هنــــداوي في المعتقــــــل (متجـدد)

د .أشرف محمد كمال · 22-07-2013, 16:38

(5)

مكث (هنداوي) في الغرفة المظلمة بضع ساعات , مرت عليه كأنها أيام و ليالي مارسوا معه جميع صنوف التعذيب و الترهيب , بدأوا بإطلاق الخفافيش , و الصراصير ثم الفئران و الثعابين السامة.. فضحك (هنداوي) ضحكة مجلجلة ؛ فدهش كافة الضباط الذين يراقبونه طيلة الوقت و اصيبوا بالإعياء رغم أنهم يجلسون على مكاتبهم في غرفة مكيفه بها إثاث وثير, و سرير مريح ؛وظنوا فيه خبالاً, لكنه قال:
- إيوه.. إيوه.. إيوه..بس أنا كده عرفتكم..!!إنتو بتوع برنامج رامز عنخ أتون ..اللي بيجي في التلفزيون..و إنتم حبّسني هنا في المقبره ..أمال فين الموميا بتاعة الفرعون..؟! أنا شفت حلقه منها من كام يوم لما شغلتولنا التلفزيون..عشان نشوف البرامج الهايفه دي ..والمسلسلات اللي شغاله طول اليوم..عشان تنسونا ربنا ..أو إننا نفكر في اللي بيحصل في اخواتنا اللي نايمين لاحول الله في الميادين..وتغطو على عملتكم السوده بتاعه قتل الناس اللي مصليين الفجر..الاهي ربنا ينتقم منكم ..أنتم و إلهام شاهين.. و غاده عبد الرازق ..و هاله سرحان ..و لاميس الحديدي و ايناس الدغيدي.. و رغده في يوم واحد..ياشواذ ياولاد ال....!!
وما أن ذكر (هنداوي) كلمة الكلب حتى اغتاظ أولائك الضباط الأشاوس , و توعدوه و أصدروا الأوامر للصولات و العساكر فذهبوا على الفور لتنفيذ الأمر . تنبه (هنداوي) فجأة على صوت باب يفتح في أحد أطراف القبو و صوت زئير أسد هصور فهتف جزعاً:
- لأ ..و حياة أبوكم..كله إلا الكلاب بتاعتكم..!! أنا ياما سمعت عنها من ناس كتير..كلاب بنت كلاب بصحيح ..متعلمه قلة الأدب ..واللي مدربها كلب ابن كلب..آه ياولاد ال... هيا ناقصه تعملوا فينا كده على آخر العمر..؟! دا الموت أهون ياولاد ..ولا يضيع شرف الواحد على ايدين حته كلب ..طب ابقو خلوه يقرب مني ..و أنا أكله بسناني..!!
فجأة أضيئت الغرفة حتى عميت عينا (هنداوي) فأغمضهما في سرعة و فتحهما بالتدريج فوجد عشرات الكاميرات تقوم بتصويره و العديد من الميكرفونات و إحدى المذيعات تضحك قائلة :
- كل سنه وإنت طيب ياعم هنداوي ..رمضان كريم..إحنا كنا بنعمل فيك مقلب ..وصورناه وهنذيعه في التلفزيون في شهر رمضان ..تحب نذيع علشان نفرح الناس ..ولا لأ..!! لو قلت مش هنذيع ..مش هنذيع..!!
بهت (هنداوي) و جحظت عيناه , و أخذ يتلفت فيمن حوله في ذهول غير مصدق لما يحدث . ثم انطلق يبكي ويضحك في آن واحد , و قال في هيستريا:
- معقوله دا كله كان مقلب ..؟! بصحيح إنتو ناس هايفه ..ولاد تيت فعلاً..!! بقى تعملوا كده في الناس الصايمه في الشهر الكريم.. عشان تضحكو الناس ..وتقبضو فلوس من الإعلانات..؟! إلاهي تتحرقو كلكم بجاز وسخ..بجاز ليه..؟! هو حد لاقى الجاز اليومين دول..!! إلاهي وأنت جاهي تتحرقو في نار جهنم يا بعده..!!
فتصنعت المذيعة الغضب , و اوقفت التصوير . ثم اقتربت من (هنداوي) و همست له في أذنه:
- متنساش إنك هينوبك من الحب جانب ..و هتقبض مبلغ و قدره ..عشان الحلقه دي تتذاع ..بس لازم تمضي لنا على الاستماره دي..!!
ثم أخرجت حقيبه مملوءة بالنقود , و استماره زرقاء . فشرد (هنداوي) و أخذ يحدث نفسه قائلاً :
- وماله ياد ياهنداوي ..ماتاخد الفلوس ..يعني هيجرالك إيه أكتر من إللي جرالك..؟! و أهو ده رزق و ربنا بعتهولك..!! ماهم بيقولو رزق الهبل على المجانين..!!
أخذت المذيعه تعد رزم النقود , و تضعهم في يد (هنداوي) حتى وصلت إلي مئة ألف.ثم أعطته الاستمارة كي يوقعها . فقال لها (هنداوي) بكل إباء و شمم:
- أنا مابمضيش ..أنا ببصم بس..!!

