(سلسلة) لغــــز اسمــــه … الــــزواج ..؟!

**د .أشرف محمد كمال** · 03-05-2010, 19:06

المشاركة الأصلية بواسطة أحمد أبوزيد مشاهدة المشاركة

د. أشرف
مساء أحمر نادى

و كانت أغلب الزوجات تحرصن على إنجاب الأطفال ؛ حتى يضمن حقوقهن في الميراث , و يأخذن نصيبهن , و نصيب أولادهن ؛ حتى و لو لم يمسسهن ..!! فمتى و أين له أن يتذكر

مش فاهم كيف ينجبون و لم يمسسهم

ممكن توضيح
مع ذكر مثال للإيضاح

تحياتى و تقديرى

هههههه
أنت مش عاوز برضو تجيبها لبر
ماسمعتش عن القصة المأثورة
فلان خلف في الستين ( يجوز..!!)
فلان خلف فى السبعين (سبحان من يحيي العظام وهي رميم..!!)
فلان خلف فى الثمانين ..( أكيد كان له جار في العشرين..!!)

**أحمد أبوزيد** · 03-05-2010, 19:25

آآآآآآآآآآآآآآآآ ةةةةةةةةةة
فهمت
تقصد إنها إستعانت بصديق

بس إستعانت به إزاى
فهمنى طيب

**د .أشرف محمد كمال** · 04-05-2010, 17:42

المشاركة الأصلية بواسطة أحمد أبوزيد مشاهدة المشاركة

آآآآآآآآآآآآآآآآ ةةةةةةةةةة
فهمت
تقصد إنها إستعانت بصديق

بس إستعانت به إزاى
فهمنى طيب

لاااااااااااااااااااااااااا
إللي يجاوبك على السؤال ده
جورج قرداحي

**د .أشرف محمد كمال** · 04-05-2010, 18:00

لغــز اسمه الــزواج .. العصر الحالي (الحلقة التاسعة) الـزواج في الخليـج (2)

(2)

