مسابقة مارس للتواصل والإبداع ووسام نجم الشعر

**نهى رجب محمد** · 04-04-2011, 10:25

كان ياما كان

كان ياما كان كان فيه دوار
والعمده أولاده كتار
خضره وناعسه وست الدار
كبروا وزرعوا الأرض خَضار
------------
نهى رجب محمد

**سميرة ابراهيم** · 05-04-2011, 06:56

يا بلادي يا تاج البلدان
يا موطن الابطال الشجعان
اسود الاطلس والمجد والأمان
يا حرة الله صاينك من زمان

**محمد فتحى السيد** · 05-04-2011, 10:26

الأعزاء الكرام
الشعراء والشاعرات المبدعون
نجوم شعر العامية
لكم جزيل الشكر ووافر التقدير لتواصلكم النبيل
وابداعكم الرائع الجميل
على مدى 15 يوما من أروع وأسعد الأيام
شكرا من القلب لكم جميعا

من الان إن شاء الله تبدأ أعمال التصويت من قبل المشاركين
وأعمال التحكيم من قبل السادة أعضاء لجنة التحكيم
وبعدها يتم إعلان النتائج
تشاركون جميعا في التصويت الان
بالطريقة التي أعلنها فى البداية
أخى الشاعرالأستاذ / جمعة محمد

أمنياتي بالتوفيق والفوز للجميع
وتقديري ومودتي
*******************************
وأهدى وافر تقديرى واحترامى لمن شاركونا التألق
وكانوا ضيوف شرف و فاكهة المسابقة
وهم خارج المنافسة تماماً
بترتيب المشاركات وبعيداً عن الألقاب
جمعة محمد
سيدة الشولى
جمال عمران
ماجى نور الدين
محمد فتحى السيد
********************
وشكر خاص للمبدع الكبير
الأستاذ / صادق حمزة منذر

**جمعه محمد** · 05-04-2011, 18:29

السلام عليكم ورحمة الله وبركاتة
كل الشكر والتقدير لاخوانى الشعراء والشاعرات المبدعون والمبدعات
لقد ابدعتم وامتعم وتواصلتم بقلوب عامرة بالحب فهنيئا لنا تواصلكم
ادام اللة حبنا وتواصلنا جميعا
كل الشكر والتقدير لك أخى شاعرنا / محمد فتحى السيد
على ما بذلتة من جهد جعلة الله فى ميزان حسناتك
كما اشكر شاعرتنا القديرة /سيدة الشولى
وشاعرنا الكبير / صادق حمزة منذر
والاعلامية القديرة / ماجى نور الدين
كما اود ان اضيف الى من هم خارج المنافسة وكانوا لاجل التواصل مع إخوانهم أختنا الفاضلة / سميرة إبراهيم
لها كل إحترام وتقدير
وكما ذكر أخى الفاضل / محمد فتحى السيد
رأينا ان يكون نظام التحكيم والتصويت من خلال لجنة التحكيم ومن خلالكم انتم المشاركون بالمسابقة
وسيتم بالنسبة لكم كالاتى:
على كل شاعر وشاعرة( من الاخوة والاخوات المشاركون بالمسابقة)
اختيار عدد 4 مشاركات تكون من وجهة نظره
(الأفضل)
مشاركة واحدة من أشعاره (1)
وثلاثة من إبداع الآخرين (3)
وستضاف هذه المشاركات إلى الشعراء فى النهاية
وتمنياتي بالتوفيق والفوز للجميع

**جمعه محمد** · 05-04-2011, 18:43

لجنة تحكيم مسابقة مارس للتواصل والابداع
ووسام نجم الشعر
مكونة من الساده الأساتذة الشعراء المبدعين
(الشاعرة الاستاذة/ سيدة الشولى ) (الشاعر الاستاذ / صادق حمزة منذر)
(الشاعر الاستاذ /عبد الرحيم محمود ) ( الشاعر الاستاذ /ركاد حسن خليل )
(الشاعر الاستاذ / محمد عزت الشريف )
لهم خالص الشكر وبالغ التقديروالامتنان

**محمد فتحى السيد** · 06-04-2011, 08:11

[align=center]
شكرا لك أخى الحبيب
[motr1]الشاعر / جمعة محمد [/motr1]
على التنويه الرائع وابراز كل التفاصيل الخاصة بالمسابقة
وتوضيح كيفية التحكيم والافصاح عن أعضاء لجنة التحكيم الأفاضل
شكرا لك من القلب ولك محبتى والورود

[/align]

**محمد فتحى السيد** · 06-04-2011, 08:31

[align=center]

