ولّه إيه ؟!
فوزي بيترو

يسلم فمك يا فوزي يا أخويا القول قولك دول ناس فاضيين..!!
والمشكله إن كل اللي في البلد بقم بيشتغلو قضاه
وقال إيه زعلانين عشان الإعلان الدستوري ..؟!
أمال ليه مزعلوش قبل كده لما العسكر طلعوه ..؟!
ولا العسكر دح دح والمرسي كخ كخ ..!!
كل الناس كان نفسهم يغور عبد المجيد محمود وأديه غار في داهيه
بس إلا قلي يا فوزي بيه هوا عبد المجيد باشا ده يقرب لشارع محمد محمود اللي جايبلنا البلاوي ده كلها..؟!
طب ميغيرو إسم الشارع ويخلوه شارع علياء المهدي ولا هيفا وهبي ولا حتى ليلى علوي
جايز يتلبخو فيهم ويهدو أو يتهدو..!!
إياكش يولعو كلهم في نار جهنم هما واللي وراهم
ويجعله عامر

**د .أشرف محمد كمال** · 28-11-2012, 18:54

(7)

ثم ضرب (هنداوي) كفاً بكف وأردف قائلاً:

- الأكاده ياولاد إن أيام مبارك ..كانوا بيقولو إن إللي في الميدان كلهم سلفيين وإخوان ..ودلوقتي بيقولو كل اللي في الميدان فلول ..كأن الشعب المصري بيثورش أبداً..!!
بس أقولكم الحق ..في حاجه غريبه ..أصل الكدب خيبه.. الميدان اليومين دول بقى على كل لون يا باطسطا ..!! في ناس يامه..عمر ماكان لهم في السياسه ..و ماشاء الله الجماعه الممثلين مالين الشوارع والميادين ..وكأنهم بيمثلو فيلم كبير ..وأكيد المنتج واحد من العتاوله الكبار.. عشان بيدفع لكل الناس دول ..دا الواحد ولا الواحده منهم بياخد في الساعه كام مليون ..مابالك بقه لما ينزل الشارع وسط الجرابيع دول ..!! دا الست الهام شاهين ..وليلي علوي ..وكمان غادة عبد الرازق ووفاء عامر ..و يسرا ودينا الرقاصه ..كل دول كانو هنا ..!! وأنا بقول الميدان زحمه ليه..؟! دا بينها هتبقى ثورة عسل ..!! الخوف لشباب الأخوان والسلفيين ينقلبو على الريس مرسي ..ويمشو وراهم.. والبلد تروح في توكر..!!

وبعدين انا مش عارف الزيطه والزمبليطه دي كلها علشان ايه..؟! ما الراجل النائب العام كلنا عارفين انه فاسد وبن ... والزند وشركاه فاسدين وأولاد... والمحكمه الدستورية فاسده وبنت... والناس كلها كانت بتطالب بشيالتهم.. قوم لما نشيل كل دول تهيج علينا كل كلاب البلد .. طيب ايه الحل..؟! نطلّع مبارك تاني من السجن ونقوله آسفين ياريس ..تعالى اركبنا تاني ..ودلدل رجليك..!! ماهو ده اللي ناقص ..بكره نلاقي جمال ..وعلاء ..وكمان ماما سوزان .. وبقية الفلول معتصمين في التحرير.. وبيقولو على نفسهم ثوار وأحرار..ياله ماهي بايظه بايظه.. جت على دوله..!!
وكمان لما نقول هنعيد المحاكمات من تاني ..بعد ماكل المجرمين خدو براءه.. واللي لسه مسجونين ..هيطلعو كده بقدرة قاضي فاجر.. زي الشعره من العجين..قال إيه أهل الشهدا زعلانين ..وبيتظاهرو في محمد محمود.. وبيرفضو الاعلان الدستوري ومش صعبان عليهم دم ولادهم اللي راح واللي لسه هيروح بايدين الطرف التالت..!!
حتى موضوع تحصين القرارات مش عاوزينه.. عشان نقعد كده نلعب مع بعض حاوريني يا كيكه.. اللي نبنيه كل شويه نهده.. نعمل انتخابات واستفتاءات وطوابير ..وملايين تترمي على الأرض بالهبل.. وبعدين تطلعنا الوليه الفاضيه اللي عامله قاضيه.. اللي اسمها تهاني الجبالي ..وتقولنا طظ ..في كل البشريه ..ونرجع تاني من الأول ..وكأنك يا أبو زيد ما غزيت.. ودمتم سالمين.