.. دخلت إلى حجرته إحدى الممرضات الجميلات , و هي تمسك في يدها حقنة شرجية , و قالت له مبتسمة :
ـ صباح الخير .. يا شيخ أبو القاسم ..
قال لها الرجل ؛ بمجرد أن رآها ـ فلم يعد يرى إلا على بعد خطوات معدودة ـ :
ـ تصبّحي بالخير ..
توددت إليه سائلة :
ـ عامل إيه النهارده ..؟!!
أجابها , و قد انشرحت أساريره:
ـ الله يعطيكي العافيه .. الحمد لله ..زين و الله زين..
ضحكت (سوسن) , و قالت له :
ـ طيب أنا عاوزه أركب لك .. الحقنة الشرجية عشان أحضرك للعمليه ..
تأفف الرجل , قائلاً :
ـ كل يوم حجنه شرجيه ..؟!! هذا و الله شئ عجيب ..!!
قالت له (سوسن) معتذرة :
ـ معلهش يا عم أبو القاسم .. المره دي كمان .. علشان خاطري ..
هنا ابتسم الشيخ (أبو الجاسم) , و أخذ يداعب لحيته , و يتراقص بحواجبه . قائلاً :
ـ علشان خاطرك غالي عندي.. أنا هاعمل كل إللي تؤمرى بيـه.. يا حلـوه ..!!
نظرت إليه (سوسن) متعجبة من ذلك العجوز المتصابي الذي لا يقوى على الحراك , و لا زال ؛ و هو تحت العلاج , و على وشك دخول غرفة العمليات , يرتدى تلك المريلة البيضاء التي تربط من الخلف كالأطفال ؛ يغمز لها بعينيه , و يضغط على يديها بيديه . و يملس على أجزاء من جسدها ..!! بينما كانت تعطيه العلاج . قائلاً :
ـ عظيم .. و الله عظيم ..!!
حتى أنها فكرت أن تشكوه إلى الأطباء , أو إدارة المستشفى ؛ لكنها خشيت من العقاب ..!! فهو يدفع آلاف الجنيهات . ثم أنه مريض , و المريض دائماً على حق , فلا أحد يستمع لكلام الممرضات ..!! فكرت أن تقول إلى زميلها , و حبيبها (حمدي) الذي يعمل ممرضاً معها في نفس المستشفى . لكنها خشيت من غضبه , و تهوره ؛ فقـد يقتلـه , قبل أن يموت بمفرده ميتة ربه..!!
.. لذا حاولت فيما بعد ألا تذهب إليه مرة أخرى كي تمرضه ..!! إلا أنه لم يتركها لحالها , و طلبها هي بالاسم . فوجدت رئيسة التمريض بالقسم , تأتيها مهرولة . و تقول لها لاهثة :
ـ يلا بسرعة يا سوسن .. الشيخ أبو القاسم عاوزك ..!!
قالت لها (سوسن) معتذرة :
ـ و النبي إعفيني يا مس .. و خلي أي واحدة تانيه من زمايلي .. هيا إللي تروح له ..
أجابتها على الفور :
ـ ما ينفعش ..!! هو عاوزك إنتي .. و رافض ياخد العلاج من أي حد تاني .. حتى مني ..!! و لو مدير المستشفى عرف بالموضوع ده .. يمكن يرفدني .. يلا يا بنتي ما تجيبيش لنا الكلام ..‍‍!!
أجابتها (سوسن) بخجل :
ـ أصله راجل قليل الأدب ..!!
و استطردت قائلة :
ـ و كمان إيده طويله أوي ..!!
ضحكت (الريسة), قائلة :
ـ يا سلام ..!! يعني هو ده إللي مزعلك ..؟!! يا عبيطه .. هاوديه شويه ..و هو هينغنغك ..!! دي فرصة العمر جت لحد عندك ..!! دا عنده الفلوس بالكوم .. و باقي له في الدنيا كام يوم .. دا يبقى يوم السعد لما يتجوزك ..‍‍!!
دهشت (سوسن) , وهي تستمع لكلامها , و هتفت جزعة :
ـ يتجوزني كمان ..!! إزاي إنتي مش عارفة إني بأحب حمدي ..؟!
ضربت على صدرها , و شهقت , قائلة :
ـ حمدي إيه الكحيان الصدمان العدمان ده ..!! هو حيلته إيه إلا مرتبه ..؟! و بقالكوا خمس سنين مع بعض .. و لسه قدامكوا يجي عشر سنين ..على ما تقدرو تشوفولكوا شقه ..!! عموماً يا ستي إذا ما كنش في الموضوع جواز .. أهو جايز ينوبك من الحب جانب .. و تطلعيلك بقرشين ينفعوكي بعدين .. و تقصري المسافات .. و تتجوزي حبيب القلب .. المهم .. المطلوب منك إنك تريحي الشيخ أبو القاسم على الآخر .. و تنفـذي له كـل طلباتـه ..!!
ثم ضغطت على يديها , و قالت ضاحكة :
ـ مفهوم ..؟!!
ومضت , و ذيل ضحكتها يلاحقها , قائلة :
ـ يا ريتني كنت أنا ..!!
.. ذهبت (سوسن) إليه تتخبط في خطواتها . فابتسم , و كأنه كان يعلم ذلك الحديث الذي دار بين (الريسة) و بينها ..!! و ربما يكون هو أرسلها . بل قد يكون دفع لها ..!!
ثم أمسك بيديها , و أجلسها بجواره . و أخذ يحدثها عن مدى ثرائه . و عدد اللائي تزوجهن في حياته . كيف أنه تزوج من الممثلة الأمريكية الشهيرة (برجيت باردو) , و تزوج من (جاكلين كندي) بعد طلاقها من (أوناسيس), و تزوج من تلك الراقصة المصرية المشهورة (كيتي) , و تزوج الفرنسية (إيرما) , و تزوج أميرة (موناكو), و تزوج .. , و تزوج . و أخذ يعدد لها الحسان في كل مكان . و عشرات الفتيات اللاتي لم يبلغن سن الرشد . بل اللائي لم يبلغن أيضاً ..!! ـ بعدما يأتي آبائهن بالطبع بشهادات تسنين لهن تفيد تجاوزهن الستة عشرة عاماً ـ و أنه رجل تقي يخاف الله , و يخشى الحرام , ولا يرتكب أبداً معصية . لذا فهو يتزوج دائماً في الحلال ..!! و كان طوال حديثه معها ؛ يعبث في جسدها . و هي تستمع له ؛ كما لو كانت مخدرة . فشردت عنه بفكرها ؛ إلى حبيبها (حمدي) و تخيلت أنه هو من يحدثها ..!! و أنهما لو أن عندهما القليل من ذاك الكثير؛ لتزوجا . و كان من يداعبها الآن . فجأة تنبهت إليه , و انتفضت واقفة . و خرجت من الحجرة راكضة ..!!