يتبع

د .أشرف محمد كمال · 20-07-2013, 16:42

(4)

تم عزل (هنداوي) هو الآخر عن باقي المعتقلين كي لا يؤثر عليهم بكلامه الرافض قطعاً لحكم العسكر أي كانوا..فتم وضعه في غرفه تامة الاظلام لا يدخلها ضوء الشمس ولا تنيرها الكهرباء وحينما أفاق (هنداوي) في محبسه الانفرادي لم يدر إن كان في جنح الليل أم في وضح النهار فهتف قائلاً:

- يا هلله ياللي هنا حد يعبرنا..هوا أدان الفجر إدن ولا لسه ..؟!حكمن أنا معدتش عارف الليل من النهار وآخر حاجه فاكرها العلقة السخنه اللي خدتها ..والراجل ده اللي قاعد يقول نفسي..نفسي..ياما نفسي أنك تأخدلك علقه زيها ..عشان تحرم الغنى طول حياتك..!!
فرك عينيه يحاول أن يستبين طريقه في الظلام ثم خطر في ذهنه خاطر فسأل :

- طب احنا هنصوم إزاي..كده من غير سحور..ولا حتى بق ميه..طب حد يولع لنا نور.. عشان نشوف الحته اللي مرميين فيها..ولا النهضه وصلت عندكم انتم كمان ..والكهرباء بقت بتقطع في السجون..!!
أخذ (هنداوي) يتحسس الأرض الرطبة من حوله يحاول أن يهتدي إلى مكان الباب أو إلي طاقة نور ثم هتف قائلاً:

- ياجاي ياهو ..أنا والله العظيم مش إخوان ..ولا ليا في الأخونه.. وكنت من كام يوم بشتم في الريس مرسي عشان البنزين والكهربا..لكن اتضح لا حول الله إنه مش هوا سبب الاتنين ..بدليل أن لسه وزير البترول والكهربا موجودين في الحكومه الجديده ..!!آه ماهم أكيد ده مكافأه ليهم على اللي عملوه طول السنه اللي فاتت ..و كرهو الشعب في أم الإخوان..!!
بح صوت (هنداوي) من النداء والاستجداء وما من مجيب حتى بلغ اليأس به الأعناق فقال في أسى:

-يا إخونّا أنا لا ليه في السياسه ولا دياولو..ولا يهمني إذا كان الريس مرسي هيرجع.. ولا إن شاله عنه مارجع..أنا كل اللي مزعلني هوا بهدلة الناس كل شويه في طوابير الانتخابات.. مره عشان الاعلان الدستوري بتاع مارس ..وبعدين في انتخابات مجلس الشعب اللي حلّوه..والشوري اللي دلوقتي لغوه..والرئيس اللي عزلوه..والدستور اللي قالولنا بلوه واشربوه..طب ماكنتو تقولونا كده من الأول ..على كل اللي عاوزين تعملوه..؟ّ بدل اللف والدوران دا كله..!! يعني كان فيه حد هيصجر يقولكم تلت التلاته كام..؟!
ثم نظر (هنداوي) إلي أحد أركان الحجره كمن يحدث أحدً لم يكن موجوداً حتى ارتجف ضابط المخابرات الذي كان يراقبه بكاميرا رؤية ليليه خشية أن يكون قد رأه وعرف أنه يراقبه ؛ وقال:
-أنا عارف ..انكم ماكنتوش عاوزين ثوره ولا يحزنون ..!! كل اللي كنتو عاوزينه .. ميجيش رئيس مدني تدوله التحيه الميري ..حتى ولو كان ابن الرئيس المخلوع.. وعشان كده كان نفسكم شفيق ينجح في الانتخابات اللي فاتت.. ولما خفتو إن الموضوع يبقى مقفوش ..بعد كل اللي عملتوه ..والعساكر اللي خلتوهم يدوا أصواتهم إجباري ..والبطايق اللي كانت بتطبع بالميات لنفس الإسم ..وحكاية تسويد البطاقات اللي معرفتوش تحبكوها ..!! وخفتم للبلد تولع لو زوّرتم النتيجه .. قمتم قولتو مش مشكله.. نسيب الإخوان تمسك شويه.. ونفشّلهم ..وبعدين نطلع الرجاله بتوعنا في الوقت المناسب .. لما نكون ضحكنا على الناس الغلابه ..بعد ما نوقفلهم في باب أكل عيشهم..قوم ايه..؟! قال ايه ..؟! قامت ثوره..!! هأوو ياجيش.. أحلى من الشرف مافيش..!!