يتبع

**د .أشرف محمد كمال** · 08-01-2013, 14:30

أبيات اعجبتني وذكرتني بشهدائنا
وكأن لسان حالهم يقول

مَا كُنتُ أعْلمُ أنَّ العِشقَ يَا وَطَنى..... يَومًا سَيَغْدُو مَعَ الأيَّامِ إدمانَا

عَلَّمْتَنا العِشْقَ حَتَّى صَارَ فى دَمِنَا..... يَسْرِى مَعَ العُمْرِ أزْمَانًا فَأزْمَانَا

عَلَّمْتَنا كَيْفَ نَلْقَى المَوْتَ فى جَلدٍ..... وكَيْفَ نُخْفِى أَمَامَ النَّاسِ شَكْوَانَا

هَذَا هُوَ المَوْتُ يَسْرِى فى مَضَاجِعِنَا..... وأَنْتَ تَطْرَبُ مِنْ أنَّاتِ مَوْتَانَا

هَذَا هُوَ الصَّمْتُ يَشْكُو مِنْ مَقَابِرِنا..... فَكُلَّمَا ضَمَّنا صَاحَتْ بَقَايَانَا

بَاعُوكَ بَخْسًا فَهَلْ أَدْرَكتَ يَا وَطَنِى..... فِى مَأتمِ الحُلمِ قَلبِى فِيكَ كَمْ عَانَى؟

**د .أشرف محمد كمال** · 03-02-2013, 14:16

(8)

جلس (هنداوي)على أحد المقاهي يشاهد التليفزيون ,و قد جحظت عيناه ,و قال دهشاً:
- ياعيب الشوم ياجدعان ..كده يقلعو الراجل ظلط ملط ..زي ماولدته أمه..!! طب العالم يقول علينا إيه..؟! معندناش معتقلات نعمل فيها كل اللي عاوزينه ..ولامن شاف ولا من درى..!!ولا خلاص معدش فيه خشى ولا إحترام ..ولا عاد فيه إحم ولا دستور..!!ضاعت هيبة الرجاله ياولاد ..وبقينا زي صاحبة العباية السودا بنتقلّع في الشارع عيني عينك..واللي مايشترى يتفرج..!!
ثم نظر فيمن حوله وأشار لهم بأصبع السبابة اليمنى قائلاً:
-كل واحد منكم يتبت في كلسونه وهوا خارج من البيت..محدش ضامن إيه اللي هيجراله في الزمن ده..؟!ومن باب الإحتياط يلبس اتنين تلاته فوق بعض ..ماهو الجو برد وصقعه في طوبه..وياسلام لو يلزقه بغره ..أو بأمير.. عشان ميتقلعش منه.. إلا لو سلخو جلده..!!
ثم هز رأسه في أسى قائلاً:
- صدق إللي قال..مافيش فايده..البلد دي مش هينصلح لها حال..طول ماكل واحد بيقول ياله نفسي..وطول مأحنا مبنقبلش الخساره..من يوم ماتش الجزاير..لأ والله ومن قبل الجزاير كمان.. يمكن من أيام نكسة 67..عمر ما المهزوم بيقول على نفسه مهزوم وبيبقى كل همه إن اللي كسبه يبات مغموم حتى لو من عدوه..راح زمن أنا وأخويا على ابن عمى.. وأنا وابن عمي على الغريب..وجه زمن أنا وعدوي على أخويا وابن عمي كمان..ماتش كوره ايه اللي جايين تقولو عليه.. هو يعقل أن 74 واحد يموتو عشان حته كوره ولا تسوى..!!وبعدين يتحكم على 21 واحد بالإعدام كمان..ويقوم 40 واحد يموتو عشان زعلانين على الواحد وعشرين اللي لسه عايشين..و مامتوش..!!أما إنتو شوية هبل على مجانين..على شوية عيال ملاعين.. لبسين هدوم و وشوش سودا.. منعرفش جايبينها منين..؟!وقال إيه هيولعو في البلد ويقطعو السكك.. ويلبسو العسكر الطُرح..بصحيح ياولاد هي بقت فوضى وسايبه.. ومولد ريسه غايب..!!