يتبع

**أحمد أبوزيد** · 04-05-2010, 19:52

د. أشرف

تمام كدة
بداية موفقة
طريقك أخضر
دوس يا دكتور
على فكرة انامسافر غدا القاهرة و لقائنا الخميس بالليل
تعرف الفندق الذى أقيم فيه بالقاهرة فى شارع الهرم به ثلاث كباريهات
محتاج تقضى كام يوم فى الفندق عشان تعيش التجربة الشعرية بنفسك و تكتبلنا قصص عن تاريخ الفراعنة فى شارع الهرم

تحياتى و تقديرى

**د .أشرف محمد كمال** · 05-05-2010, 18:25

المشاركة الأصلية بواسطة أحمد أبوزيد مشاهدة المشاركة

د. أشرف

تمام كدة
بداية موفقة
طريقك أخضر
دوس يا دكتور
على فكرة انامسافر غدا القاهرة و لقائنا الخميس بالليل
تعرف الفندق الذى أقيم فيه بالقاهرة فى شارع الهرم به ثلاث كباريهات
محتاج تقضى كام يوم فى الفندق عشان تعيش التجربة الشعرية بنفسك و تكتبلنا قصص عن تاريخ الفراعنة فى شارع الهرم

تحياتى و تقديرى

بالهنا و الشفا أنت
أشارتك حمرا
أنا بدوخ من الميه الساقعه
هأعينك مراسلنا في قهوة فيصل
و أديك شفت في العصر الفرعوني
سي نفرو عمل إيه في تيتي..!!

**دكتور مشاوير** · 05-05-2010, 18:32

[align=center]
إيه ده يادكتور ...
نفرتيتي ونفرتاري ،وشارع الهرم..
دا انتم هايسيين بقىَ ههههه
[/align]

**د .أشرف محمد كمال** · 05-05-2010, 18:38

لغــز اسمه الــزواج .. العصر الحالي (الحلقة التاسعة) الـزواج في الخليـج (3)

(3)

.. بعدها بلحظات ؛ بينما كانت (سوسن) تبكي , دخلت عليها (الريسه) مهللة , و قالت :
ـ يا سعدك يا هناكي.. يا سوسن يا بنتي .. الشيخ أبو القاسم.. فاتحني دلوقتي في جوازك .. و هينفذ كل إللي تؤمري بيه ..!!
التفتت (سوسن) إليها , و هي تمسح الدموع عن عينيها, قائلة :
ـ إنتي بتقولي إيه .. هو فاكرنا بضاعه يقعد يشتري و يبيع فينا ..؟! إحنا بني آدمين .. من لحم ..و دم .. و مشاعر .. هو فاكر إيه .. بفلوسه يقدر يشتري كل حاجه ..؟! إزاي أتجوز واحد مش باطيقه .. و أديه نفسي.. و أنا قلبي .. و عقلي .. مع واحد غيره ..!!
ربتت ( الريسه) على كتفها , و قالت :
ـ ما تبقيش عبيطه ..!! جواز إيه و بتاع إيه ..!! هو إنتي فاكره إن هو له في الجواز .. دا زمانه نايم في العسل نوم .. لكن أهوه .. ده من حلاوة الروح .. و كلها كام يوم ..و يرجع على بلده و يغور .. تاخديلك كام ألف جنيه .. و يا دار ما دخلك شر ..!!
نظرت إليها (سوسن) , و هي مستغرقة في التفكير, ثم قالت :