يتبع

د .أشرف محمد كمال · 20-07-2013, 12:19

(3)

ابتسم (هنداوي) للمرة الأولى , و هو في المعتقل عندما سمحوا لهم أن يتفرجوا على قنوات التلفزيون في احتفالات يوم العاشر من رمضان , و قال ساخراً:
- أنا طول عمري بتشائم من شهر يونيو معرفش ليه..؟! رغم إني مولود فيه..!! يمكن عشان نكسة 5 يونيو..!! كمان جتنا وكسه تانيه في آخره ..!! وقال إيه بيقولو عليها ثوره شعبيه..؟!هوا يعني عشان المخرجين بتوع السيما ..طلعو يصورو بطيارات الجيش.. و أخرجو فيلم ولا بتاع هوليود.. بقت ثوره شعبيه..امال ليه مبيصوروش في رابعه العدويه..؟! و قفلو كل القنوات التانيه ..حتى الجزيره بيشوشرو عليها..هما لسه خايفين.. من ايه بقه ..؟! ماكل حاجه بقت في ايديهم.. و بيعملو في البلد كل اللي عاوزينه..!! ليه عايزين يحسنو صورتهم.. و يغمو الحقيقه عن العالم كله.. وعن جرايمهم .. مش كفايه إنهم قتلو المصلين من ضهرهم.. وهما في الفجر بيصلو..!! .. و مبيفرقوش بين راجل عجوز ..ولا ست ولا حتى عيّل ..حسبنا الله ونعم الوكيل..!!
نظر له أحد الصولات شذراً , و أخذ يضرب بالهروة التي يحملها راحة يده..فازدرد (هنداوي) لعابه ,و رفع عقيرته قائلاً في خوف :
- إحنا هنا في المعتقل عايشين مبسوطين آخر حلاوه.. و بصراحه بيعاملونا أحسن معامله ..وهما ناس ذوق ..ذوق ..ذوق ..دا حتى بيفرجونا ع التلفزيون..!!
ثم همس قائلاً لنفسه:
- بس بيفرجونا ع القنوات بتاعتهم هما ..ماهو أصل الريموت معاهم.. قناة المحور بتاعة حسن بيه راتب والأون تي في.. بتاعة سويرس ..والسي بي سي ..بتاعة أبو العينين ..والحياة بتاعة السيد البدوي بتاع الوفد ..وكلهم طبعا بيطبلو و بيزمرو للسيسي وعاملينله أغاني جديده كمان..!! ماهو أصل اللي يجوز أمي ..أقوله يا عمي.. وكمان جايبين لنا حفله في قلب ميدان التحرير .. درويش البحر إيمان بيغني ..نفسي...نفسي..!!
لم يفلح (هنداوي) في كظم غيظه فوقف هاتفاً:
- يعني الناس صايمه في رمضان ومعتكفه في الميادين التانيه وبتصلي التراويح .. و الجماعه دول بيطبلو وبيرقصو في التحرير..!!
ثم أنشد قائلاً:
- آآه يابلد.. الحق فيكي ضايع..والمجد فيكي للصايع.. ومافي حد شاريكي..الكل بايع.. والظلم في كل مكان ذايع ..و القهر والعهر شايع ..مين هيمد ايده للجايع ..ولا هيسجد لربه طايع ..معدش فيكي الا اللي بيطاطي للبياده طايع ولا مش طايع.. أو اللي خايف يقول كلمة حق.. مايع ..!!
فانهال عليه الضباط والعساكر ركلاً وضرباَ بالعصي و الهروات حتى غاب عن الوعي غارقا في دمه و الابتسامة الساخرة لم تفارق فمه.