يتبع

**د .أشرف محمد كمال** · 03-02-2013, 18:58

(9)

وماهي إلا لحظات وإذاعت القنوات اعترافات الرجل الذي فقد عرضه فأخذ (هنداوي) يضرب رأسه بكلتا يديه وهتف قائلاً:
-لأ و المصيبه السودا ..إن الراجل اللي بعترو كرامته قدام الخلق كلاته ..يستعمانا ويستحمرنا ويقول أن مجرلوش حاجه ..!!وإن العساكر والضباط بتوع الأمن المركزي كانو شايلينه من على الأرض شيل ..!!وكانو بيحتفلو معاه بعيد ميلاده .. أيوه أيوه عشان كده بقه كان لازم يبقى ملط زي أمه ما ولدته ..!! وقال إيه هما إللي أنقذوه من اللي ميتسموش الثوار.. اللي بهدولوه آخر بهدله وقطعوا هدومه ..وكانو عايزين يسرقو محفظته ..واللي معاه ده مكنش ملتوف.. دا كان شمع عيد الميلاد ..والجيركن مكنش فيه بنزين دا عصير تفاح عشان الولاد..!! وهوا عشان كان حمار ابن حمير مكنش فاهم إن الشرطه بتساعده ..فحاول يقاومهم ..لكن الراجل الظابط الله يعمر بيته طبطب على قفاه ..وقاله ياحج ..احنا هنا عشان نخدمك أحلى خدمة..صدق اللي قال إن الشرطه في خدمة الشعب..!!
ثم لطم خديه قائلاً:
- الشرطه رجعت من تاني..عشان تنتقم يارجاله ..بعد ماتعرت يوم 28 ..رجعت عشان تعرينا كلنا والقلم اللي خدته من سنتين هترده لنا قلمين ..وهنقعد على الخازوق المتين..!!
ثم نظر حوله زائغ البصر ,وقد أغروقت عيناه بالدموع ,وأنشد في أسي:
- آآآه ياشعب مش لاقى حد يؤمه.. صفاره تفرقه وكرباج يلمه..وإن فتح بقه يقفلوه بلفه بانجو.. أو يسكتوه برصاصه في صدره..او يهتكو عرضه ..ويسرقو أرضه ..عشان يمد إيده طول عمره..وابن سيده يركب ضهره ..وإن رفع راسه في يوم وقال أنا عاوز حقي..يجبوه لأمه غرقان في دمه.

(يتبع)

**اسماعيل الناطور** · 03-02-2013, 19:11

المشاركة الأصلية بواسطة د .أشرف محمد كمال مشاهدة المشاركة

ثم نظر حوله زائغ البصر ,وقد أغروقت عيناه بالدموع ,وأنشد في أسي:
- آآآه ياشعب مش لاقى حد يؤمه.. صفاره تفرقه وكرباج يلمه..وإن فتح بقه يقفلوه بلفه بانجو.. أو يسكتوه برصاصه في ضهره..او يهتكو عرضه ..ويسرقو أرضه ..عشان يمد إيده طول عمره..وابن سيده يركب ضهره ..وإن رفع راسه في يوم وقال أنا عاوز حقي..يجبوه لأمه غرقان في دمه.

(يتبع)

فينك من زمان يا دكتور ....بس والله ما يكون لنا قيمة إلا إذا قتلنا الخوف
اقتلوا الخوف قبل أن يقتل عقولكم

**فوزي سليم بيترو** · 03-02-2013, 19:50

أقولّك حاجة يا دكتور أشرف ، ومتزعلش
حمادة صابر مواطن بسيط وغلبان
بيقولوله قول كذا بيقول . خايف على لقمة عيشه وعلى حياته .
مثله مثل أي إنسان برتبة عبد المأمور .
أظن أن هناك وزير عبد مأمور ، ورئيس وزراء أيضا
وممكن رئيس يا دكتور . هو هنداوي خايف يقولها ليه ؟

أجمل تحية
من فضلك مر على " مسحول الإتحادية " في العامي .