ـ يعني إنتي فكرك كده ..؟!!

أجابتها ( الريسه ) على الفور :
ـ إن كنتي مش مصدقاني .. إسألي الدكاتره عن حالته .. و بعد العمليه.. مش هيبقى نافع في الجواز .. ولا دياوله .. وإنتي ممكن تشترطي عليه.. يطلقك قبل ما يسافر بلده ..
شردت (سوسن) ثانية تفكر , ثم قالت مترددة :
ـ أنالازم الأول أفاتح أهلي .. كمان لازم افهم حمدي ..!! عشان يعرف أد إيه.. أنا باضحي ..!! عشان خاطر حبي له .. و إنه يقـدر يتجوزنـي ..!!
..عادت (سوسن) إلى منزلها , شاردة الذهن , مشتتة الفكر . كمن كانت منومة مغناطيسياً من أثر كل ذلك الأمر ؛ الذي لم يخطر لها ببال . و لم تكن تتصوره طوال العمر . ماذا تقول لأمها ..؟ و كيـف تقنعها بذلك الأمـر ..؟ ماذا تقول لـ (حمدي) ..؟ و هل سيلتمس لها العذر ..؟ أم تتكتم الأمر , و تجعل الزواج في السر ..؟!!
.. دخلت إلى حجرتها في صمت . نادتها أمها ؛ فلم ترد . فدخلت وراءها قائلة :
ـ فيه إيه يا سوسن يا بنتي ..؟! مالك كده مش زي عوايدك ..؟! و لما بناديكي ..مش بتردي ..!!
استيقظت من شرودها , و سألتها:
ـ فيه حاجه يا ماما ..؟!!
قالت ( الأم ) في قلق :
ـ إنتي إللي فيكي حاجه ..؟! مالك ..؟!!
أجابتها (سوسن) بتردد :
ـ فيحاجه يا ماما عندي .. وعاوزه أقولهالك .. لإني مـش هاقدر أخبـي ..!!
قالت لها ( الأم ) :
ـ قولي يا بنتي.. وغوشتي قلبي ..!!
قالت (سوسن) , مطأطاة رأسها , تنظر إلى الأرض :
ـ أنا جاي لي عريس ..
ضحكت ( الأم ) قائلة :
ـ يا سلام ..!! و فيها إيه ..؟! مانا عارفه من زمان .. مش قصدك على حمدي ..؟
نظرت إليها , و الدمع يكاد يفر من مقلتيها ؛ قائلة :
ـ لا يا ماما .. مش حمدي ..!!
ضربت ( الأم )على صدرها قائلة :
ـ ليه يا بنتي .. هو حصل حاجه بينك .. و بينه..؟!!
أجابتها على الفور :
ـ أبداً يا أمي .. أنا باحبه من كل قلبي .. لكن ظروفه لسه مش كويسه .. و بيقبض فلوس لا تجيب .. ولا تودي .. و أنا كمان ظروفي على أدي .. و شفت إن الحل .. إني أتجوز واحد غني .. يشيل الحمل عنك ..و عني ..
قالت لها (الأم ) جزعة , و هي تضرب صدرها :
ـ لا يا بنتي .. ما تغلطيش الغلطه دي ..!! مش لازم توقعي في نفس الغلطـه ..إللي أنا وقعت فيها من قبل ما تتولدي ..
نظرت إليها بتعجب , فهذه المرة الأولى التي تسمع فيها ذلك الكلام . استطردت ( الأم ) قائلة :
ـ أنا كنت زمان إتجوزت شيخ عربي .. أبويا هو إللي باعني.. و قبض التمن .. ألف جنيه .. و كانوا يساوو كتير في الزمـن ده .. و طبعاً طلقني بعد عشر أيام .. و بعدين إتجوزت أبوكي .. إللي سترني .. لأنه كان واحد من قرايبي..