تفضل الشاعر المبدع الأستاذ جمعة محمد

بالأعلان عن السادة أعضاء
[/align]

لجنة تحكيم مسابقة مارس للتواصل والابداع
ووسام نجم الشعر

وهى مكونة من الساده الأساتذة الشعراء المبدعين
(الشاعرة الاستاذة/ سيدة الشولى )

(الشاعر الاستاذ / صادق حمزة منذر)

(الشاعر الاستاذ /عبد الرحيم محمود )

( الشاعر الاستاذ /ركاد حسن خليل )

(الشاعر الاستاذ / محمد عزت الشريف )

لهم جميعاً خالص الشكر وبالغ التقديروالامتنان
وأجــمــل بــاقــات الــزهــــور

**جمعه محمد** · 06-04-2011, 18:27

كل الشكر لكم إخوانى شعراء وشاعرات العامية المبدعون
وهذة الصفحة خاصة بتصويت السادة أعضاء لجنة التحكيم
ولكم انتم إخوانى المشاركون بالمسابقة صفحة أخرى للتصويت
واختيار 4 مشاركات واحدة تخصك وثلاثة لشعراء أخرين بالمسابقة
فلكم جميعا خالص ودى وبالغ تقديرى

**محمد فتحى السيد** · 07-04-2011, 12:02

هنا تجميع مشاركات مسابقة مارس لسهولة التصويت من قبل الأعضاء

الأخوة والأخوات نجوم شعر العامية

من أجل المحبة ومد جسور التواصل والإبداع

شـاركـونا فى التصويت لإختيار الفائز
فى
مسابقة مارس للتواصل والإبداع ووسام نجم الشعر

وهذا تجميع للمشاركات بترتيبها لسهولة التصويت
********************
1/ الشاعرة نجلاء نصير