فوزي بيترو

**منار يوسف** · 04-02-2013, 10:11

يا هنداوي
ليه الناس و لا انضربت و لا اتسحلت و لا كان فيه شهداء في عهد الوزير السابق
فكّر كدة .. العيب فين .. ؟ و ليه الراجل الأمير اتشال من الوزارة و جه بداله مدير سجون
سمعت من زملائي المحاميين و العهدة عليهم .. أن الوزير الحالي متهم في قضية قتل متظاهرين في الأسكندرية مع الظابط المفتري اللي أسمه الكومي
و لأنه مش بيرحم و مش حيكون حيادي زي جمال الدين .. جابوه و قالوا له شوف شغلك
و الراجل مكدّبش خبر و أعطى الأوامر اللي جاية من فوووووق
و دي ناس بتتعامل بالأوامر يا هنداوي باشا
يا حزني على مصر .. بنت تتسحل و يقولوا عباية بزراير و راجل طول بعرض يتعرى و تتهان كرامته أمام العالم كله و يطلعوا يعملوا لنا غسيل عيون .. و اللي شفتوه مش حقيقي
غلبان يا حمادة و غلبان يا مصري و لأمتى حتتحمل أنك متقدرش تتكلم

شكرا لك أخي أشرف

**د .أشرف محمد كمال** · 04-02-2013, 18:16

المشاركة الأصلية بواسطة اسماعيل الناطور مشاهدة المشاركة

فينك من زمان يا دكتور ....بس والله ما يكون لنا قيمة إلا إذا قتلنا الخوف
اقتلوا الخوف قبل أن يقتل عقولكم

منتحرمش من سؤالك يا أسماعيل باشا
أنا عقبال عندك رجعت لمصر عشان أشارك في بنايتها وننهض بيها كلنا
لقيت النهضه عاوزه مناهده وكل اللي عملوهلها ميدان عشان الناس توقف فيه ومتشتغلش
ولقيت حال البلد واقف والنخبه كل واحد واقف للتاني بالمرصاد وصدق الرسول الكريم لما اتكلم على زمن الفتنه كل واحد بيقول ياله نفسي وكله عاوز يلهط من التورته وحزب الأغلبيه سايبها مهلبيه
والداخليه لسه زي ماهيه والبلطجيه بقا ليهم ماهيه والفلول بقم في حزب الدستور والساقطين ويا حمدين بيقولو لأما نبقى ريسه لإما مش لاعبين والمواطن الغلبان لايص وتعبان والإعلام هايص
وألعبان وألف تعبان وتعبان بينفخو سمهم في أم الدنيا بلادي

**د .أشرف محمد كمال** · 05-02-2013, 18:06

المشاركة الأصلية بواسطة فوزي سليم بيترو مشاهدة المشاركة

أقولّك حاجة يا دكتور أشرف ، ومتزعلش
حمادة صابر مواطن بسيط وغلبان
بيقولوله قول كذا بيقول . خايف على لقمة عيشه وعلى حياته .
مثله مثل أي إنسان برتبة عبد المأمور .
أظن أن هناك وزير عبد مأمور ، ورئيس وزراء أيضا
وممكن رئيس يا دكتور . هو هنداوي خايف يقولها ليه ؟

أجمل تحية
من فضلك مر على " مسحول الإتحادية " في العامي .

فوزي بيترو

إنت عارف يافوزي ياخويا إن هنداوي مبيخفش من أيتها حاجه وأيها حد!!
بس ربنا يجعل كلامنا خفيف على بتوع الأمن الوطني
أنا بقيت عضمه كبيره ومش حمل بهدله وبرد الزنازين
كلنا عبيد لله وليس هناك رئيس ومرؤوس
دمت بود ياصديقي

**د .أشرف محمد كمال** · 13-02-2013, 16:27

المشاركة الأصلية بواسطة منار يوسف مشاهدة المشاركة

يا هنداوي
ليه الناس و لا انضربت و لا اتسحلت و لا كان فيه شهداء في عهد الوزير السابق
فكّر كدة .. العيب فين .. ؟ و ليه الراجل الأمير اتشال من الوزارة و جه بداله مدير سجون
سمعت من زملائي المحاميين و العهدة عليهم .. أن الوزير الحالي متهم في قضية قتل متظاهرين في الأسكندرية مع الظابط المفتري اللي أسمه الكومي
و لأنه مش بيرحم و مش حيكون حيادي زي جمال الدين .. جابوه و قالوا له شوف شغلك
و الراجل مكدّبش خبر و أعطى الأوامر اللي جاية من فوووووق
و دي ناس بتتعامل بالأوامر يا هنداوي باشا
يا حزني على مصر .. بنت تتسحل و يقولوا عباية بزراير و راجل طول بعرض يتعرى و تتهان كرامته أمام العالم كله و يطلعوا يعملوا لنا غسيل عيون .. و اللي شفتوه مش حقيقي
غلبان يا حمادة و غلبان يا مصري و لأمتى حتتحمل أنك متقدرش تتكلم