أخرست المفاجأة لسان (سوسن) , و لم تستطع أن تنطق ببنت شفة . فربتت ( الأم ) على كتفها قائلة :
ـ إوعي ..!! إوعي يا بنتي .. تغلطي نفس غلطتي .. إوعي ..!!
ثم تركتها , و مضت . بينما لازالت (سوسن) لا لا تدري ؛ ماذا تصنع أيضاً مع (حمدي) ..؟!
.. التقت به في اليوم التالي . فحاولت تجنبه وعدم الحديث معه وحينما وجدها ليست كعادتها . استوقفها في الردهة قائلاً :
ـ فيه إيه يا سوسن ..؟! إنتي زعلانه مني .. ولا إيه..؟!!
نظرت إليه , فوجد الدموع تترقرق في عينيها . فزع (حمدي) و قال بلهفة :
ـ إنتي بتعيطي ..؟! فيه إيه يا حبيبتي .. هو حصل حاجه مني ..؟!
قالت له , و هي تتحاشى النظر في عينيه :
ـ أبداً .. لكن إنت عمرك.. ما هتفهمني ..!!
أجابها (حمدي) في رقة :
ـ أنا ..!! دا أنا الوحيد إللي بيفهمك .. من غير ما تتكلمي .. و قلبي بيتقطع .. لما بيشوفك بتتألمي .. و مستعد إني أحارب الدنيا كلها .. علشان بس .. تتبسمي ..!!
ثم أمسك بكتفيها , و رفع رأسها , و نظر في عينيها قائلاً :
ـ فيه إيه بس.. طمنيني ..؟!!
ثم صرخ فيها بنفاذ صبر:
- إتكلمي ..!!!!
لم تستطع منع نفسها من البوح بالحقيقة أمامه , و قالت دفعة واحدة :
ـ أنا هاتجوز ..!!!!
صعق (حمدي) , و ارتد إلى الوراء عدة خطوات ؛ كمن مسه مس من الكهرباء . ثم هتف قائلاً :
ـ إيه .. إنتي بتقولي إيه ..؟!!
صرخت قائلة :
ـ حمدي .. أرجوك تفهمني.. و تعذرني ..
أجاب , و الشرر يتطاير من عينيه :
ـ أفهم إيه ..؟! إنك هتكوني لغيري ..!! بعد كل إللي بينا .. بعد الحب إللي رويناه بدموعنا .. بعد كل الأحلام إللي رسمناها .. بإن يكون لنا بيت يجمعنا سوى .. و وعدك بإن ما في حاجه أبداً تفرقنا ..
قاطعته متوسلة :
ـ أرجوك يا حمدي .. بلاش تعذبني .. و اسمعني ..
ثم استجمعت اصرارها , و قالت:
- أنا هاتجوز الشيخ أبو القاسم ..!!
صعق (حمدي) مرة أخرى . و نظر إليها بدهشة قائلاً :
ـ آآآه .. دلوقتي فهمت ..!! إنتي بتبيعي نفسك.. للي يقدر يدفع أكتر .. بتبيعي نفسك للي يدفع لك السعر أعلي .. خلاص بقينا في زمن كل حاجه فيه .. بتتشرى بالفلوس حتى النفوس ..!!
اقتربت منه في حزن قائلة :
ـ حمدي .. أرجوك تسمعني ..!!
فصفعها على وجهها , قائلاً :
ـ إنتي عندي ولا تسوي .. و تستحقي أكتر من كده .. لكن أنا إللي غلطان ..إني حطيت فيكي ثقتي .. إنتي خاينه.. ولا تستاهلي إني أزعل عليكي .. أو أندم على السنين إللي ضيعتها معاكي ..