يتبع

د .أشرف محمد كمال · 16-07-2013, 16:19

(2)

..أخذ (هنداوي) يتجول في ساحة المعتقل ؛ كعادته ساعة العصاري , في غاية الانبهار . ثم قال و هو يتصبب عرقاً:

- بسم الله .. ماشاء الله .. كل دي ساحه..؟! دي تطلع أكبر من ميدان التحرير بجلالة قدره..!! فعلا معتقلات الزمن ده ..غير معتقلات زمان..!! دي واسعه .. و سرحه .. و برحه.. و تساع من الحبايب عشرين مليون.. و الحاجات الحلوه دي.. اتعملت إمتى بقه..؟! أكيد الناس دول مكانوش بيلعبو..!! و كانو بيخططو لليوم ده من زمان ..و عاملين حسابهم على كل حاجه..!! أمال كانو بيقولو الحاله مش ولابد ليه..؟! معاهم حق ..يعني كانو هيصرفو فلوس البلد على رغيف العيش.. ولا البنزين ..و السولار .. ولا على المعتقلات..!! أكيد لازم يهتمو بأمن البلد .. من الناس اللي عاوزه تخربها زينا.. وأهو كام معتقل من دول يلمو الشعب كله فيهم.. ولا له لزمه البنزين.. ولا السولار ..ولا أزمه العيش..!! كل واحد هياخد حصته الميري.. كل يوم.. ولا يقف في الطابور.. ولا يطلعو عليه البلطجيه يسرقوه.. و ربنا يبارك في جيش مصر اللي حامينا..!!

ثم تلفت حوله , و أخرج منديله المزركش من جلبابه , و مسح به عرقه ثم وضعه على رأسه كي يحتمي من قيظ شمس يوليو الحارقه في أول أيام شهر رمضان المباركه ,و بلل شفتيه بلسانه قائلاً:
- بس إيه لازمه إنهم يسيبونا كده في السمس من طلعه النهار لحد أدان المغرب ..؟! و الناس صايمه من امبارح مدقتش بق ميه..!! دا حتى مش لاقيين ميه عشان نتوضى و نصلي ..قلنا مش مشكله نتيمم ..ماهو مافيش أكتر من الرمله السخنه في الحته دي..!! و ياتري بقى هيأكلو الناس دي كلاتها منين..؟! ولا هايجبولنا فطار من أساسه ولا لأ..؟! ولا يكنش الأمريكان خطفونا بحق و حقيق.. و ودونا على جوه انتو نامو..!! بس العساكر العاده اللي مبيفهموش بتوعنا دول .. أنا عارفهم ..ولايمكن يتقلدو أبداً في أيوها حته في الدنيا..!!

ثم نظر فيمن حوله , و قال ضاحكاً :
- عارفين اللي بيحصل في مصر عامل زي ايه..؟! واحد ماشي مع مراته في الشارع .. طلعله شوية ناس.. فيهم واحد لابس ظابط سأله.. مين دي..؟.. قاله.. دي تبقى مراتي ..!! الظابط ضحك و سأله.. إيه اللي يثبت إنها مراتك..؟ قام طلعله عقد الجواز من جيبه.. راح الظابط أخد العقد و قطّعه.. قام الراجل اتنرفز وقاله..إيه ده....إنت إزاي تعمل كده..؟ راح الظابط مرقصله حواجبه و قاله ببجاحه.. دي بقت مراتي خلاص.. و بص الظابط لواحد كان جايبه معاه لابس طرطور.. سأله ..إيه يا طرطور.. مش دي بقت مراتي..؟ الطرطور.. طبعاً جاوبه بسرعه ..و أعملك العقد دلوقتي على طول ..!! وكان فيه دقون كتير واقفة كده ..سألهم ..إيه يا دقون نظامكم إيه..؟ توافقوا ع الكلام ده..؟.. الدقون هزت رأسها و قالت .. والله حقناً للدماء.. نوافق إنها تبقى مراتك إن شاء الله ..و كان فيه قسيس قاعد.. سأله ..إيه رأيك يابوهم في الموضوع ده..؟ القسيس رد على طول ..الرب يبارك.. وكمان كان فيه عمّه واقفه.. سألها ..إيه يا عمّه..؟.. قالتله.. توكلوا على الله.. حلال.. حلال.. حلال..!!