شكرا لك أخي أشرف

بل الشكر لك أخت منار وألف مبروك على كرسي الرياسه
ربنا يعطيكي خيره ويكفيكي شره
وأكيد إنت عرفتي طبعاً هم المسؤلية وتبعاتها
وعرفت أن لا كدا مشكورين ولا كدا مشكورين ومهما عملنا هنطلع مش عاجبين..!!
دلوقت بقى جمال الدين راجل حيادي ومتين ويوم ماجه قالوا ليه شلتو محمد ابراهيم
أهو جه محمد ابراهيم نمبر تو دلوقتي بقينا برضو مش عاجبين..!!
طب يعملوا ايه.. المساكين..؟!
شالوا ألدو جابو شاهين ..الباقيين قالوا مش لاعبين..!!
يافيها يانخفيها..ولو جابولهم انشاله مين..برضوا مش عاجبين..!!
المشكله في ثقافة الشعب والمشكلة الأكبر في جشع مثقفيه
لك الله يامصر.. لك الله يامصر
دمت بخير

**فايزشناني** · 13-02-2013, 16:59

مش ح يحلها غير هنداوي بس لمّا ياخد القرار
" آآآه ياشعب مش لاقى حد يؤمه.. صفاره تفرقه وكرباج يلمه......وإن رفع راسه في يوم وقال أنا عاوز حقي..يجبوه لأمه غرقان في دمه. "
ده أنت قلتها يا هنداوي يا خويا النكسة عملتنا وكسة من 67
واحنا بقينا تعبانين وهمنا كيف نجيب العيش وشوية حشيش
البلد بتضيع يا جدعان بين الفلول والاخوان
كل يوم بيعدي في ناس بتموت ببلاش وعشان كلمة حق
سفيرة أمريكا بتحشر نفسها في كل حاجة
مصري زي هنداوي بيقول : هي مصر بقيت مصريكا
أخي الغالي أشرف
أعود وألتقيك وأنا حزين على ما يجري في مصر
ما يجري ليس صدفة وليس بعيدا عن أيادي الصهيونية
طبعاً نحن من يفسح لهم المجال لإضعافنا أكثر مما نحن فيه
وكل ما يجري في النهاية مهما اختلفت الروايات هو لصالحهم
تأكد في النهاية يا صديقي أن مصابنا واحد وآلامنا واحدة
وأملي كبير أن تنتصر الارادة الوطنية العربية لأن هنداوي في كل البلاد
لن يهنأ له العيش قبل أن ينتصر الحق ويسقط الخونة
أطيب تحية لك ولكل مصري شريف

**د .أشرف محمد كمال** · 13-02-2013, 18:07

المشاركة الأصلية بواسطة فايزشناني مشاهدة المشاركة

مش ح يحلها غير هنداوي بس لمّا ياخد القرار
" آآآه ياشعب مش لاقى حد يؤمه.. صفاره تفرقه وكرباج يلمه......وإن رفع راسه في يوم وقال أنا عاوز حقي..يجبوه لأمه غرقان في دمه. "
ده أنت قلتها يا هنداوي يا خويا النكسة عملتنا وكسة من 67
واحنا بقينا تعبانين وهمنا كيف نجيب العيش وشوية حشيش
البلد بتضيع يا جدعان بين الفلول والاخوان
كل يوم بيعدي في ناس بتموت ببلاش وعشان كلمة حق
سفيرة أمريكا بتحشر نفسها في كل حاجة
مصري زي هنداوي بيقول : هي مصر بقيت مصريكا
أخي الغالي أشرف
أعود وألتقيك وأنا حزين على ما يجري في مصر
ما يجري ليس صدفة وليس بعيدا عن أيادي الصهيونية
طبعاً نحن من يفسح لهم المجال لإضعافنا أكثر مما نحن فيه
وكل ما يجري في النهاية مهما اختلفت الروايات هو لصالحهم
تأكد في النهاية يا صديقي أن مصابنا واحد وآلامنا واحدة
وأملي كبير أن تنتصر الارادة الوطنية العربية لأن هنداوي في كل البلاد
لن يهنأ له العيش قبل أن ينتصر الحق ويسقط الخونة
أطيب تحية لك ولكل مصري شريف