ثم تركها , و مضى إلى حال سبيله ..

يتبع

**د .أشرف محمد كمال** · 05-05-2010, 18:59

المشاركة الأصلية بواسطة دكتور مشاوير مشاهدة المشاركة

[align=center]
إيه ده يادكتور ...
نفرتيتي ونفرتاري ،وشارع الهرم..
دا انتم هايسيين بقىَ ههههه
[/align]

د. سامح حبيب قلبي
واحشني ياراجل
أنت غطسان فين يا برنس
محدش شافك من بعد الفخفخينا و جاد و بابا عبده
ماشيه معاك ياعم .. و مشاويرك كترت..!!
أنا مش بحسد..
عاوزينك تقولنا رأيك فى الشيخ أبو الجاسم و سوسن..؟!
وأنت شكلك كده مقرتش العصر الفرعونى
المهر زمان كان هرمين .. و تلت مسلات..!!

**أحمد أبوزيد** · 06-05-2010, 18:08

د. أشرف

مساء القشطة
إن كنتي مش مصدقاني .. إسألي الدكاتره عن حالته .. و بعد العمليه.. مش

هيبقى نافع في الجواز .. ولا دياوله .. وإنتي ممكن تشترطي عليه.. يطلقك قبل ما يسافر بلده ..
زنا

أعوذ بالله من الشيطان الرجيم

هل عدنا إلى عصر العبودية

ولا عصر العبودية كمان على الأقل وقتها كان هذا شىء شرعى و معروف
و لكن الأن .........
ماذا نقول ..........

تحياتى و تقدير

د. أشرف

لما كنت فى شارع الهرم أمس أنا سألت الدكتور حواس عن موضوع سنهرو و تيتى
و عرفت منه إن الفرعون أعدم الطبيب الذى أجهض
تيتى و لكن للأسف الدكتور حواس رفض يقولى
الدكتور أجهضها ليه

عارف أنت صح
أنت مش دكتور
قول بقى .........

**د .أشرف محمد كمال** · 06-05-2010, 20:19

المشاركة الأصلية بواسطة أحمد أبوزيد مشاهدة المشاركة

د. أشرف

مساء القشطة
إن كنتي مش مصدقاني .. إسألي الدكاتره عن حالته .. و بعد العمليه.. مش

هيبقى نافع في الجواز .. ولا دياوله .. وإنتي ممكن تشترطي عليه.. يطلقك قبل ما يسافر بلده ..
زنا

أعوذ بالله من الشيطان الرجيم

هل عدنا إلى عصر العبودية

ولا عصر العبودية كمان على الأقل وقتها كان هذا شىء شرعى و معروف
و لكن الأن .........
ماذا نقول ..........

تحياتى و تقدير

د. أشرف

لما كنت فى شارع الهرم أمس أنا سألت الدكتور حواس عن موضوع سنهرو و تيتى
و عرفت منه إن الفرعون أعدم الطبيب الذى أجهض
تيتى و لكن للأسف الدكتور حواس رفض يقولى
الدكتور أجهضها ليه

عارف أنت صح
أنت مش دكتور
قول بقى .........