يتبع

د .أشرف محمد كمال · 15-07-2013, 19:50

المشاركة الأصلية بواسطة سيد يوسف مرسى مشاهدة المشاركة

أنا كنت فاكرك من إللى هياهم
أتريك ياعينى غصت جواهم
ومشيت فى درب طويل
مش سكتك
ولا سكة الناس إللى الناس ظلماهم
وهنداوى بس بقى معاهم
يادكتور كان لازم الناس تصحى
وتعرف مين الصح
ومين إللى متسلط على رقابهم
تحياتى الحارة للدكتور
ولهنداوىوربنا يفرج كربه
وكرب الناس إللى معاه المكروبين
تقبل مرورى

آمييين يا سيد يا أخويا
ربنا يكشف عنا الغمه ويحلها بحل من عنده
إحنا لو سبناها للبشر هيقطعوا بعض عشان كرسي ولا يسوا
واقطع دراعي بعد كده لو فيه رئيس عمر فيكي يابلد أكتر من 6 شهور
اللي هيجي هيسقطوه الاسلاميين وهيقعدوله في الميادين
ولو جه واحد منهم تاني هيقعدوله العلمانيين
واذا جه يساري هيتربصوله اليمنيين ولو جه يميني هيرقدوله الليبرالين
وهنقعد في الحال ده سنين وسنين وزغرتوا ياللي انتو مش غرمانين

د .أشرف محمد كمال · 15-07-2013, 19:39

المشاركة الأصلية بواسطة فوزي سليم بيترو مشاهدة المشاركة

من الآخر هنداوي طلع خلية نايمة !
والكام قلم إلّي خَدْهُم في المعتقل صَحّوه .
هات ما عندك يا صاحبي ، لكن من غير شتيمة وغمز ولمز
وخلّيك محايد كما عرفتك وحبّيتك .

أبو الفوز

يا ابو الفوز يا أخويا انا لا خليه نايمه ولا قايمه..!!
وانا طول عمري ان كان لسه في العمر عمر واقف على البر
لاني مش طمعان في ايتها حاجه ولا بجري ورا الكراسي
ومعرفش أقول إلا الحق والحق واضح وضوح السمس فى عز الليل
ايه اللي خلي مشكلة البنزين والسولار تتحل بين يوم وليله
وايه اللي خلي الشرطه والجيش شادين حيلهم اليومين دول
وهما كانوا نايمين في العسل نوم طول السنه اللي فاتت
الا مافي واحد بلطجي من اللي كانوا بيقطعو الطريق ويروعو الناس المسالمين اتقبض عليه
وهما نازلين اليومين دول قبض في كل اللي يفتح بقه ويقول آمين
والوزاره اللي جايه كلها من الليبراليين مش ده برضو اقصاء للناس التانيين
وإذا كان فيه حتى 11 مليون رافضين طب هيعملو ايه في ال12مليون اللي كانوا موافقين
انا شايف ان البلد داخله في نفق مظلم واعتقد ان السيناريو السوري اقرب
وهو نفس المخطط الصهيو أمريكي المعد سلفاً للحرب الأهليه مع الجيش
وربنا يستر ويخيب ظننا

فوزي سليم بيترو · 14-07-2013, 18:05

من الآخر هنداوي طلع خلية نايمة !
والكام قلم إلّي خَدْهُم في المعتقل صَحّوه .
هات ما عندك يا صاحبي ، لكن من غير شتيمة وغمز ولمز
وخلّيك محايد كما عرفتك وحبّيتك .

أبو الفوز

سيد يوسف مرسى · 13-07-2013, 19:55

أنا كنت فاكرك من إللى هياهم
أتريك ياعينى غصت جواهم
ومشيت فى درب طويل
مش سكتك
ولا سكة الناس إللى الناس ظلماهم
وهنداوى بس بقى معاهم
يادكتور كان لازم الناس تصحى
وتعرف مين الصح
ومين إللى متسلط على رقابهم
تحياتى الحارة للدكتور
ولهنداوىوربنا يفرج كربه
وكرب الناس إللى معاه المكروبين
تقبل مرورى

هنــــداوي في المعتقــــــل (متجـدد)

اترك تعليق:

اترك تعليق:

اترك تعليق:

اترك تعليق:

اترك تعليق:

اترك تعليق:

اترك تعليق:

اترك تعليق:

هنــــداوي في المعتقــــــل (متجـدد)

ما الذي يحدث