آآآه يا فايز يا أخويا أقول إيه وألا إيه..محنا همنا واحد..!!
وعدونا كمان واحد..واللي مكتفنا ومسلسلنا كام واحد
واللي باعونا وخانونا ميت واحد واللي ضحكوا علينا وشمتوا فينا ألف واحد
واللي مستنينا لما نقع عشان يقسم فينا و يبعنا ويشترينا مليون واحد
لكن مش بعيد على الواحد إن يحمينا الواحد الأحد
ويمكرون ويمكر الله والله خير الماكرين

**د .أشرف محمد كمال** · 19-02-2013, 11:40

(10)

جلس (هنداوي) على أحد المقاعد الخرسانية في الميدان أمام مجمع التحرير, والابتسامة ملئ شدقيه .ثم هرش في رأسه حتى مالت عمامته على أحد جنبيها ,وقال :
- ياحلاوه ياولاد..بقى هيبقى كمان في الميدان مليونيه الملط..؟! اتاريني بقول ليه الحركه زادت اليومين دول..!!وناس يامه بتورد على الميدان من كل صنف ولون ..والقهاوي والغرز بقت مفتوحه في كل جنب كده عيني عينك ..والحشيش والبانجو بقى بينباع على عينك ياتاجر ..وبقى كل واحد جايبله كرسيين بيأجرهم بالساعه للي عاوز يقعد ..زي مابيحصل على البلاجات في المصايف..!!وأسألهم ليه كل ده ..؟! يقولولي أصل فيه مليونيه جديده هتنعمل للملط..قولت الله هوا الراجل المحترم بتاع الجهاز المركزي للمحاسبات جودت بيه الملط..ناوي يرشح نفسه في الإنتخابات هوا كمان..!! يضحكوا ويتنأوزو عليا ويقولولي جودت بيه مين ياعم هنداوي اللي جاي تقول عليه .. ماراحت أيامه ولياليه..دي مليونيه القالعين ملط..قلت الله هما الرجاله كلهم عاوزين يطلعو من هدومهم زي الواد حماده اللي فضحنا الله يفضحه..هو واللي وراه..؟! ضحكو تاني عليا و قعدو يغمزو لبعض و يتوشوشو..لحد ماواحد طيب منهم..قالي في ودني..لأ دول مش الرجاله المرادي..الدور جه على الحريم..حالفين ليقلعو ملط في الميدان..لو الريس ممشاش..!! قمت رايح زغده في صدره ..و قلتله أقطم ساكت ياوله..جاك قطع لسانك من لغلوغه..نساوين مين اللي يتعرو..؟! هوا احنا خلاص بقينا في اليونان.. و لا أمريكان ..اللي بيتعرو في كل مكان ..إياكش يولعو كلهم في نار جهنم ..؟! إحنا ستاتنا أشرف من الشرف..!! دا الست عندنا كان جوزها مبيشوفش وشها لحد ماتموت ..و ديل جلبيتها بيمشي يجرجر في التراب عشان كعبها ميبانش..تقوم تقولي ستات مصر هيقلعو ملط.. و يتعرو قدام اللي يسوى و ميسواش..؟! دول أكيد مش من مصر..!! يإما دول شوية الغوازي اللي في شارع الهرم..ولا الستات السكه ..اللي موجودين في كل زمان ومكان..و بيتاجرو بعرضهم ..و بيتعرو لكل من يدفعلهم ..!!و اللي بيأجروهم كتير ..واللي بيبيعو و يشتروا فيهم أكتر..!!ماهو كل اللي بيبيع شرف أمه..ماتصعبش عليه بلده.. وأكم من قرني..عاوز يبيع البلد دي..!!

يتبع

هنـداوي في الميـدان

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

ما الذي يحدث