نور شمس الحرية بان
حررمصر اشهد يا زمان
وماعدش للطاغي مكان
يشهد علي ثورتنا ميدان
*****************************
يا راوي غني وقول
واحكي قصة بهية عل الأرغول
مصر يناير خمسة وعشرين
ثورة شعب بالملايين
*************************
ربطنا الايد ف الايد
والطاغية أهو غاربعيد
ارفع راسك يامصري احنا احرار
لازم نبني بلدنا بسرعة يا ثوار
***************************
بقلب مفتوح وصدور قوية
شهداءنا قالوا كلمتهم يا أبيّة
بدمنا طهّرنا أرضك من كل خطيّة
أنت يا بلدي عروس الليلة ديّ
************************
كلنا بحب الوطن مغرومين
ومين بعد الثورة هيقدر علينا مين
دا احنا لبهية عاشقين
وبدم الشهيد متحنيين
واللي ناوي يحنينا هنقسمه نصين
*******************************
نصرنا ف ثورتنا رب العالمين
وشعبنا معظمه مظلومين
وبالصبر أصبحنا منتصرين
ليه نخترع فزاعات وناس مجهولين
**************************
نورورحمة وريحان
لدم الشهيد اللي حطم القضبان
وفتح لنور الحرية طاقة كمان
علشان ترفع راسك يا انسان
************************************
نار الفساد تحرقهم
ونور الحق يسبقهم
والساقية لازم تدور
علي عزمي وبطرس وسرور
*******************************
لا مال ولا جاه ينفع يوم حساب
وفين كان صوت الحق لما العقل غاب
و اتسد في وش المظلومين كل باب
الكل هيتحاسب كبير وأذناب
*****************
نصر رب العالمين موسى على فرعون
وثورة التحرير صحوة هزت الكون
والحق مهما ضاع لابد يرجع يوم
وينعدل الميزان بنصرة المظلوم
********************
مرحب وأهلا بسيدة الشولي
علمينا يا ست الحرف واطربينا
والمعاني الأصيلة \فهمينا
مسير الحق يعلا وينور خطاوينا
*********************************
تسلم الموهبة وصاحبتها
اللي كلنا نسعد بصحبتها
نشارك الثورة فرحتها
ويحفظ ربي نصرتها
*****************************
تحايل وكذب شوفوا الندالة
وبيع الذمم دلوقتي استحالة
لو القضا باع منين تيجي العدالة
كلها ألاعيب شيطان بدماغ شغالة
*********************************
نقول كلنا بنحبها دي أصيلة
لملمت ولادها وجمعت العيلة
وف ثورة التحرير ايد واحدة يا حليلة
هنوا يلا واعملوا هيصة وهليلة
********************************
الله على بلادنا ف عيوننا شايلنها
وأقسمنا كلنا نحفظ تراب طينها
من أرضها يطرح عمار خيرنا
ومن نيلها أحلى ميّة تجري ف شرايننا
********************
هو البعيد عمره فكر
إن الشعب يوم يقرر
يغير تاريخ مصر ويسطر
يحكي بسلمية ويعبر
****************************
أول القصة فساد
استقووا بجبروتهم ع العباد
وأول ما انكشفوا خربوا البلاد
ونسيوا اننا والحق على ميعاد
*******************
ترقص مصر الولادة من فرحتها بشهدائها
حنت كفوفها بدمهم وفتحوا للحرية بابها
حد شاف كده ياولاد محلى ثوارها
حلفوا يحرروا أرضها ويبنوا ديارها
******************************
ضي النهار ف رضاكي يا ست الكل
قلبك عمار طارح ورد وفل
مش بنسى دعاكي ياغالية ربي يحبب فيكي الكل
وتبقى سيرتك يا بنتي قمر ف السما بيطل
*************************
رحمة ربنا بينا ثورة تهب تهدينا
ونمشي ويّاها وتنور خطاوينا
والحق لازم يبان ويظهر لينا
والفساد تنقطع رؤوسه من أراضينا
*****************
يمر مشرط عمّال يشرط
ف عقل أمة يشّرح ويظبط
ولما تثور عليه العقول
يعلي صوته ويتنطط
************************
هقول الحق وأفضل أقول
وأحكي القصة على الأرغول
وأشرق وأغرب بلادي بطول
حلفنا نصونك على طول
*************************
سوس الفساد ف السلطة نخر
وف عمر الرياسة نحر
والظالم من ظلمه فجر
و اتجنن من كذبه وانفجر
************************
همة ولمة وثورة فتحت للحرية طريق
مسلم مسيحي ايد واحدة وقت الضيق
وبعد الثورة والحرية راح نعبر ألف مضيق
ودم الشهيد روى مجدنا بلون العقيق
*************************
كان حلم جوانا نعيش أحرار
وحققناه بإرادة ربنا و الثوار
وكل مصري من النصرصنعله سوار
يارب احفظ بلدنا من كيد الأشرار
*********************
ألمنا نسيناه مع نصر حققناه
دوقنا طعم الحرية لمنتهاه
حرمنا منها زبانية الطغاة
نشكر ونحمد ربنا على النجاة
*****************
يسلم لسان الشولي
قولي يا ستنا قولي
م اليوم حلفوا ولادي
يقطعوا ايد كل عادي
********************
طموحنا كان نهد الفساد
وبالارادة الحق عاد
ودستورنا يوزن البلاد
وتحصد ثورتنا الأمجاد
**************************
حريتنا شيء جميل
مشينا عشانها مشوار طويل
وصوت العقل ملهوش بديل
وبعد اليوم مفيش مستحيل
***********************
ننسى مين قال مين
ثورتنا قايدة من سنين
وتحريرنا يشهد يا مساكين
نسيبها طيب ونروح فين
************************
درب الحرية طريقه طويل
وقلب الثوار ما يشوف أضاليل
لا يخاف من ديب ولا عويل
شرب العزة من نهر النيل
******************
رحمة ونور على الشهدا
نصرونا على البعدا
وعلوا الهمة من تاني
بدمهم الطاهر الروحاني
********************
يا أم الشهيد يلا اتحني
وبزفافه للحور اتهني
دا بدمه نور لي حياتي
فتح طريق ليا واخواتي
**********************

**محمد فتحى السيد** · 07-04-2011, 12:25

[align=center]

2/ الشاعرة أسماء المنسى

ناس بتساعد في الدمار
وناس بتقتل في الثوار
ده أحنا شعب شاف العار
وهياخذ بثأر الأبرار
***********************
روح قول للحاكم هنجيلك
وهناخد حقنا بالذوق
لساك فاكر ، خايفينك؟!!
لا أصحى و فوق
**********************

رايه الحرية تايهه
لسه في أصوات ضايعة
ناس بتقول اه –نعم- كده وخايفة
وناس بعلو الصوت بتقول "لا" كده وواثقة

*************************
هزينا راسنا خلاص
بعدما اتضربنا بالرصاص
وقولنا "نعم" هي الخلاص
سقطت الثورة خلاص

نجحوا يصدروا عقولنا

ويهدموا أفكار ولادنا

كلمة "نعم" علمونا

وإن قولنا "لا" يعلقونا

*********************

نص إخوان متفرعنين

نص أحزاب قال إيه وطنيين

والشعب ضايع ما بين الاتنين

مقدرش يقول غير نعمين

لتعديلات ميعرفش اخرها فين
*************************

نايمين على ودانكم خلاص ؟ !!