حمدلله على السلامة ياعم أحمد
أنت دخلت الحلقات فى بعض كده
نهرو دا فى الهند والحلقة الهندى لسه ماجتش..!!
وبعدين تيتي كان لسه مخطوبه مدودناش في داهية
واللى راحت للدكتور هيا سها وكانت متجوزه حسام عرفي
وبعدين أبو الجاسم راجل بيعرف ربنا وبيتجوز رسمي
ومالوش فى العبودية دا كان أيام الجاهلية مع وهران و بثينه الشامية و ثريا الروميه
أن شكلك تقلت العيار هناك شويه ولا إيه..؟!

**أحمد أبوزيد** · 07-05-2010, 05:55

د. أشرف

الله يسلمك من كل شر .
شكلك تقلت العيار هناك شويه ولا إيه..؟
و حياتك مش شويه واحده ولا أثنتين بلا ثلاث شويات

صباح شريف باشا

**د .أشرف محمد كمال** · 07-05-2010, 16:57

المشاركة الأصلية بواسطة أحمد أبوزيد مشاهدة المشاركة

د. أشرف

الله يسلمك من كل شر .
شكلك تقلت العيار هناك شويه ولا إيه..؟
و حياتك مش شويه واحده ولا أثنتين بلا ثلاث شويات

صباح شريف باشا

تشكرات أفنذم

صحتين و عافيه مولانا
خد عندك الجزء الرابع عشان تهضم

**د .أشرف محمد كمال** · 07-05-2010, 17:08

لغــز اسمه الــزواج .. العصر الحالي (الحلقة التاسعة) الـزواج في الخليـج (4)

(4)

.. فيما بعد . في حجرة (أبو الجاسم) بالمستشفى . كانت (سوسن) تجلس بجوار المأذون و اتنين من الشهود , و خلفهم (الريسه) تطلق الزغاريد . قائلة :
ـ زوجتك نفسي ..
و أجاب الشيخ (أبو الجاسم) عليها قائلاً في سعادة غامرة :
ـ و أنا جبلت ..
ثم وقعا الأوراق . و قبض الشهود النقود . و حمل المأذون دفاتره و مضى . فقبلتها (الريسه) مهللة :
ـ ألف مبروك يا سوسن يا حبيبتي .. دا طاقة القدر اتفتحتلك على إيديا .. إياك بس ينوبنا من الحظ شويا ..
نظرت إليها (سوسن) بحنق . ثم نظرت إلى ذلك الشيخ باشمئزاز . ذاك الذي أصبح الآن زوجاً لها . و له عليها كافة الحقوق , و ليس لها إلا السمع و الطاعة . سواء كان عن رضا , أو غصباً..!!
.. ما مضت إلا قرابة الساعة . حتى حضر (حمدي) مصطحباً أمها . التي أتت مهرولة عندما عرفت بخبر زواجها . و دخلت الحجرة غاضبة :
ـ ليه كده بس يا سوسن يا بنتي ..؟! ترمي نفسك الرميه دي .. و توافقي من غير ما تسمعي كلامي .. و تاخدي برأيي ..
و أجهشت فى البكاء ..
فتشائم الشيخ (أبو الجاسم) من بكائها , و قال لها غاضباً:
ـ مشي .. مشي يا ست إنتي .. هي خلاص بجت زوجتي .. و ما في حد له حاجه عندي دلوجـتي .. يلا .. يلا .. بره .. و ين الحرس مالي ...؟!!
ثم ضرب على عدة أجراس . بينما نظرت إليه (أم سوسن) ببطء ؛ عندما سمعت صوته قائلة بذهول :
ـ يا لاهوي .. هو إنت إللي إتجوزت بنتي ..؟!!
نظر إليها (أبو الجاسم) , و (سوسن) التي كانت تبكي . و تعجب (حمدي) . فاستطردت قائلة :
ـ إنت تاني ..؟! مش كفاية ميلت بختي .. جاي كمان دلوقتي.. تميل بخت بنتي ..؟!!
نظر إليها (أبو الجاسم) محاولاً معرفة من هي . فأجابته قائلة :
ـ أنا نبويه .. إللي اتجوزتني من يجي عشرين سنه .. و شويه .. و ما قعدتش معايا إلا عشر أيام .. و سبتني.. و سافرت ..!!
أشار الشيخ (أبو الجاسم) إلى رأسه :
ـ إيه .. افتكرت ..!! لكن ده ما يمنعش إني أتجوز زي مابدي ..وانا طلقتك من زمان..و الشرع محلل لي أربعه .. و إللي على زمتي الحين ..اتنين .. أنا راجل عارف ربنا كويس .. و ما في حاجه تمنعني.. لا في الشرع ..ولا في الدين ..
قال له (حمدي) ساخراً:
ـ لا يا شيخ ..!! ما يحلش لك تجمع بين الاتنين .. الأم و بنتها .. حتى و لو كنت طلقتها ..؟!!
قاطعته (أم سوسن) قائلة بتردد :
ـ لأ .. مش هو ده السبب الوحيد.. كمان ..؟! سوسن دي تبقى بنته ..!!
فجرت (أم سوسن) المفاجأة . فصمت الكل من الدهشة . و قد ألجمت ألسنتهم . و جحظت عينى الشيخ (أبو الجاسم) من الذهول . فنظر كل منهم إلى الآخر , و هو لا يدري ماذا يقول في تلك الكارثه ..؟! و هل حدثت هكذا من قبيل المصادفة ..؟! أم أن الأقدار هي التي شاءت أن يتعلم ذلك الشيخ المغوار ؛ درساً قاسياً من جراء تلك الأفعال السفيهة . و الجري وراء الغريزة , و أخذه المال ذريعة , و وسيلة ليحقق بها أهدافه الدنيئة , و يسىء بذلك إلى الدين و الشريعة . فيستغلهم أسوأ استغلال , و يخلط ما بين الحرام و الحلال ..!!
استيقظت (سوسن) من ذهولها , و هول مفاجأة أمها . و قالت باكية :
ـ إزاي يا أمي .. تخبي حاجه زي دي عني ..؟! و إزاي هوا يبقى والدي ..؟! أمال أبويا إللي مربيني.. و اسمه في بطاقتي ده .. يبقى مين ..؟!
طأطأت (الأم ) رأسها , و قالت خجلة :
ـ بعد لما أبوكي ده سابني .. إتجوزت ابن عمي .. هو إللي سترني .. و لقيت نفسي حامل فيكي .. و معرفتش فين أراضي أبوكي .. و وافق هوا الله يرحمه .. يكتبك بإسمه .. لكن ما كنتش أعرف إيه إللي مستخبي ليا ..و ليكي ..؟! وإن أبوكى يعمل فينا العملة ديه ..!!
ثم نظرت تجاه (أبو الجاسم) , و نظر كل من بالحجرة إليه ؛ فوجدوه على حاله جاحظة عينيه , شاخصة . تنظر إلى اللاشئ ..!!

**د .أشرف محمد كمال** · 10-05-2010, 18:36

أنا ملاحظ كده إن الأخوة النساء مقاطعين اللغز بقالهم فتره

ودا له معنين لا ثالث لهما يإما يكونوا عقلوا يأما يكونوا يأسوا
و أتمنى الأولى ..و إن كانت من المستحيلات السبعة..!!
أو يكونوا طفشوا من المعركة و سابولنا ساحة الوغي
وانا لسه كاتب رد فى موضوع أخونا المناضل مكي النزال
فيه تحذير أن النساء يدمرن الصحة ويقصفن عمر الرجال
وان خطرهن أشد من التدخين بمئات المرات

إن لم يكن هن السبب في ارتفاع معدلات التدخين وانتشار المخدرات و الإدمان و الإنتحار
هذا غير الموت الفجائي والسكتات الدماغية و الجلطات القلبية و الشلل الرعاش

هن رحمة لنا

(سلسلة) لغــــز اسمــــه … الــــزواج ..؟!

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

ما الذي يحدث