لساكم متعلموش

إن العلام مش في الكراس

وديته ولادنا بلاش

فكركم "نعم" هي الخلاص ؟ !!

راح بالمداس تناداسوا

وبالتراب تتساوا

هتشوفوا إخوان مفهومش إخلاص

و وطنيين متحصنين بالرصاص

هتشوفوا كمان سنين عجاف

طول مانتم خايبين يا ناس

*******************

اولادنا قالوا كلام

مخلوش للظلم مكان

والحق اهو كمان بان

طالبوه بثورة قوية

وكانت سلمية سلمية

******************

تربسنا الزنزانة بالترباس

متحاولش تهرب تاني خلاص

صحينا يا "عدلي" ضمير الحراس

ولو فكرت تهرب تاني هيضربوك بالرصاص

***********************

تسمحوا لي

تسمحوا لصوتي يخرج من السكوت

ويقول يا حرة بعلو الصوت

من يومه دايما كان مكبوت
ودلوقتي
قال يتكلم قبل الآوان ما يفوت

*******************

دايخين يا ولاد على الدساتير

دستورنا قديم ساقط جوا البير

لا هينفع فيه تعديل ولا ترقيع

*********************

هنرفع رآية الحرية

ونحقق عدالة إجتماعية

ونطبق كمان الديمقراطية

هننسى الأحكام العرفية

وهدمنا الدولة العسكرية
فضلنا نقول سلمية
لغاية ما حققنا مطالبنا الشرعية
******************

نرجع تاني محناش خايفين

ميدانا باقي / الخونة فين

فاكرين راح نسكت ونطنش

لا فوقوا وأعرفوا بتكلموا مين

ميدانا باقي/ وإنتم فانيين
******************
ناس بتهد في الأضرحة
وغيرهم يبنوا في الأمجاد
ربي يهد اللي بيبني في الأحقاد
*****************

لساهم فاكرين

إنهم بيحموا الدين

وإن النصر بهدم السيدة والحُسين

بيقولوا إنهم سلفين
لكني بقول مش هما دول الدين
****************
ناس فاكرين إنهم مسلمين
وبيقولوا عايزين
نرضي رب العالمين
و هما ما يعرفوش الدين
******************

لساه مشوارنا طويل

شعبنا تاه فيه فـ الليل

ما بين أحزاب متأسلمين

ولسانا مش عارفين
هيودونا على فين
********************
ياما كنت في حبك بعادي
وأقول مش هي دي بلادي
كنت رسماكي في خيالي
أحلى بلد يا بلادي
ودلوقتي بقولك
أنا بحبك يا بلادي

**********************

[/align]

**محمد فتحى السيد** · 07-04-2011, 12:27

3/ الشاعرة أسيا رحاحلية

فوق يا اللي نايم في الهم يا مقهور
الشمس أهي طلت جايبه الدفا والنور
حس بحرارتها.. اسمع صداها يقول
استنى يا ظالم أهو جاي عليك الدور
*****************************
احنا عشقنا مصر من وحنا لسه صغار
كنا نحس بمصر هي الحُضن و الدار
مهما جرى يا مصر تبقي ف عيونا منار
**************************
هوّن عليك لا تقول خاب ف الوطن ظنّك
الظلم جاء منهم ...موش منيّ و لا منّك
ايدك ف ايدي نعيد لبلادنا فرحتها
ابدأ بعهد جديد وارمي الحزن عنك
*************************
متحنيّه بدم الشّهيد يا تربة الميدان
ارواح زكيّه رفرفت عالي ف سما الرّحمن
ضحّت عشان الحق يعيش..
لأجل الظلم ما يلاقيش..
في بلادي له مكان.
************************
هبّت على أرض العرب ريح الكرامه
صحّت نفوس عاشت سنين ساكته مُضامه
هي دروس يا اللي الفساد شرعك و دينك
الحق و فوق قبل ما تذوق كاس الندامه
*********************

**محمد فتحى السيد** · 07-04-2011, 12:29

4/ الشاعر وليد الوصيف

ألم وقهر وظلم وفساد
كانوا فى سطور تاريخ العنيد
حول بهية سلعه فى مازاد
بس اشترها الشعب المجيد
*******************
طال الخطر الطفل والعلم
فى بلد اتعلم منها الأمم
وعمر البعيد لا شال هم
ولا فكر حتى أنه خان وظلم
**********************

تمر السنين على الفاسد نعيم
ويسمح للظلم يكون شعاره
ويصدق كذبه عاشها سنين
فارس مش هيخسر يوم مكانه
****************************
كافح يا شعب واسترد أمجادك
وأطوي صفحات العصر اللي عدا
وامحيه كمان من ذكرياتك
وأبني وعمر في أقل مده
*******************************
همشي في طريقي عدل
وأطلب خدماتي ببساطه
ولازم زمن الرشوة يتقتل
هو وأخوه زمن الوساطه
***************
نار في قلب أم الشهيد
تحول عتمة الليل نهار
تحرق كل بلاد الجاليد
تخلي الجبان ينضم للثوار
********************************
نلون بدم الشهيد كل شفايف الصبايا
لجل يظهر جمالها في ليل عتمه حالك
دا دم شربات بلون الفرح في عرس الصبايا
يروي مصر من القرى لحد الزمالك
*******************
رحلة عمري كانت مر
تلاتين عام وأنا مش حر
علشان كده دلوقتي أنا خايف
أبقي في حلم ساعات ويمر
**************************
دايماً أجمل صبايا الأرض في الكون كله
يا قليل عليكِ لقب المحروسة وأم الدنيا
يا أم حباله في بشر يتحملوا الشقي وذله
وعمرك مطاطيتي رأسك ولا حتى ثانية
***********************
تمام ولا مش تمام
أصل أنا لسه خايف
الجحر لسه فيه فيران
وأعمه اللي مش شايف
****************************
ناس يا أسماء في الوهم عايشين
وهما لا إخوان ولا سلفين
هما مجرد شلة وحوش منتفعين
هدفهم المال والكرسي الحصين
****************************
والله لا فهمين ولا عارفين
يعني أيه طريح الحُسين
أنا شايفهم ناس مساكين
رصاص..لكن الموجه مين ؟
*******************************

**محمد فتحى السيد** · 07-04-2011, 12:30

5/ الشاعر عقاب اسماعيل بحمد

باقي الوطن كل الزمن = مع شعب صامد حر
صال التاريخ وجال = الغازي سقينا المر
بساح العروبة رجال = لو كان حاكم غر
*************************
أمى رضاكى زخيرتى وزادى
أجمل زمن بالعمر ايامك
هديتك حنانى وحب اولادى
الجنه ونعيمها تحت اقدامك
********************

**محمد فتحى السيد** · 07-04-2011, 12:46

[align=center]
6/ الشاعر د. صبرى اسماعيل

هتقول لناسك{ انا} وانت ولا حاجة
وتخدع الناس ورغم الناس محتاجة
دامسير كلامك ينكشف لو بعد
سنين تفوّق حقيقة ساكنة تلاجة
****************

هيّص وفرفش ولا يهمّك من الأيام
إياك ف يوم تتخدع أو يخدعوك بكلام
أو يوم تموت فى الامانى بجدّ
ولا حكمة يوم تنفعك ولا الدموع وملام
*******************

مشرط وعمّال يلعب جوّه أحشائى
يمر بالكِبد ثم القلب وامعائى
ندهت له قلت ليه قال لّى
قلبك خدعنى ليلى وصبحى ومسائى
******************

على كل نخله بلح زغلول رطب أمهات
مختلفة عن بعضها بين طعمها مسافات
بصت على أرضنا قالت بكل دلال
مين اللى هيهزّنى وأنزل عليه بركات
******************
[/align]

**محمد فتحى السيد** · 07-04-2011, 12:53

7/ الشاعرمحيى الفقى

راح النظام وابتدينا نحس بالراحة
وطل ورد الميدان من ارض طراحة
بكل راحة بيرسم عصر غير العصر
وبفرحة النصر بانت مصر عالساحة
****************
هواك يا فجر الامل نسم علينا وطل
والحلوة بان عزها بعد الزمان المر
كل اللى صان عرضها قاعد على نيلها
اما اللى خان ودها راقد هناك فـ الطل
*************
كفاية وارحل بقى خلى المكان يخضر
لكل ظالم نهاية والزمن بيغـُر
لو كنت فالأصل حـُر مكانش دة حالك
لا زال مكانك ولا كنت ارتميت عالمر
************************
قادر يـ دم الشهيد تروى الربيع الجى
دفعت روحك تمن لجلن نشوف الضى
ويخرج الحق من غى الضلال والزور
ويشمل النور ف أرضك كل كائن حى
****************

مسابقة مارس للتواصل والإبداع ووسام نجم الشعر

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

ما الذي يحدث